Kuyambila pamene anthu analengedwa, Mlengi wathu anali kukamba na anthu kupitila mwa angelo komanso aneneli. Kuwonjezela apo, iye anasankha kuti uthenga wake na madalitso amene analonjeza alembedwe. Malonjezo a Mulungu amenewa amakhudza tsogolo lanu. Nanga malonjezo amenewa mungawapeze kuti masiku ano?

Uthenga wa Mulungu kwa ife umapezeka m’Malemba Oyela (2 Timoteyo 3:16) Kodi Mulungu anawaseŵenzetsa bwanji aneneli kulemba uthenga wake? (2 Petulo 1:21) Mulungu anaika maganizo ake mwa olembawo, ndipo iwo analembadi zimenezo. N’zofanananso masiku ano. Tiyelekeze kuti bwana pakampani wauza kalembela wake kuti alembe kalata. Tidziŵa kuti bwanayo ndiye mwini wake wa kalatayo osati kalembela. Mofananamo, ngakhale kuti Mulungu anaseŵenzetsa anthu kulemba uthenga wake, iye ndiye mwini wake wa Malemba Opatulika.

Uthenga wa Mulungu ni wofunika kwambili cakuti afuna anthu onse aziuŵelenga na kuumvetsetsa. Masiku ano “uthenga wabwino wosatha” umapezeka “kudziko lililonse, fuko lililonse, [komanso] cinenelo ciliconse.” (Chivumbulutso 14:6) Na dalitso la Mulungu, Malemba Opatulika, onse kapena mbali yake, amapezeka mu vitundu vopitilila 3,000. Ndipo Malembawa anamasulidwa mu vitundu vambili kuposa buku lina lililonse padziko lonse.