BÍHWIIDOOʼÁŁÍGÍÍ 6
Daneeznánéeshąʼ Haʼátʼíí Bá Chodahooʼı̨́?
1. Haʼátʼíí yáʼátʼéehgo daneeznánígíí baa haneʼ?
Béthanii Jerúsalem bíighahgi Jesus níyá, ńtʼééʼ Lázaras hakʼis dı̨́ı̨́ʼ yiską́ yę́ędą́ą́ʼ daaztsą́ą́ lá. Díí hastiin daaztsánée bilahké Martha dóó Mary Jesus bił jishcháaʼdi jikai. Ńtʼééʼ tʼáadoo hodíinaʼí diné haa áłah silı̨́ı̨́ʼ. Jesus éí Lázaras néiidiisáago Martha dóó Mary yéigo baa bił hóozhǫǫd.—John 11:21-24, 38-44 yííníłtaʼ.
Daneeznánígíí nizhónígo baa haneʼígíí dóó Jiihóvah nahasdzáán bikáajįʼ néiididoołjahígíí Martha tʼááʼíídą́ą́ʼ bił bééhózin lá.—Isaiah 26:19 yííníłtaʼ.
2. Diné daatsaahgosh haa yitʼįįh?
God Ádam áyidííniid: “Łeezh bitsʼą́ą́dóó ániʼdiilyaago łeezh nílı̨́, áko łeezh nídíídleeł.”—GENESIS 3:19.
Bílaʼashdlaʼii éí łeezh bitsʼą́ą́dę́ę́ʼ bee ályaa. (Genesis 3:19; Job 34:15) Doo éí níłchʼi daniidlı̨́ı̨́góó atsʼíís biiʼ dahiniiʼnáa da. Atsʼíís daniidlı̨́ áko dajitsaahgo doo łaʼ nihitsʼą́ą́dóó háadi da nááhádlǫ́ǫ da. Dajitsaahgo nihitsiighąąʼdóʼ daatsaah, dóó nihinitsíkees ałdóʼ tʼáá bił ádįįh. Daneeznánígíí doo bił éédahózin da, áko éí biniinaa Lázaras ájídingo tʼáadoo baa chʼíhozhníʼání da.—Psalm 146:4; Ecclesiastes 9:5, 6, 10 yííníłtaʼ.
Godʼísh diné daatsaahgo kǫʼ yee atííłʼı̨́? Diyin God Bizaad biiʼdóó áníigo éí daneeznánígíí doo bił éédahózin da, ákondi chʼı̨́įdiitah hodookʼą́ą́ł bee naʼnitinígíí tʼáá bééhózínígo tʼááʼádzaagóó God bee bikʼí hatʼááh. Díí diné kǫʼ bee atéʼílʼı̨́ haʼnínígíí éí God tsʼídá yéigo tʼóó baaʼíh nízin.—Jeremiah 7:31 yííníłtaʼ.
Video Łaʼda Beʼiinaʼ Niitʼihgo, Haash Yitʼįįh? bee naniné.
3. Daneeznánígíísh nihichʼįʼ hadadoodzihgo átʼé?
Daneeznánígíí doo yádaałtiʼ da, dóó doo daʼdidootsʼı̨́įł da. (Psalm 115:17) Ndi God łaʼ bándaalʼaʼí doo yáʼádaashǫ́ǫ́góó ádaʼdiilyaa yę́ę, diné yichʼįʼ yádaałtiʼ łeh, doodaiiʼ diné daneeznánée yedaalʼı̨́įgo ádaʼdilʼı̨́ łeh. (2 Peter 2:4) Daaztsánígíí łaʼ bichʼįʼ hadeesdzih jinízingo, Jiihóvah tsʼídá doo yee hasʼą́ą da.—Deuteronomy 18:10, 11 yííníłtaʼ.
4. Háíshąʼ éí iiná baa nídadidootʼááł?
Ląʼí mííl tsoh ánéelą́ąʼgo diné daneeznánée nahasdzáán bikáajįʼ iiná baa nídadidootʼááł. Azhą́shı̨́ı̨́ tʼáadoo God yéédahoosįįd da ndi, dóó tʼáadoo yáʼátʼééhígíí ádáátʼįįd da ndi nááhodiʼdooljah.—Psalms 37:29; Acts 24:15 yííníłtaʼ.
Náábiʼdiiljééʼígíí éí God tʼááʼaaníigo baa haneʼígíí yídahodoołʼááł dóó Jesus dajoodlą́ągo ííshjání ádajósingo bikʼeh dahojíłʼı̨́į doo. (Revelation 20:11-13) Iiná baa nídadeestʼánígíí yáʼátʼéehgo ádajooníiłgo éí nahasdzáán bikáaʼgi iiná doo ninítʼiʼii baa hoł dahózhǫ́ǫgo bee nídajiʼdooldįįł.—John 5:28, 29 yííníłtaʼ.
5. Nááʼdiijeehígííshą’ haʼátʼíí Jiihóvah átʼéegi yee nanihinitin?
Daneeznánígíí bá chohooʼı̨́į doo biniyé God biYeʼ yiiníłʼaʼgo nihá nináʼádeetʼą́. Áko díí nááʼdiijeehígíí Jiihóvah bibee ayóíʼóʼóʼní dóó bibee ajoobaʼ yee nanihinitin. Daneeznánígíí nináhaskaigo háíshąʼ íiyisíí néiidííłtsééł nínízin?—John 3:16; Romans 6:23 yííníłtaʼ.
