Awééʼ yichíihgo éí amá dóó azhéʼé ayóo yaa bił hózhǫ́ǫ́ łeh ndi ade ábiiłʼįįhgo átʼé. Índa amá doodaiiʼ azhéʼé jileehgo éí awééʼ baa áháyą́ągi ayóó naanish dóó baa chʼééh adidáah lágo yaa ákozhniizįįh. Biniinaa doo hazhóʼó awosh da dóó yínííł bił ndaaztʼiʼ, áko biniinaa ałchʼįʼ hodidoołkʼąąłgo átʼé. Ndi nichʼooní bił awééʼ baa áháyą́ągi dóó ahísółkéegi bidziil doo biniyé hazhóʼó binahohʼá. Diyin Bizaad kótʼéego nínígíí éí díí ayóó naanishígíí haitʼéego yee níká adoolwoł?

DIYIN BIZAAD KÓNÍ: “Ayóóʼóʼóʼníinii éí nízaadgóó haʼólní, áádóó joobaʼ.” Dóó ałdóʼ “doo tʼáá shí tʼéí nízin da, doo nidi báháchįįh da.” (1 Corinthians 13:4, 5) Índa amá jileehgo hweʼawééʼ tʼáá áłahájįʼ hániʼ áyósin łeh. Ndi nahastiin éí shaa hoyosʼnah dínóozįįłgo átʼé, éí bąą díí béénílniih nahastiin ałdóʼ nídį nilı̨́. Awééʼ baa áháyą́ągi nichʼooní shídį ídlı̨́ dóó łahdóó anáshwoʼ doo nízingi, bił haʼíínílníigo dóó baa jiiníbaʼgo bee bíká anánílwoʼ.

“Ahastiin danohłíinii, nihidaʼasdzą́ą́ hazhóʼó baa nitsídaahkeesígíí bikʼehgo bił dahinohná.” (1 Peter 3:7) Neʼasdzą́ą́ éí neʼawééʼ ná yaa áhályą́ągi éí íiyisí binaanish dooígi bá baa ákonínízin. Naanish ániidígíí bee hazlı̨́ı̨́ʼ, áko ade ábóhsin doo, chʼééh nídídááh doo, doodaiiʼ yíníiłda nádleeh doo. Nichʼįʼ dah bá náháchįįh doo, ákótʼéii ndi nátʼą́ą́ʼ ádánáhólchįįh lágo. Háálá “doo hah háháchįįhii éí tʼáá íiyisí akʼizhdiʼyiitįįh.” Neʼasdzą́ą́ bee bichʼįʼ ánáhóótʼiʼígi hazhóʼó bá baa ákonínízingo bíká anánílwoʼ.​—Proverbs 14:29.

DÍÍ BIKʼEH ÁDÍÍNÍÍŁ:

• Azhéʼé danohłíinii: Neʼasdzą́ą́ bíká anánílwoʼgo awééʼ bił baa áhólyą́, tłʼéeʼ ndi. Tʼáá ahą́ą́h neʼasdzą́ą́ dóó neʼawééʼ bá hosíníłʼą́ągo bił honílǫ́, nááná łahjįʼ ádaʼalʼínígíí tʼáá neʼ kwíínísin

• Amá danohłíinii: Awééʼ baa áháyą́ągi nahastiin níká iishyeed nił níigo bíniʼdii níká análwoʼ. Tʼáadoo leʼé doo hazhóʼó íyiiłʼįįhda ndi tʼáadoo kótʼé bidiníní, tʼóó hazhóʼó binááł ííshjání ádíílííł

DIYIN BIZAAD KÓNÍ: “Nizhdiltʼé yę́ę atsʼíís tʼááłáʼí jileeh.” (Genesis 2:24) Azhą́ shı̨́ı̨́ awééʼ hazlı̨́ı̨́ʼ ndi, béénílniih nichʼooní bił tʼahdii “atsʼíís tʼááłáʼí” nohłı̨́. Yéigo binanilnishgo ahísółkéegi hazhóʼó bidziilgo íínísin.

Eʼasdzą́ą́ danohłíinii, nahastiin níká análwoʼgi baa ahééh danohsin. Naa ahééh nisin bidiníigo éí “chánah ánáʼoodlííł” doodaiiʼ náʼáłdziih. (Proverbs 12:18) Ahastiin danohłíinii, neʼasdzą́ą́ ayóóʼánííníshʼní dóó asdzání ílíinii nílı̨́ nábidíʼniih. Nizhónígo hooghangi aa áhályánígíí bee baa hóniih.​—Proverbs 31:10, 28.

“Diné łaʼda tʼáá hó há yáʼátʼéehii tʼéiyá tʼáadoo ádá baa nitsídzíkeesí doo, nidi náánáłaʼ bá yáʼátʼééh dooleełígíí baa nitsídzíkees doo.” (1 Corinthians 10:24) Tʼáá áłahájįʼ yáʼátʼéehígíí nichʼooní bá áánííł. Tʼáá ánóhła hazhóʼó ałchʼįʼ yáłtiʼ, ałhaa hohniih, dóó hazhóʼó ahíísínółtsʼą́ą́ʼ biniyé ałhá náhoołʼaah. Ashtéezhgi tʼáadoo tʼáá ni tʼéí bee ádaa nitsíníkeesí. Nichʼooní ashtéezhgi yídin nilínígi bá baa nitsíníkees. Diyin Bizaad ání: “Tʼáadoo ałchʼįʼ ádaa danohchįʼí . . . bee ahadiʼdoohtʼááł.” (1 Corinthians 7:3-5) Éí bąą díí ashtéezhgi tʼáadoo ałchʼįʼ nanołʼinígóó, hazhóʼó bee ałchʼįʼ yáłtiʼ. Áko ahił haʼíínółní dóó ałhaa ákonohsingo nizhónígo ahísółkée doo.

DÍÍ BIKʼEH ÁDÍÍNÍÍŁ:

• Tʼáá ahą́ą́h ałhá náhoołʼaahgi tʼáadoo baa náyohʼnahí

• Nichʼooní ayóóʼáshidóʼní nízingo tʼáadoo leʼé kóníshéhé ndi bá íníłʼį. Naaltsoos da bichʼįʼ íníłʼį doodaiiʼ achʼįʼ ádaalʼínígíí áłtsʼísígoda łaʼ baa nánídlééh

DIYIN BIZAAD KÓNÍ: “Tʼáá awééʼ nílı̨́ı̨́dę́ę́ʼ Diyin God bizaad bee akʼedaʼashchíinii nił bééhózinígíí bee ahoʼniʼniyąądgo éí . . . bee yisdádíínáałgi yíneelʼą́ągo yínaniniłtin.” (2 Timothy 3:15) Neʼawééʼ bee nidíníítı̨́łígíí bá binahóʼá. Tʼahdoo awééʼ biʼdichííhgóó ayóó átʼéego íhołʼaahgo átʼé. Tʼahdíí átsą́ sitı̨́įgo, neʼawééʼ éí niinééʼ yééhósin dóó níniʼ átʼéegi nabiiłnáago átʼé. Tʼahdii awééʼ yázhí nilı̨́įgo naaltsoos bichʼįʼ yííníłtaʼ. Azhą́ shı̨́ı̨́ bichʼįʼ yííníłtaʼígíí doo yikʼiʼdiyiitįįh da ndi, neeyą́ągo naaltsoos wóltaʼgi ayóó yíneedlı̨́į doo.

Neʼawééʼ éí tʼahdii áłtsʼísígo binááł God baa yáníłtiʼ. Jiihóvah bichʼįʼ sodílzingo bíniʼdii níistsʼą́ą́ʼ. (Deuteronomy 11:19) Bił naninéego, God ádayiilaaígíí bił baa yáníłtiʼ. (Psalm 78:3, 4) Neʼawééʼ nooséełgo t’áá ni Jiihóvah ayóóʼííníʼníigi yaa ákonízin doo, áko bí ałdóʼ Jiihóvah áyóóʼáyóʼníigo yíhwiidoołʼááł.

DÍÍ BIKʼEH ÁDÍÍNÍÍŁ:

• Awééʼ hódząʼ bee nilzéegi íiyisí bíká sodílzin

• Íiyisí yíhwiidoołʼáłígíí bá hááhíłtʼééh áko éí tʼah áłtsʼísídą́ą́ʼ yíhwiidoołʼááł