Asayansi akhala akuchita chidwi ndi kanyama kena kam’madzi kotchedwa Barnacle kamene kamamatirira kwambiri pamiyala, madoko ngakhalenso pasitima zam’madzi. Anthu amanena kuti guluu wa kanyamaka amamata mwamphamvu kwambiri kuposa guluu aliyense wopangidwa ndi anthu. Posachedwapa, asayansi atulukira zimene zimathandiza kuti guluuyu azimata kwambiri.

 Taganizirani izi: Asayansi atulukira kuti kanyamaka kamayamba kafufuza malo abwino amene kangakhalepo. Kakawapeza, kamatulutsa timadzi tamitundu iwiri. Toyamba timakhala tamafuta ndipo timathandiza kuchotsa madzi pamalopo komanso kuti timadzi tachiwiri timate bwinobwino. Timadzi tachiwiriti timakhala tamapulotini.

 Timadzi tamitundu iwiriti tikasakanikirana timapanga guluu wamphamvu kwambiri moti ngakhale mabakiteriya sangamuwononge. Guluu wamphamvuyu amathandiza kwambiri kanyamaka kuti kasachoke pamalowo kwa moyo wake wonse.

 Luso lopanga guluu ameneyu ndi lovuta kwambiri kuposa mmene asayansi ankaganizira poyamba. Mmodzi mwa anthu amene anatulukira zimenezi anati: “Luso lopezeka m’chilengedweli, lothandiza kumata zinthu pamalo amene pali madzi, ndi lapadera kwambiri.” Zimene asayansi apezazi zikhoza kuwathandiza kupanga guluu amene angagwiritsidwe ntchito m’madzi, pazipangizo zamakono komanso m’thupi.

 Kodi inuyo mukuganiza bwanji? Kodi zinangochitika zokha kuti kanyamaka kazipanga guluu wamphamvu chonchi? Kapena kanyamaka kanachita kulengedwa?