28 JUNE 2024
RUSSIA

Alongo Atatu Apezedwa ndi Mlandu ku Republic of Kalmykia, ku Russia

YAMBANI

Pa 24 June 2024, khoti lamumzinda wa Elista ku Republic of Kalmykia linapeza kuti Mlongo Tsagan Khalgaeva, Mlongo Yekaterina Menkova ndiponso Mlongo Kishta Tutinova ndi olakwa. Mlongo Khalgaeva komanso Mlongo Menkova anagamulidwa kuti kwa zaka ziwiri azitsatira malamulo enaake ali panyumba. Mlongo Tutinova anagamulidwa kuti azitsatira malamulo enaake ali panyumba kwa zaka zitatu. Alongowa sakufunika kupita kundende panopa.

Zokhudza Mlongoyu

Tsagan Khalgaeva

Chaka chobadwa: 1978 (ku Lagan, ku Republic of Kalmykia)

Mbiri yake: Ankagwira ntchito yosoka

Ankafufuza mayankho a mafunso omwe anali nawo m’zipembedzo zosiyanasiyana. Anayamba kuphunzira Baibulo ndi a Mboni za Yehova ndipo anapeza mayankho odalirika m’Baibulo

Anabatizidwa mu 2004

Zimene Ananena

Ndi zinthu ziti zimene mwakhala mukuziyamikira kwambiri pa nthawi yovutayi?

Ndimayamikira abale ndi alongo anga akamandipempherera. Nthawi zina ndikafooka, ndimangolirira Yehova popemphera chifukwa ndimasowa zoti ndimuuze. Komabe ndimadziwa kuti enanso akundipempherera ndipo ndimaona mmene Yehova akuyankhira mapemphero amenewo. Zimenezi zimandilimbikitsa kuti nanenso ndizipempherera ena omwe akukumana ndi mavuto. Ndimatonthozedwa podziwa kuti timathandizana chonchi, ndipo zimenezi zimandikumbutsa kuti sindili ndekha.

Yekaterina Menkova

Chaka chobadwa: 1982 (ku Tavn-Gashun ku Republic of Kalmykia)

Mbiri yake: Ankagwira ntchito kulaboletale

Anakwatiwa mu 2009. Ali ndi mwana mmodzi wamwamuna

Anachita chidwi ataona kuti a Mboni za Yehova amatsatira mfundo za m’Baibulo komanso kuti mfundozi zimawathandiza kwambiri. Anabatizidwa mu 2017

Zimene Ananena

Kodi ndi mavesi ati a m’Baibulo amene akuthandizani kuti muzidalira kwambiri Yehova?

Mawu a pa Salimo 8:3, 4 amandilimbikitsa kwambiri. Lembali limati: “Ndikayangʼana kumwamba, ntchito ya zala zanu, mwezi ndi nyenyezi zimene munapanga, ndimaganiza kuti, munthu ndi ndani kuti muzimuganizira, ndipo mwana wa munthu ndi ndani kuti muzimusamalira?” Apa Baibulo likuti Yehova analenga zinthu zambirimbiri zomwe zili m’chilengedwechi pongogwiritsa ntchito zala zake basi. Kuganizira zimenezi kumanditsimikizira kuti Yehova adzandithandiza ndi mphamvu zake zambiri ndipo sindiyenera kuopa chilichonse.

Kishta Tutinova

Chaka chobadwa:1961 (ku Novolesnoy m’chigawo cha Astrakhan)

Mbiri yake: Ankagwira ntchito yosoka. Analera yekha ana ake awiri aamuna

Anabadwira m’banja la chipembedzo cha Chibuda. Kasitomala wake yemwe anali wa Mboni za Yehova anamuthandiza kuphunzira Baibulo. Kishta anasangalala ataphunzira mmene angalambirire Mulungu popanda kutsatira miyambo ya makolo komanso kukhulupirira mizimu. Anabatizidwa mu 2003

Zimene Ananena

N’chiyani chakuthandizani kuti mupitirize kukhala wosangalala?

Ndili pa ukaidi wosachoka panyumba, ndinkafunika kumakhala m’nyumba kwa miyezi yoposa 4. Zimenezi zinali zovuta kwambiri chifukwa pa nthawiyo ndinkakhala m’nyumba yachipinda chimodzi limodzi ndi mwana wanga wamwamuna komanso banja lake. Tinkakhalamo anthu 7. Kukhala pamalo aang’ono chonchi komanso kusachoka panyumba kunakhudza kwambiri thanzi langa. Koma kuganizira lemba la Miyambo 24:10 kunandithandiza. Lembali limati: “Ukafooka pa nthawi imene ukukumana ndi mavuto, mphamvu zako zidzachepa.” Ndinazindikira kuti ndinkafunika kusankha pakati pa kumangoganizira zokhumudwitsa, kapena kumaganizira zinthu zabwino zimene ndinali nazo. Ndinakumbukira chitsanzo cha Yosefe. Pamene anali m’ndende, sanalole kuti zochitika pa moyo wake zimuchititse kukhala wokwiya. Choncho ndinasankha kuti ndiziganizira zinthu zabwino zomwe ndinali nazo, ndipo ndinapitiriza kukhala wosangalala.

Timayamikira alongowa omwe ndi chitsanzo chabwino cha masiku ano pa nkhani yosonyeza chikhulupiriro. Timayamikiranso Yehova chifukwa amaona mayesero onse omwe timakumana nawo ndipo adzatidalitsa chifukwa chokhala okhulupirika.—Salimo 37:18.

Nthawi Komanso Zimene Zinachitika

16 February 2023

Kishta anamutsegulira mlandu
28 February 2023

Nyumba zawo zinafufuzidwa. Kishta anatumizidwa kumalo omwe ankayembekezera kuzengedwa mlandu
1 March 2023

Tsagan anachotsedwa ntchito chifukwa ankaimbidwa mlandu woti ndi chigawenga. Kishta anatulitsidwa kumalo komwe ankamusunga poyembekezera mlandu wake ndipo anamuika pa ukaidi wosachoka panyumba
21 July 2023

Kishta anamasulidwa pa ukaidi wosachoka panyumba
19 December 2023

Yekaterina ndi Tsagan anawatsegulira mlandu. Onsewa anauzidwa kuti asamayende m’madera ena
9 February 2024

Kishta anauzidwa kuti asamayende m’madera ena
1 April 2024

Mlandu unayamba kuzengedwa
24 June 2024

Anapezedwa olakwa ndipo anagamulidwa kuti azitsatira malamulo enaake ali panyumba

Onaninso

NKHANI

Anamangidwa Chifukwa Chotsatira Zimene Amakhulupirira ku Russia

Oimira gulu lina la zachitetezo la FSB anamanga a Dennis Christensen chifukwa chotenga nawo mbali pa msonkhano wa Mboni za Yehova womwe unkachitika mwamtendere mumzinda wa Oryol ku Russia.

NKHANI