Oine amatsiko aha biro by’omumaisho? Abantu baingi nibateeraho kuguma baine emiteekateekyere mirungi n’obu haraabe hariho oburemeezi bw’amaani hati. Kwonka shi buzima nitubaasa kuteekateeka ngu embeera niziija kuba nungi? Eego! Baibuli neetuha amatsiko agaabuzima aga nyentsya nungi.

•  Baibuli neeha matsiko ki?

•  Amatsiko agu Baibuli erikutuha shi ti g’oburyo?

•  Amatsiko aga nigaija kuhikiirira gata?

•  Amatsiko aga nigaija kuhikiirira ryari?

•  Amatsiko agu Baibuli erikutuha nigabaasa kutuhwera gata hati?

 Baibuli neeyoreka ngu abantu baine oburemeezi bwingi. Kwonka, neeraganisa ngu oburemeezi obu bwona tiburikwija kuguma nibututeganisa ebiro byona. Yetegyereze eby’okureeberaho ebimwe.

•  Oburemeezi: Okuburwa oburaaro

   Eki Baibuli erikugamba: ‘Nibaija kwombeka amaju, bagatuuremu.’—Isaaya 65:21.

   Eki kirikumanyisa aha biro by’omumaisho: Abantu nibaija kugira amaju agaabo.

•   Oburemeezi: Eibura ry’Emirimo n’Obworo

   Eki Baibuli erikugamba: ‘Abatoorainwe bangye nibaija kumara omwanya muhango nibasherererwa ebi emikono yaabo ekozire.’—Isaaya 65:22.

   Eki kirikumanyisa aha biro by’omumaisho: Abantu boona nibaija kuba baine emirimo erikureeta okumarwa, erikushemeza, kandi erikurugamu ebirungi.

•   Oburemeezi: Obutari Buringaaniza

   Eki Baibuli erikugamba: ‘Abanyiginya nibaija kutegyekyera omu [buringaaniza].’—Isaaya 32:1.

   Eki kirikumanyisa aha biro by’omumaisho: Obutari buringaaniza omu rangi, entuura y’abantu, n’omu ntaatsya nibaija kwihirwaho kimwe. Buri omwe naija kutwarizibwa omu buringaaniza.

•   Oburemeezi: Okukuuhura n’Enjara

   Eki Baibuli erikugamba: ‘Nihaija kubaho omweru mwingi omu nsi, n’omu bibungo.’—Zaaburi 72:16.

   Eki kirikumanyisa aha biro by’omumaisho: Buri omwe naija kuba aine eby’okurya bingi kandi eby’ekiriisa. Tihaine orikwija kuba naabyama n’enjara nari kukuuhura.

•   Oburemeezi: Emishango n’Obushaarizi

   Eki Baibuli erikugamba: ‘Buri muntu naija kushutama ahansi y’omuzaabibu gwe n’ahansi y’omutiini gwe, kandi tihaine orikwija kubakangisa.’—Miika 4:4.

   Eki kirikumanyisa aha biro by’omumaisho: Buri omwe naija kuba aine oburinzi ahakuba abantu ababi nibaija kuba batakiriho, kandi ‘abahikiriire nibaija kuhungura ensi.’—Zaaburi 37:10, 29.

•   Oburemeezi: Entaro

   Eki Baibuli erikugamba: ‘Eihanga tiririkwija kubangira erindi rurara, kandi tibarikwija kugaruka kwega eby’engamba.’—Isaaya 2:4.

   Eki kirikumanyisa aha biro by’omumaisho: Nihaija kubaho obusingye omu nsi yoona. (Zaaburi 72:7) Tihaine orikwija kugaruka kucurira omukundwa we oitiirwe omu rutaro nari kusherura obuhungiro arikuhunga orutaro.

•   Oburemeezi: Endwara

   Eki Baibuli erikugamba: ‘Tihaine mutuuzi waayo orikwija kugira ati: Ndwaire.’—Isaaya 33:24.

   Eki kirikumanyisa aha biro by’omumaisho: Abantu tibarikwija kugaruka kugira obumuga nari kurwara. (Isaaya 35:5, 6) Nangwa Baibuli neeraganisa ngu ‘n’okufa tikwirikwija kugaruka kubaho.’—Okushuuruurwa 21:4.

•   Oburemeezi: Okushiisha Obuhangwa

   Eki Baibuli erikugamba: ‘Eihamba n’ensi eyomire nibiija kushemererwa, n’eihamba ry’omusheenyi niriija kushemererwa, kandi rirabye ebirabyo.’—Isaaya 35:1.

   Eki kirikumanyisa aha biro by’omumaisho: Ensi yoona neija kuba paradiso y’okutuurwamu abantu, nk’oku Ruhanga yaabaire agyendereire omu kubanza.—Okutandika 2:15; Isaaya 45:18.

 Buzima noobaasa kuteekateeka otyo. Kwonka, nitukuhiga kwongyera kushwijuma eki Baibuli erikugamba aha biro by’omumaisho. Ahabw’enki? Ebiraganiso bya Baibuli nibitaana aha kuteebereza kw’abantu. Ebiraganiso bya Baibuli nibiruga ahari Ruhanga. Ahaifo hariho enshonga ahabw’enki hariho entaaniso mpango:

•   Ruhanga naayesigwa. Baibuli neegira ngu Ruhanga ‘tarikubaasa kubeiha.’ (Tito 1:2) Kandi, Ruhanga wenka niwe aine okubaasa kw’okugamba ebitakabaireho. (Isaaya 46:10) Baibuli erimu eby’okureeberaho bingi ebirikuhamya ngu ebi Ruhanga arikugamba nibihikiirira. Okumanya ebirikukiraho, reeba vidiyo Nitubaasa Kuhamya Tuta ngu Baibuli Ehikire?

•   Ruhanga aine amaani g’okugonjoora oburemeezi bwaitu. Baibuli neegira ngu Ruhanga aine amaani g’okukora ‘buri kimwe eki arikukunda.’ (Zaaburi 135:5, 6) Ekirikumanyisa ngu tihaine ekirikubaasa kumuremesa kuhikiiriza ebiraganiso bye. Kandi, Ruhanga naaba naayenda kutuhwera ahakuba naatukunda.—Yohaana 3:16.

 Kwonka noobaasa kwebuuza oti: ‘Ruhanga ku araabe naayenda kutuhwera, kandi aine amaani g’okutuhwera, ahabw’enki hakiriho oburemeezi?’ Kubaasa kugarukamu ekibuuzo ekyo, reeba vidiyo Ahabw’enki Ruhanga Akirekireho Okubonabona?

 Ruhanga naija kukoresa Obukama bwe, gavumenti ye ey’omu iguru kuhikiiriza ebi arikuraganisa. Atooraine Yesu Kristo kuba Omutegyeki w’Obukama obwo, kandi amuhaire obushoboorozi bw’okureeberera ensi n’abantu abagirimu. Obu Yesu yaabaire ari omu nsi, akakiza abarwaire, yaariisa abaine enjara, yaacureeza embeera mbi y’obwire, kandi yaazoora n’abafu. (Mako 4:39; 6:41-44; Luka 4:40; Yohaana 11:43, 44) N’ahabw’ekyo akaba naayoreka ebi arikwija kukora nk’Omugabe w’Obukama bwa Ruhanga.

 Reeba vidiyo Obukama bwa Ruhanga Niki? kwongyera kwega oku Obukama bwa Ruhanga burikwija kukugasira.

 Juba! Nitubaasa kuhamya tuta? Baibuli ekagamba kare ebintu ebyabaire nibiija kworeka ngu Obukama bwa Ruhanga buri haihi kutandika kutegyeka ensi. (Luka 21:10, 11) Embeera eziri omu nsi nizihikaana n’ebi Baibuli yaagambire ngu bikaba nibiija kubaho.

 Okwega ebirikukiraho, reeba ekicweka “Obukama bwa Ruhanga Nibwija Kutegyeka Ensi Ryari?”

 Omuhandiiki omwe wa Baibuli akagyeragyeranisa amatsiko agu Baibuli erikuha ‘n’ekitsibo’ nari enanga y’amagara. (Abaheburaayo 6:19) Nk’oku enanga erikuhamya emeeri kutazonga omu ihunga, amatsiko ga Baibuli agaabuzima agarikukwata aha biro by’omumaisho, nigabaasa kutuhwera kwemera oburemeezi oburiho hati. Amatsiko gaitu nibabaasa kurinda enyehurira zaitu, n’ebiteekateeko byaitu, nangwa n’endeebeka yaitu.—1 Abatesalonika 5:8.