Ku harikubaho ekihikiirizi, Abajurizi ba Yehova ahonaaho nibatebeekanisa kuhwera ab’eishe-emwe abaatunga oburemeezi. Okufayo nk’okwo nikworeka ngu buzima nitukundanira kimwe. (Yohaana 13:34, 35; 1 Yohaana 3:17, 18) Nitubahwera mu miringo ki?

Nituhayo esente. Omuri Yuda obu habamu enjara nyingi, Abakristaayo b’omuri Antiokia bakoherereza ab’eishe-emwe bagyenzi baabo obuhwezi bw’esente. (Ebyakozirwe 11:27-30) Naitwe ku turikumanya ngu hariho ab’eishe-emwe abahikirweho ekihikiirizi, nituhayo eby’okubahwera kurabira omu kibiina eki turimu.​—2 Abakorinso 8:13-15.

Nitubaha n’obuhwezi obundi. Abareeberezi abarikuba bari ahu ekihikiirizi kyaba nibafayo kusherura ab’eishe-emwe boona n’okumanya oku bari. Ku harikubaho ekihikiirizi abarikukora ahaby’okuha obuhwezi nibatebeekanisa oku baraahe ab’eishe-emwe abo obuhwezi bw’eby’okurya, amaizi marungi g’okunywa, ebijwaro, oburaaro, n’obujanjabi. Ab’eishe-emwe abaine emyoga erikuba neyetengyesa, nibagyenda kuhwera abo abaahikwaho ekihikiirizi nari kuhunduuza amaka n’Ebyombeko by’Obukama ebisiisikaire. Obumwe obu twine omu kibiina ahabw’okukwatanisa n’okukorera hamwe nibutubaasisa kutebeekanisa ahonaaho obuhwezi n’abaraahwere. N’obu turaabe nituhwera abo abu turi nabo ‘omu kwikiriza,’ kyaba nikibaasika nituhwera n’abandi abatari b’ediini yaitu.​—Abagalatia 6:10.

Nitubagumya turikukoresa Ebyahandiikirwe. Abantu abarikuba baahikwaho ekihikiirizi okukira munonga nibaba nibeetenga kuhuumurizibwa. Omu bwire nk’obwo, Yehova ‘Ruhanga ow’okuhuumuriza kwona’ niwe arikutugumya. (2 Abakorinso 1:3, 4) Nitubabuurira aha bi Baibuli erikuraganisa, turikubahamiza ngu Obukama bwa Ruhanga buri haihi kumaraho byona ebirikureeta obusaasi n’okubonabona.​—Okushuuruurwa 21:4.

• Niki ekirikubaasisa Abajurizi ba Yehova kurahuka kuhwera abarikuba bahikwaho ebihikiirizi?

• Nitubaasa kukoresa tuta Ebyahandiikirwe kuhuumuriza abaahikwaho ebihikiirizi?