Uz kéyahgi, hastiin léiʼ éí Jiihóvah yidósingo kééhatʼı̨́ı̨́ ńtʼééʼ. Job joolyé. Ayóó átʼı̨́ dóó baʼáłchíní tʼóó ahayóí ńtʼééʼ. Diné badahojoobaʼíii, sáanii bąąh ádahasdįįdii, índa áłchíní bimá dóó bizhéʼé ádaadinii yaa joobaʼ. Job yáʼádaatʼéehii ájooníił ákoósh éí tʼáadoo bee hachʼįʼ anáhóótʼiʼí da doo?

Job éí Séítan hahasíidgo doo baa ákójinízin da. Jiihóvah éí Séítan ííłní: ‘Shá naalʼaʼí Job wolyéiísh baa ákonínízin? Nahasdzáán bikááʼ tʼáadoo łaʼ ákójítʼéhí da. Shíistsʼą́ą́ʼ dóó tʼáá ákogi áánííł.’ Séítan ánídooʼniid: ‘Aooʼ, Job éí nikʼeh hółʼı̨́. Bichʼą́ą́h naniná índa tʼáá ałtsoní tʼóó bá hosíníłʼą́. Kéyah dóó naaldlooshii baa hínííł. Díí ałtso bitsʼą́ą́ʼ ndidíínił, áádóó doo nidósin da dooleeł.’ Jiihóvah ání: ‘Ííshją́ą́ shı̨́ı̨́ Job bínítááh. Ndi doo éí diyííłhéeł da.’ Haʼátʼíí biniyé Jiihóvah éí Séítan díí Job bínítááh yiłní? Jiihóvah bił bééhózingo Job éí doo yóóʼahodidóóʼáał da.

Áko Séítan éí Job ląʼígóó atííłʼı̨́įgo yaa nídiidzá. Áłtsé éí Sabíya dineʼé ayííłʼaʼgo Job bibéégashii dóó bitélii nideestseed. Áádóó Job bidibé kǫʼ bee naastseed. Náánáłaʼ dineʼé Kaldíya daolyéego, ghą́ą́ʼaskʼidii hatsʼą́ą́ʼ deineezʼı̨́ı̨́ʼ. Naaldlooshii yaa ádahalyánę́ę ałdóʼ ałtso naastseed. Tsʼídá aláahdi Séítan yee atíʼiilaaígíí éí Job baʼáłchíní hooghangi tʼáá átʼé daʼayą́ągo ałtso bikʼi hoołdááz. Job ayóó átʼéego hajéí yidííłniiʼ, ákótʼée ndi Jiihóvah tʼáadoo bitsʼą́ąjįʼ dashdiiyáa da.

Séítan éí Job tsʼídá yéigo hachʼįʼ nahwidiyooʼnaał nízin.  Áko Job tʼáá sizı̨́ı̨́ ńtʼééʼ łóód yaa áyiilaa. Éí bitsʼą́ą́dóó ayóó átʼéego Job bikááʼ daneezgai ńtʼééʼ. Biniinaa bichʼįʼ kóhooníłígíí doo bił bééhózin da. Ákondi Job éí Jiihóvah tʼahdii yidósin. God éí díí tʼáá átʼé bíínááł, áko Job tʼah hodósingi baa hoł hózhǫ́.

Séítan éí hastóí táltʼéego Job yichʼįʼ ayííłʼaʼ. Éí Job kódeiłní: ‘Bąąhági íinidzaago naníłʼin, áko God atíniilaa.’ Job ání: ‘Doo bąąhági ásdzaa da.’ Áádóó Jiihóvah daatsʼí díí yee shichʼįʼ nahwiiłná jiniizı̨́ı̨́ʼ doo shaa joobaʼ da jiní.

Diné ániid naagháá léiʼ Iiláíhu wolyéego tʼóó íistsʼą́ą́ʼ ńtʼééʼ. Áádóó hajoodzíiʼgo ájíní: ‘Díí tʼáá ánółtso ádadohnínígíí doo ákótʼée da. Jiihóvah yeeʼ nihíláahdi nitsíkees. Doo yáʼáshóonii doo íidoolíił da. Tʼáá ałtsoní yooʼı̨́ dóó diné bee bichʼįʼ anídahaztʼiʼii yíká análwoʼ.’

Áádóó Jiihóvah éí Job yichʼįʼ haadzíiʼgo ání: ‘Yáʼąąsh dóó nahasdzáán tʼóó áshłaa yę́ędą́ą́ʼshąʼ, háadi nanináá ńtʼééʼ? Haʼátʼíí biniyé doo jiinishbaʼ da, shidiní? Yáníłtiʼ ndi ádahooníiłii doo nił bééhózin da.’ Job ázhdííniidígíí baa hániʼgo áhjiní: ‘Doo ákótʼéégóó ádíshníí lá. Kʼad éí yéigo nééhonisin. Tʼáadoo nikʼeh didlíní da. Tʼáá shǫǫdí shaa jiiníbaah.

Nahodiʼneestą́ą́ʼ bikééʼdóó, Jiihóvah éí Job bitsʼíís yáʼátʼéehgo yá ánáyiidlaa. Bilááh átʼéego yaa náʼídlá. Job éí bił hózhǫ́ǫgo nízaadgóó binínáánááhai. Azhą́ nanitłʼah ndi Job éí Jiihóvah jíistsʼą́ągo hakʼihasdliʼ. Niísh ałdóʼ Job átʼéego, haʼátʼíí shı̨́ı̨́ bee nichʼįʼ nahwiiʼnáa ndi, Jiihóvah doo bitsʼą́ąjįʼ dah didíínáał da?