Timothy tʼah ániid naagháago diné bíká aníjílwoʼígi ayóó baa hoł hózhǫ́ǫ́ ńtʼééʼ. Diné bíká anijílwoʼgo ląʼígóó biniyé tázhdííyá. Áko díí binahjįʼ bibee iiná bóhoneedlı̨́įgo bił nahashzhiizh. Díísh nił bééhodoozįįł nínízin?—

Timothy éí Lístra hoolyéegi biyaa hooʼaʼ. Tʼah ashkii yázhí jílı̨́įgo, hamá sání Lois dóó hamá Yónis, Jiihóvah yee nahoneeztą́ą́ʼ. Timothy jineeyą́ągo, diné éí Jiihóvah bee nadínéeshtı̨́ı̨́ł jinízin ńtʼééʼ.

Timothy tʼahdii ániid naagháago, Paul nahwiilneʼ doo biniyé shił tádidííʼash hodííniid. Áko Timothy ázhdííniid, ‘Íinisin lą́ą!’ Áko diné bíká azhdoolwołgi bízhnéésdlįįd.

Timothy éí Paul yił Masedóniya biiʼ Thesalonáíkagi kin dah shijaaʼjįʼ jiníʼáázh.  Díí éí nízaadgóó jiníʼáázh, áádóó tsinaaʼeeł bee hwił aníʼéél. Díí átʼéego tʼéiyá Thesalonáíka baa honítʼiʼ. Áko áadi jiníʼáazhgo ląʼí diné, Jiihóvah bee nazhneeztą́ą́ʼ. Ákondi łaʼ diné hachʼįʼ bádahóóchįįd, dóó atídahaléehgo yaa nídiikai. Éí biniinaa Paul dóó Timothy łahjįʼgo dah náázhdiitʼáazhgo áadi ninááhojisneʼ.

Díkwíida nínáádeezidgo, Paul éí Timothy Thesalonáíkagóó nátʼą́ą́ʼ nídíídááł yidííniid. Éí danihikʼisóó baa ndiníítaał áadi haitʼéego bił ndahazʼą́. Thesalonáíkagóó tʼóó nááhádzidgi doo nídzíldzidgóó tʼéiyá nátʼą́ą́ʼ nínáázhdoodááł! Ákótʼéii ndi Timothy ákǫ́ǫ́ nátʼą́ą́ʼ níjídzá, hakʼis baa hániʼgo biniinaa. Áko áádę́ę́ʼ níjídzáago haneʼ baa hózhǫ́ǫgo Paul bee bił hojoolneʼ. Danihikʼisóó Thesalonáíkadi nizhónígo bił ndahazʼą́ą́ lá!

Timothy éí Paul yił naalnishgo ląʼí nááhai. Timothy aláahgo baa jííníshłı̨́ jiníigo Paul łah akʼeʼjishchı̨́. Éí áłah nídaʼadleehígíí bíká anijílwoʼ biniyé ałnáájíłʼaah ńtʼééʼ. Timothy éí Jiihóvah dóó diné ayóíʼájóʼní.

Niísh éí diné ayóíʼííníʼníigo Jiihóvah yídahwiidoołʼáałgi bíká adíílwoł nínízin?— Ákwíí nidzaago éí Timothy nahalingo ni ałdóʼ neʼiiná bóhoneedlı̨́įgo baa nił hózhǫ́ǫ doo!