Proverbs 26:1-28
26 Shı̨́įgo yidzasgo doo beełtʼée daígi átʼéego áádóó daʼagizhgo nahałtingo doo beełtʼée daígi átʼéego diné doo áhályáanii hoł danilı̨́į dooleełígíí ałdóʼ doo beełtʼée da.
2 Tsídiiłbáhí naanáátʼahgo doo nidaahígíí áádóó táshchozhii yitʼahgo doo nidaahígíí nahalingo tʼáadoo biniyéhígóó hóyéeʼgo áhaʼoodzíʼígíí doo akʼi hwiidooleeł da.
3 Łı̨́ı̨́ʼ bá bee atsxis hólǫ́, télii bá azáátʼiʼí hólǫ́ áádóó diné doo áhályáanii bíígháándę́ę́ʼ bee nídínóolghałii hólǫ́.
4 Diné doo áhályáanii doo bił ahiníłtʼée da dooleeł biniyé bidoo hóshkał bikʼehgo doo bichʼįʼ háádíídzih da.
5 Diné doo áhályáanii honisą́ doo nízin da doo biniyé bidoo hóshkał yee hahadziihígíí bikʼehgo bichʼįʼ tʼą́ą́ʼ hááhídziih.
6 Tʼáá háiida diné doo áhályáanii haneʼ há ayííʼą́ągo éí hakeeʼ tʼáá áłah kʼízhnígizh áádóó atíhodoolíiłii jidlą́ nahalin.
7 Diné doo ádahalyáanii haneʼ bee akʼidiʼdootı̨́įłii yaa dahalnihgo éí naaljı̨́ı̨́d nilíinii bijáád tʼóó nahíínilígíí nahalin.
8 Diné doo áhályáanii hoł yílįįdii éí tsé bee aditłʼı̨́ı̨́h bídziistłʼónígíí nahalin.
9 Diné doo ádahalyáanii haneʼ bee akʼidiʼdootı̨́įłii yaa dahalneʼii éí adláanii bílaʼ hosh baa ííjilígíí nahalin.
10 Adiłtʼohii éí tʼáá ałtso tídeidileʼígi átʼéego tʼáá háiida éí doo áhályáanii, doodaiiʼ tʼóó bíighah dahidikáhígíí naanish yeidiyiiʼaahígíí nahojílin.*
11 Łééchąąʼí bikwi néídı̨́hígi átʼéego doo áhályáanii bidoo hóshkał yaa náánáádáał łeh.
12 Diné łaʼ honisą́ nízingo ádaa nitsíkeesígíísh yíníʼı̨́? Hó haláahgo doo áhályáanii bá chohooʼı̨́.
13 Bił hóyéeʼii ání, Aají atiinjí náshdóítsoh bitsiijįʼ ditłʼooígíí léiʼ yigááł; kintah daʼnítiingóó náshdóítsoh bitsiijįʼ ditłʼooígíí léiʼ naaghá.
14 Dáádílkał ąą ánátʼįįh áádóó dáńʼdílkał tʼáá éigi átʼéego bił hóyéeʼii bitsáskʼeh yikááʼ naanáhoojish.
15 Bił hóyéeʼii tʼóó bichʼááyah déesʼniiʼii ázaʼdookááł, nidi chʼééh ííłʼı̨́.
16 Diné tsostsʼid jiltʼéego dahojíyą́ągo hadadziisdzíʼígíí éí dahaláahgo bił hóyéeʼii tʼáá bí yaa nitsíkeesígíí yaa hóyą́.
17 Diné ahinídiiltłahii doo hódéétʼiʼgóó tʼóó bíighah chʼíjígháahii áajįʼ ajoolwodgo éí łééchąąʼí bijaaʼ tʼáá ałchʼijí jisiłígi ádziidzaa.
18 Diné diigis silı̨́įʼii honooyééł áádóó kʼaaʼ índa bee naʼatseedí ayiighaas;
19 tʼáá ákótʼéego ałdóʼ yił kééhatʼíinii yinaʼaloʼii íididooniił, Tʼóóyeeʼ nidlodishchíigo áshtʼı̨́.
20 Chizh ádingi kǫʼ ádįįh; tʼáá ákótʼéego diné doo ałjeeh nídanilniihgi ahinááʼdiiltłiʼ ádįįh.
21 Tsííd éí tʼeesh yidiiłtłiʼígi átʼéego áádóó kǫʼ bee chizh diiltłiʼígi átʼéego diné saad biiłhéii ahinídiiltłáád hayiiłtʼééh.
22 Aseezı̨́ nidzinii bizaad ayóo łikan, áádóó ayiʼ góyaa ahwiileeh.
23 Diné nizhónígo yáłtiʼii nidi bijéí biyiʼdę́ę́ʼ tʼóó baaʼihgo nitsíkeesii éí béésh łigaii bąąh hahinilgháshígíí bee hashtłʼish łeetsʼaaʼ yishdléezhgo ályaii nahojílin.
24 Bizaad łikanii akʼeʼdiniih neiniłʼin, áádóó naʼadloʼ ádiiʼ yinéesʼı̨́ı̨́ʼ.
25 Éí nizhónígo yáłtiʼgo tʼáadoo yinídlání, háálá bijéí biiʼ doo yildinii hadeezbin.*
26 Éí akʼeezhdiniihígíí hayoochʼííd bee nazhniłʼin, nidi diné áłah nilı̨́įgi hadoo yáʼáshǫʼ hatsʼą́ą́ʼ baa hodoonih.
27 Tʼáá háiida łeeh hojíígeedgo tʼáá hóda ákóyaa anízhdootłish, áádóó tsé nidzismáazii hakʼi néidooltsʼił.
28 Biyoochʼíidii tídeidííłniiʼígíí yikʼee diniih, áádóó tʼóó áníigo aa haniihgo niʼiiłchxǫǫh.
Footnotes
^ Díí saad dah shijaaʼígíí Hííbrew kʼehjí ááhyiłníinii bee akʼeʼashchínígíí doo bééhózin da; Diyin God doo bízhiʼ yisdzoh da.
^ Kweʼé tsostsʼid nínígíí éí tʼáá átʼé níigo ání.
