Nooteekateeka ngu kigumire kukora ebihikire?— Baingi nibateekateeka ngu kigumire. Baibuli neeyoreka ngu kikaba kigumire Yosia kukora ebihikire obu yaabaire akiri muto. Kwonka akagira abanywani barungi abaamuhwereire. Ka twongyere kwega ebirikukwata ahari Yosia na banywani be.

Ishe wa Yosia akaba naayetwa Amoni, omugabe wa Yuda. Amoni akaba ari omuntu mubi kandi arikuramya ebishushani. Ishe ku yaafiire, Yosia yaaba omugabe wa Yuda. Kwonka akaba aine emyaka munaana yonka. Nooteekateeka ngu Yosia akaba mubi nka ishe?— Ngaaha buzima.

Yosia n’obu yaabaire akiri muto akaba ayorobera Yehova. N’ahabw’ekyo, akatoorana abanywani abarikukunda Yehova. Kandi baakamuhwera kukora ebihikire. Banywani ba Yosia abamwe bakaba bari baahi?

Omwe ahari banywani be akaba ari Zefania. Zefania akaba ari nabi owaarabwire  abantu ba Yuda ngu baaramya ebishushani nibaija kutunga oburemeezi. Yosia akoorobera Zefania ahabw’okuba akaramya Yehova beitu bitari bishushani.

Munywani wa Yosia ondiijo akaba ari Yeremia. Akaba aine emyaka erikwenda kwingana n’eya Yosia, kandi bakakura hamwe. Bakaba nibakundana munonga ahakuba Yosia ku yaafire, Yeremia yaahandiika ekyeshongoro ekyabaire nikyoreka ngu akashaasha ahabw’okufa kwa Yosia. Yeremia na Yosia baakahwerana omu kworobera Yehova n’okukora ebihikire.

Yosia noobaasa kumwegaho ki?— Yosia n’obu yaabaire akiri muto akaba ayorobera Yehova. Akaba naamanya ngu ashemereire kugira abanywani abarikukunda Yehova. Naiwe oine kugira abanywani abarikukunda Yehova kandi abarakuhwere kukora ebihikire.