Oburemeezi bw’Endwara z’Omutwe omu Nsi Yoona
“Butoosha ninyerarikirira n’obu ndikuba nshutami nyenka omu kishengye.”
“Naayehurira gye munonga, ningira okwerarikirira. Niimanya ngu ‘naashemererwa munonga’ juba ninza ‘kwehurira kubi.’”
“Niinteeraho kugumisiriza buri izooba okwaryo, kwonka obumwe ninyerarikirira aha bintu bingi omurundi gumwe.”
Ebi bikagambwa abantu abarikuteganisibwa endwara z’omutwe. Mbwenu shi iwe nari omukundwa waawe mwine oburemeezi nk’obwo?
Gira obwesigye ngu tori wenka. Abantu baingi nibakwatwaho endwara z’omutwe, yaaba ezaabo nari ez’abakundwa baabo.
Hatariho kubangaanisa turi omu ‘biro by’akabi kaingi’ ebirimu amaganya g’emiringo mingi. (2 Timoseo 3:1) Okucondooza kumwe nikworeka ngu, omu nsi yoona haihi omuntu omwe omu bantu munaana naateganisibwa endwara y’omutwe. Omu 2020, ekigwererezi kya COVID-19 kikareetera abantu 26 ahari igana kwongyera kwerarikirira n’abandi 28 ahari igana kugira endwara ezirikureetwa amaganya.
Kwonka, okwehurira gye omu biteekateeko, tikurikurugiirira aha mibaro egyo. Kureka, nikirugiirira aha ku iwe nari abakundwa baawe murikwehurira n’oku murikutwaza.
Okugira ebiteekateeko birungi niki?
N’embeera y’okwehurira gye n’okugira amagara marungi. N’oba noobaasa kwemera amaganya aga butoosha, kukora gye emirimo, n’okuhurira oine okumarwa.
Endwara y’omutwe . . .
-
TERIKUREETWA obweremwa bw’omuntu.
-
N’ENDWARA erikureetera omuntu kugira amaganya maingi kandi ekateganisa ebiteekateeko bye, enyehurira ze, n’oku arikutwaza.
-
Kaingi neereetera omuntu kutakwatanisa gye n’abandi n’okuremwa kuhikiiriza emirimo ye.
-
Neeteganisa abantu b’emyaka yoona, kandi abatarikushushanisa erangi, enganda, ediini, obwegyese n’entaatsya.
Okutunga obuhwezi bw’endwara z’omutwe
Iwe nari omukundwa waawe mwareeba empinduka omu mitwarize yaanyu, emiriire n’omu kugwejegyera, nari mwaba nimugira amaganya gatahweire, okwerarikirira, nari murikwehurira kubi, nikiba nikyetengyesa kusherura obuhwezi bw’omukugu kumanya ahabw’enki ebyo nibibaho. Kwonka shi noobaasa kwiha nkahi obuhwezi?
Yesu, omushaija omunyabwengye orabaireho, akagira ati: ‘Abahuriire tibarikwetenga [mushaho], kureka abarwaire.’ (Matayo 9:12) Abaine amagara mabi abarikuheebwa emibazi n’obujanjabi obuhikire nibahwerwa omu kutuubya aha bumanyiso bw’endwara kandi nibabaasa kuguma nibakora emirimo yaabo ya butoosha. N’eky’obwengye kurahuka kutunga obujanjabi obumanyiso bwaba obw’amaani nari bwagumaho. a
N’obu Baibuli eraabe etari kitabo ekirikukwata ahaby’obujanjabi, erimu obuhabuzi oburikubaasa kuhwera abaine endwara z’omutwe. Nitukuhiga kushoma ebicweka ebirikukurataho ebirikukwata aha ku Baibuli erikubaasa kutuhwera kugumisiriza endwara z’omutwe.
a Magaziini egi teine muringo gw’obujanjabi ogu erikushagika. Buri omwe aine kuteekateeka n’obwegyendesereza atakacwiremu obujanjabi oburikwetengyesa.
Noobaasa Kukunda n'Ebi
ENYEGYESA ZA BAIBULI ENKURU
Ahabw’enki Ruhanga Naareka Okubonabona Kukabaho?
Abantu baingi nibebuuza ahabw’enki ensi eijwiremu okubonabona n’obwangani. Baibuli neeha eby’okugarukamu ebirikuhuumuriza.
GUMA NOOREEBA!
Eminyeeto Okweyongyera Kurwara Endwara z’Omutwe—Baibuli Neegamba Ki?
Baibuli neeha eminyeeto abaine amaganya obuhabuzi oburikukora.
EBIRIKUTUKWATAHO
Shaba Kutaayaayirwa Abajurizi ba Yehova
Gaaniira n’Abajurizi ba Yehova aha nshonga kuruga omu Baibuli, nari gyezaho kwejumba omu ntebeekanisa yaitu y’Okwega Baibuli otashashwire.
