Kalata Yoyamba ya Yohane 1:1-10
1 Tikukulemberani zokhudza amene analipo kuyambira pachiyambi, yemwe amabweretsa mawu opatsa moyo,+ amene tinamumva ndiponso kumuona ndi maso athu, amene tamuyangʼanitsitsa mwachidwi komanso kumukhudza ndi manja athu.
2 (Ife taona ndipo tikuchitira umboni+ ndi kukuuzani za moyo wosatha+ umene unachokera kwa Atate ndipo unaonetsedwa kwa ife.)
3 Zimene taziona komanso kuzimva, tikukuuzani+ kuti inunso mugwirizane nafe. Ndipotu ndife ogwirizana ndi Atate ndiponso Mwana wake Yesu Khristu.+
4 Choncho tikulemba zimenezi kuti tikhale osangalala kwambiri.
5 Ife tamva uthenga kuchokera kwa iye ndipo tikuulengeza kwa inu. Uthenga wake ndi wakuti, Mulungu ndiye kuwala+ ndipo kwa iye kulibe mdima ngakhale pangʼono.
6 Ngati tikunena kuti, “Ndife ogwirizana naye,” koma tikupitiriza kuyenda mumdima, ndiye kuti tikunama ndipo sitikuchita zinthu mogwirizana ndi choonadi.+
7 Komatu ngati tikuyenda mʼkuwala mofanana ndi mmenenso iye alili mʼkuwala, ndiye kuti ndife ogwirizana ndipo magazi a Yesu, yemwe ndi Mwana wake, akutiyeretsa ku machimo onse.+
8 Tikamanena kuti, “Tilibe uchimo,” ndiye kuti tikudzinamiza+ ndipo mumtima mwathu mulibe choonadi.
9 Mulungu ndi wokhulupirika ndiponso wolungama, choncho tikavomereza machimo athu, adzatikhululukira komanso kutiyeretsa ku ntchito zonse zoipa.+
10 Tikamanena kuti, “Sitinachimwe,” zili ngati tikunena kuti Mulungu ndi wabodza, ndipo mumtima mwathu mulibe mawu ake.
