Awééʼ tʼóó yichíhígo éí tʼáadoo ahééʼiilkeedí bimá yitsʼą́ądi bitsʼíís yidínóoldı̨́įłgi yéigo baa hástı̨́. Haʼátʼíí biniinaa kótʼée łeh? Jó, asdzání ałchíihgo beʼawééʼ ádíyóltąʼgo éí yáʼátʼéehgo nooséełgo biyaa hwiidooʼaał. *

Amá haʼátʼíí bidiiłnáahgo beʼawééʼ índa yizhchínígíí yeistiʼgo yaa áhályą́ą łeh? Naaltsoos The Journal of Perinatal Education biyiʼ Professor Jeannette Crenshaw ání, hormone oxytocin wolyéego de kótʼįįhgo “asdzání ałchíihgo bitsʼíís yidilnish. Áádóó amá silı̨́įʼii beʼawééʼ ayóóʼáyóʼníigo yinéłʼı̨́įgo yiʼiiłtʼoʼ doo.” Náánáłaʼ hormone ałdóʼ bitsʼíís bitahgóó haleehgo “amá éí beʼawééʼ yídin nilíinii yaa ákoniizįįh” éí ádíyóltąʼgo yaa nídiidááh. Díí haʼátʼíí biniyé nihił bééhózin doo?

Amá silı̨́įʼii dóó beʼawééʼ ahánígo ahídínóoldı̨́įłgi éí Jiihóvah Ánihiilaii kótʼéego ánihiilaa. * Naatʼáanii David biʼdizhchı̨́įgi God yee yaa haniihgo ání, “iishchʼid biyiʼdę́ę́ʼ hashííníłtı̨́,” áádóó bimá dah bołtéełgo bił hasih. Kótʼéego sozdoolzin: “Tʼáá shiʼdizhchı̨́ı̨́dę́ę́ʼ naa shiʼdeetʼą́; tʼáá shimá shishchı̨́ı̨́dę́ę́ʼ shiDiyin God nílı̨́.”—Psalm 22:​9, 10.

BAA NITSÍNÍKEES: God éí amá beʼawééʼ ayóóʼáyóʼníigo yaa áhályą́ą doogo áyiilaa. Áko “Diyin God baʼáłchíní daniidlı̨́įgo,” nihíísh ałdóʼ ákótʼéego nihaa áhályą́ągo doo?—Acts 17:29.

God áhánígo yee hósinii Jesus Christ kóníigo díí yee naʼneeztą́ą́ʼ: “Daʼ tsídiiłbáhíísh naakigo doo tʼááłáʼí sindáo bą́ą́h ílı̨́įgo nahaniih da? Ákondi nihiTaaʼ doo íinízingóó tʼááłáʼí nidi doo łaʼ niʼjįʼ nidootłish da. Jó nihitsiiʼ tʼááłáʼí níláhígo nidi ałtso dayééltaʼ. Éí bąą tʼáadoo nídaałdzidí; tsídiiłbáhí tʼóó ahayóí nidi biláahgo daʼnohłı̨́.”—Matthew 10:​29-31.

Tsídii tʼáá kóníshéhíjįʼ doo baa ádahwiilchįįh da, éí łaʼ niʼjįʼ naatłishgo ałdóʼ tʼáá ákótʼé. Ndi Nihizhéʼé éí tʼááłáʼí nítínígo yaa ákonízin! Azhą́ shı̨́ı̨́ tsídii ląʼí ndi, nihí éí aláahdi ániidlı̨́įgo nihaa nitsékees. Bíhwiidooʼáłígíí bééhóziní: Éí “tʼáadoo nídaałdzidí,” háálá God naa ákonízingo átʼé. Áko God doo shaa áhálchįįh da tʼáadoo danohsiní!

 Diyin Bizaad bee hasihii

• Jiihóvah “éí tʼáadoo bíniiʼohígóó doo yáʼáshóonii áádóó yáʼátʼéehii haisííd.”—PROVERBS 15:3.

• “Tʼáá ákogi ádajítʼéii Bóhólníihii [Jiihóvah] hakʼi déezʼı̨́ı̨́ʼ, índa bichʼįʼ sodazdilzingo hwíistsʼą́ą́ʼ.”—PSALM 34:15.

• “Aa aʼááh nínízingi baa shił nihoozhǫǫh doo, háálá bikʼee tiʼhooshʼníihii yiniłtsą́ągo bee shichʼįʼ nahwiiʼnáanii nił bééhózin.”—PSALM 31:​7, New World Translation.

God ayóóʼánihóʼníigo nihikʼi déezʼı̨́įʼgo nihił bééhózingo niheʼiinaʼísh yáʼátʼéeh doo? Aooʼ. Hannah, * Englandę́ę́ʼ naagháago ádaa halneʼ:

“Sheʼoodląʼ daatsʼí tʼáá biʼoh nisingo biniinaa doo jółtaʼ ánéelą́ąʼdi Jiihóvah doo ayóóʼáshóʼníi da, índa shisodizin doo yiyíistsʼą́ąʼ da nisin ńtʼééʼ. Doo anishłı̨́į dago biniinaa daatsʼí ashíʼdilʼı̨́ doodaiiʼ tʼóó shiláahgo adéestʼı̨́ı̨́ʼ nisin? God doo joobaʼ da lá niizı̨́ı̨́ʼ.”

Kʼad Hannah éí Jiihóvah ayóóʼábóʼníigi doo bił naaki nilı̨́į da. Haʼátʼíí biniinaa kótʼéego tsízdeezkééz? “Tʼáá hodíínaʼ hashtʼeʼnitsínáníkééz,” jiní. “Ląʼí nááhai yę́ędą́ą́ʼ Diyin Bizaad łaʼ shinááł baa hóoneʼ, éí Jesus nihá nináʼádeetʼą́ągi, díí tʼáá íiyisíí shijéí yidiisnááʼ. Áko Jiihóvah tʼáá aaníí ayóóʼáshóʼníigo átʼéegi baa ákoniizı̨́ı̨́ʼ. Shisodizin shá yidiitsʼįįhgo cha nániisdzįįh, háálá Jiihóvah ayóóʼáshóʼníigo átʼéé lá. Diyin Bizaad yíníshtaʼgo áádóó oodlání áłah nádleehgóó naasháago éí Jiihóvah tʼáá yíní átʼéii bééhosésįįd. Jiihóvah éí nihikééʼ sizı̨́, ayóóʼánihóʼní áádóó tʼááłáʼí niitínígo nihikʼi díníshʼı̨́įʼ doo nízingo baa ákoniizı̨́ı̨́ʼ.”

Hannah ánínígíí bee haʼahóní. Nitsíníkeesgi éí God bił bééhózin índa yénálniihgo átʼéegi haitʼéego éí tʼáá aaníigo átʼé? Díí naʼídíkid díí bikéédóó hazhóʼó dadíníilʼįįł.