TʼÁÁSH AANÍÍ NÁÁSGÓÓ ÁDÍÍNÍŁÍGÍÍ BEE NÓHÓLNÍÍH? Łaʼ bílaʼashdlaʼii fate doodaiiʼ God éí tʼáá íídą́ą́ʼ kóhodoonííł níigo hanáhoníʼą́ daaníigo deeyoodlą́. Doo tʼáá hó íizhnízinígíí bikʼehgo hijiináa da. Tʼáá alą́ąjįʼ ádá nahatʼáhígíí doo bá bíighah silı̨́ı̨́ʼ dago biniinaa áchʼą́ą́h yádaałtiʼ łeh. “Doo tʼáá ákónéehgo ádooníił da!” daaní.

Áchʼįʼ nahwiiʼná dóó doo ákótʼéégóó nihił hoogáłígíí dooda yooʼı̨́į da, doo bá chʼíhonítʼiʼ da łeh éí baa nináádahałkaʼ. Beʼiinaʼ chʼééh yáʼátʼééh ádeilééh—áko anaaʼí tʼéiyá ádeitʼı̨́, atéʼélʼı̨́ dóó nitsihodindiłgo áádóó ąąh dah hazʼą́ nidahaʼá yę́ę bitsʼą́ą́ʼ nidahachxǫǫh. “Haʼátʼíí biniyé nidahwiitʼá?” daaní.

Tʼáá aaníí niheʼiinaʼ yiiltʼihígíí tʼáá átʼé doo bee nóhólníih da. (Ecclesiastes 9:11) Náásgóó neʼiinaʼ áhodooníłígíí éí tʼáá ní nóhólnííh. Náásgóó niheʼiinaʼ tʼáá nihí bee nóhólníihgo Diyin Bizaad nihichʼįʼ ííshjání áyiilaa. Díí baa nitsíníkees.

Mózes éí ałkʼidą́ą́ʼ Ízrel dineʼé álą́ąjįʼ yá sizı̨́ jílı̨́į ńtʼééʼ. Ízrel diné éí kéyah ayóó áhonóolingo God yee haadzííʼ yę́ę kʼadę́ę biiʼ jíkáahgo Mózes bidineʼé áyidííniid: “Nihidáahgi iiná áádóó aniné, akʼihojidlíii áádóó hóyéeʼgo á haʼiidziihii hólǫ́ǫgo áshłaa; éí bąą iiná nidadinohʼaah, áko nihí índa nihaʼáłchíní náás ahoolchíiłii bił dahinohnáa doo, áádóó Bóhólníihii [Jiihóvah] nihiDiyin God ayóóʼádeínóhʼníi doo áádóó áníinii bikʼeh dahonołʼı̨́į doo índa bąąh dah shoojéeʼ doo.”​—Deuteronomy 30:15, 19, 20.

“Nihidáahgi iiná áádóó aniné, akʼihojidlíii áádóó hóyéeʼgo á haʼiidziihii hólǫ́ǫgo áshłaa; éí bąą iiná nidadinohʼaah.”—Deuteronomy 30:19

Ízrel dineʼé Ííjip binaalteʼ dajílı̨́įgo éí God bitsʼą́ąjįʼ chʼíhoníʼeezh. Kéyah bee ádee haʼoodzííʼ yę́ę biiʼ kéédahojitʼı̨́į doo baa hoł dahózhǫ́. Tʼáá ájíłtso ádazhdooníłígíí éí bee akʼihojidlíii doo. “Iiná nidadinohʼaah.” Haitʼéego? ‘God ayóóʼádajóʼníi doo, áádóó bikʼeh dahojíłʼı̨́, índa yéigo bąąh daa jizhjéeʼ doo.’

Dííshjı̨́įdi, nihí ałdóʼ tʼáá ákódeiitʼı̨́į doo. Tʼáá ákótʼéego íʼiilʼı̨́įgo náásgóó hózhǫ́ǫgo yiidáał doo. God ayóóʼííníʼníigo, dóó bikʼeh honíłʼı̨́įgo, dóó yéigo bąąh daa jiztı̨́įgo éí iiná yáʼátʼéehii nídidíílééł—nahasdzáán ayóó ánoolingo bikááʼ iiná doo ninítʼiʼii. Éí haitʼéego ázhdoolíiłgo áhyiłní?

God bee ayóóʼóʼóʼní tʼáá ałtsoní yee áánííł. Yilʼaadii John éí níłchʼi diyinii bił hólǫ́ǫgo yikʼeʼashchı̨́, “God ayóóʼóʼóʼníinii nilı̨́.” (1 John 4:8) God bidineʼé ábiʼdooʼniid: “Éí bąą Bóhólníihii [Jiihóvah] nihiDiyin God ayóóʼádeínóhʼní; éí yichʼįʼ nihííłʼaadii áádóó yee nihwiizʼáanii áádóó yee nihodiiʼaahii índa bibikʼeh óʼooʼníiłii tʼáá áłahjįʼ bikʼeh dahonołʼı̨́.” (Deuteronomy 11:1) Doo ákónééh danihidiʼníi da ndi, God doo bikʼeh nihił yeeʼ da ákondi bikʼeh dahwiiniilʼı̨́. God tʼáá kʼé dabiʼdiiʼníigo daniidzin. Haʼátʼíísh biniyé?

Jiihóvah bílaʼashdlaʼii ayóóʼáyóʼníinii éí azhéʼé dóó amá baʼáłchíní ayóóʼóʼóʼnínígíí nahalin. Azhą́ shı̨́ı̨́ nidaʼiisííh ndi azhéʼé dóó amá baʼáłchíní nideinitin, haʼahóní, yee yíká anídaalwoʼ, dóó hakʼeh dahółʼı̨́. Áko yáʼátʼéehgo dóó bił dahózhǫ́ǫgo beʼiinaʼ ádeidoolííł. Azhéʼé dóó amá baʼáłchíní haʼátʼíísh nátʼą́ą́ʼ yá deinízin? Ayóóʼádabóʼníigo dooleełígíí deinízin. Áádóó yichʼįʼ yádaałtiʼgo hazhóʼó dabíistsʼą́ą́ʼ dóó bikʼeh dahółʼı̨́. Tʼáá ákótʼéego, nihizhéʼé yáʼąąshii  hólóonii, tʼáá ałtso nihá ííłʼínígíí baa ahééh daniidzingo nihá yinízin.

Diyin Bizaad biiʼ saad “yíísíníłtsʼą́ą́ʼ” dóó “bikʼeh honíłʼı̨́” éí ahídéétʼiʼ. Áko awééʼ ábidiiʼníigo, “Nizhéʼé dóó nimá yíísíníłtsʼą́ą́ʼ” éí tʼáá ákótʼéego azhéʼé dóó amá bikʼeh honíłʼı̨́ bí jiní. Ákótʼéego, God bizaad deisíníiltsʼą́ą́ʼ éí bitsʼą́ą́dóó bídahwiilʼą́ą́ʼ dóó bikʼeh dahwiiniilʼı̨́. Azhą́ shı̨́ı̨́ doo biinééʼ dadiitsʼaʼ da ndi Diyin Bizaad deiyíníiltaʼ dóó bikʼeh dahwiiniilʼı̨́ ákótʼéego éí deisíníiltsʼą́ą́ʼ.​—1 John 5:3.

Jesus nihił ííshjání íʼiilaaígíí God bizaad éí aláahgo daʼíísínółtsʼą́ą́ʼ ní: “Diné doo bááh tʼéí yee hináa da doo, nidi saad tʼáá ałtso Diyin God [Jiihóvah] yee hahadziihii yee hináa doo.” (Matthew 4:4) God bitsʼą́ą́dóó íhooʼaahígíí aláahdi ádeiyíníilzingo éí chʼiyáán biláahdi átʼéego bídin daniidlı̨́. Haʼátʼíí biniinaa? Hóyáanii Naatʼáanii Sálaman kóní: “Háálá béeso áchʼą́ą́h naalyéhígi átʼéego hódzą́ ałdóʼ áchʼą́ą́h naalyéii átʼé, nidi ił ééhózin aláahgo yáʼátʼéehii éí hódzą́ bee dahólóonii yee dahiná.” (Ecclesiastes 7:12) Ił ééhózin dóó hódzą́ éí God bitsʼą́ą́dę́ę́ʼ, dííshjı̨́įdi nihíká análwoʼ dóó náásgóó baa hózhǫ́ hoolʼáágóó iiná baa diidááł.

Jesus yaa chʼíhoníʼánę́ę haneʼ bee akʼiʼdidootı̨́įłii baa nitsíníkees: “Iináajįʼ áhoołtsʼóózígo yah ahóótʼiʼ áádóó áhoołtsʼóózígo bichʼįʼ honítʼiʼ, áko tʼáá díkwíí éí yikʼídahakááh.” (Matthew 7:13, 14) Díí bikááʼ oodááł nanitłʼago atiin. Áko łaʼ atiin bił bééhózinígíí nihilą́ąjįʼ yigáałgo bikééʼ yiidáałgo éí díníyáajįʼ nił ní dooʼaash—hoolʼáágóó hinínáa doo. God áhání ííníilzingo nihił bééhózin doo éí bikʼiʼdidíítı̨́ı̨́ł. (Psalm 16:8) Haitʼéego ádiilnííł?

Tʼáá ákwii jı̨́ tʼóó ahayóí ádaʼiilʼínígíí nihee hólǫ́ dóó ląʼí ádaʼdiilníłígíí daniidzin. Ákódaatʼéhígíí bindeiilnish doodaiiʼ diyin bikʼehgo oodááł doo baa nitsídeikees da God nihaa íinízinígíí biʼoh nídiniidleeh. Éí biniinaa Diyin Bizaad yéénihiyiiłnííh: “Éí bąą ádaa ádahołyą́ągo hazhóʼó dayínóhkááh, diné doo dahóyáaniigi átʼéego éí dooda, nidi dahonohsą́ągo dayínóhkááh. Nihá ashjaʼósinígíí tsʼídá hazhóʼó chodaołʼı̨́, háálá doo yáʼátʼééhgóó adeesdeeʼ.” (Ephesians 5:15, 16) God áhánígo bił kʼé daa ahidohʼní éí alą́ąjįʼ ádeiyíníilzin doo.—Matthew 6:33.

Áłtséédą́ą́ʼ íínítʼįįd yę́ę doo hashtʼée díídlı̨́įł da. Náásgóó yáʼátʼéehgo niheʼiinaʼ dooleeł áádóó ayóóʼádeíníiʼnínígíí ałdóʼ. Ánihiilaaígíí Jiihóvah ayóóʼánihóʼníigo Diyin Bizaad yee nichʼįʼ ííshjání áyiilaa. Nihá yinízinígíí nihił bééhodoozįįłgo áyiilaa. Halneʼii Máíkah saad yee haadzííʼ baa nitsíníkees:

“Diné nílíinii, yáʼátʼéehii nichʼįʼ yitʼíní ályaa, áko Bóhólníihii [Jiihóvah] éí haa nítʼée doo, nóʼní: Éí tʼáá ákogi ááníił doo áádóó ajoobaʼ ayóóʼííníʼníi doo índa aʼohgo ánítʼéego niDiyin God bił yíʼash doo.”​—Micah 6:8.

Jiihóvah wóshdę́ę́ʼ shił yiʼash niłníigo dóó hoolʼáágóó nikʼihojidlíi doo, nídidíílééł daatsʼí? Éí tʼáá ní bee nóhólnííh!