BÍLAʼASHDLAʼII łaʼ nabíhoʼdinitaahgo, tʼáásh God yikʼeh ááníił doo, azhą́ shı̨́ı̨́ doo baʼdoodił da ndi? Kóháʼníigo naʼádéékid éí hastiin léiʼ Job wolyéego binahjįʼ bee nihił ííshjání ályaa.

Ízrel dineʼé tʼahdii Ííjipdi kéédahojitʼı̨́įgo, Éíbraham bikʼéígo Job, éí Aréíbiya hoolyéegi kééhojitʼı̨́ı̨́ ńtʼééʼ. Áko ákweʼé nahalzhiishgo diyingo ndaalʼaʼí yáʼąąshiidi God bidááhdóó áłah jizlı̨́ı̨́ʼ, God yichʼįʼ niilteeʼii Séítan ákweʼé hoł yah ííyáh. Éí ákweʼé áłah ílı̨́įgi Jiihóvah éí, bá naalʼaʼí Job yaa dzólíigo yá haadzííʼ. Jiihóvah ání, Job éí diné doo bikʼíhátʼááhgóó tʼáá ákogi ááníiłii nilı̨́, doo éí łaʼ ákójítʼéhí da. Ńtʼééʼ Séítan ání, Job yeeʼ éí God tʼáá ałtsoní yee háká análwoʼígíí biniyé bá nijilʼaʼ. Séítan ánáádíʼní, tʼáá ałtsoní Job bee hólónígíí ałtso nahjįʼ kólyaago éí God yíídóodzih.

Áko Séítan éí Job yee atʼíinii dóó baʼáłchíní áłtsé bitsʼą́ą́ʼ nídidoolyéełgi, áádóó bitsʼíís baa nízhdóotʼįįłgi tʼáá hó bee hóhólníihgo há bee hooʼaʼ. Job éí díí Séítan átʼı̨́įgo doo hoł bééhózin da, éí bąą haʼátʼíí lá biniyé God tʼóó yee hasʼą́ągo nashíhoʼdinitaah nízin. Ákótʼée ndi Job éí tʼáadoo God yikʼijįʼ haadzííʼ da.

Táaʼgo akʼis ádahodilʼı̨́įgo Job yaa yíkai. Naaltsoos Job biiʼ, ląʼígo ahíłkééʼ díí hastóí yádajííłtiʼ. Díí hastóí éí Job bąąhági íinidzaaígíí naníłʼingo biniinaa God atíniilaa daaníigo tʼáá ádzaagóó haghadaʼditʼááh. Kódaaníigo, God yeeʼ bá ndaalʼaʼí doo yíneedlı̨́į da, doodaiiʼ doo yaa dadzólíi da. Áko Job éí díí doo joodlą́ą da. Éí ádee joosdliʼgo ájíní, yáʼátʼééhjí oodáłígíí dasétsą́ bijı̨́įjįʼ yíníshtąʼgo tsʼídá doo nahjįʼ nidideeshʼáał da!

Ndi Job éí ádił ajisih, éí tʼáá ákogi yeeʼ áníshtʼé jinízingo ádaa tsídeezkééz. Diné léiʼ ániid naagháago Iiláíhu wolyéego éí díí ałghadazhʼditʼáhígíí tʼáá átʼé yidiiztsʼą́ą́ʼ. Áadi índa Iiláíhu haadzííʼ. Job éí Jiihóvah biNahatʼaʼígíí dóó tʼáá ałtsojįʼ bóhólníihgi, doo hoł nilı̨́ı̨́góó biniinaa Iiláíhu hachʼahóóshkeed. Áádóó Iiláíhu akʼis ádahoʼdilʼínígíí ałdóʼ yichʼahóóshkeed.

Áádóó Jiihóvah éí Job yichʼįʼ haadzíiʼgo hazhóʼó nitsíjíkeesgo ánáhodlaa. God éí tʼáá ałtsoní nizhónígo ádajiilaaígíí Job bichʼįʼ ííshjání ájiilaa. Áko díí binahjįʼ God éí bílaʼashdlaʼii yiláahdi ayóó átʼé nílı̨́įgi yee nahoneeztą́ą́ʼ. Áko Job éí God hazhóʼó nitsíjíkeesgo ánáhoodlaaígíí bił yáʼíítʼééh. Jiihóvah éí Job bitsʼíís néyííłdzííʼ, bee ajitʼínę́ę há ahą́ą́h nániilyá, dóó neeznáago áłchíní hwee nááhásdlı̨́ı̨́ʼ. Háálá éí Jiihóvah ayóó “aa aʼááh nízin, . . . áádóó joobaʼ lá!” (James 5:11) Séítan éí bílaʼashdlaʼii nabíhoʼdinitaahgo, Jiihóvah bikʼehgo oodáłígíí bidazhdidoochił ní. Ákondi Job yéigo nabíhoʼdineestą́ąʼgo tʼáadoo yidííchid da. Éí bee Séítan biyoochʼíidgo ájiilaa.

​—Naaltsoos Job biiʼ baa haneʼ.