1-3. Ni bintu ki ebyareeteire Pentekoote kuba eizooba ry’omutaano, kandi nibihikiiriza bita obunabi? (Reeba ekishushani aha kutandika.)

ZIKABA ziri shaaha nk’ishatu Sande omu kasheeshe. Eizooba eri rikaba riri ery’omutaano aha baabaire bari omuri Yerusaalemu. Rikaba riri eizooba rya sabato. Hatariho kubanganisa, bakaba baaherize kuhayo ebitambo by’akasheeshe aha hekalu. Abantu bakaba bashemereirwe omu kasheeshe ako obwo omunyamurwa arikuhayo ebiheebwayo by’emigaati etumbisiibwe ekozirwe omu ngano nsya. (Lev. 23:15-20) Abantu bakaba nibakuza omukoro gw’okutandika kw’eisharuura ry’engano. Rikaba riri eizooba rya Pentekoote omu gwa 33.

² N’obu ebintu ebi biraabe byabaire biriyo nibibaho aha hekalu, omu rurembo haine ekintu ky’omugasho munonga ekyabaire kiri haihi kubaho omu kishengye eky’ahaiguru. Abakristaayo nka 120 bakaba bari hamwe, ‘barikushaba.’ (Byak. 1:13-15) Ekyabaire kiri haihi kubaho kikaba kiine akakwate n’ebi omunyamurwa yaabaire akora aha izooba rya Pentekoote, kandi kikahikiiriza n’obunabi bwa nabi Yoeli obu yaagambire emyaka nka 800 enyima. (Yoel. 2:28-32; Byak. 2:16-21) Nooteekateeka ngu ni kintu ki eky’omuhendo ekyabaire nikiza kubaho?

³ Shoma Ebyakozirwe 2:2-4. Abakristaayo abaabaire bateeraniire hamwe omu kishengye ky’ahaiguru bakashukwaho omwoyo  gurikwera. (Byak. 1:8) Bakatandika kugamba obunabi, baaha n’obujurizi aha bintu bikuru ebi baabaire bareebire nari bahuriire. Petero akashoboororera abantu baingi abaabaire bateeraniire hamwe, obukuru bw’ekyo ekyabaire kyaheza kubaho. Akabagira ati: ‘Mweteise, mwena mubatizibwe omu iziina rya Yesu Kristo, mubone kusaasirwa ebibi byanyu; kandi nimwija kuheebwa ekiconco ky’omwoyo ogurikwera.’ Abantu nka 3,000 boona bakaikiriza obuhabuzi obwo, baabatizibwa, kandi baaheebwa omwoyo gurikwera.​—Byak. 2:37, 38, 41.

4. (a) Ahabw’enki twine kufayo kumanya ebyabaireho aha Pentekoote? (b) Ni kintu ki ekindi ekikuru ekirikubaasa kuba kyabaireho aha izooba eryo emyaka mingi enyima? (Reeba Eby’aha muheru.)

⁴ Ahabw’enki Pentekoote 33 riri eizooba rikuru munonga ahariitwe? Buzima ti ahabw’ekyo ekyabaire aha hekalu omuri Yerusaalemu. Ahakuba Yesu Kristo Omunyamurwa Omukuru akahikiiriza obunabi obwo. ^[1] Omunyamurwa omukuru akahayo emigaati ebiri ey’akamanyiso ahari Yehova aha izooba eryo. Emigaati erimu ekitumbisa eyaahairweyo aha hekalu ekaba neejwekyera abeegi ba Yesu abashukirweho amajuta kuba abaana ba Ruhanga abaihirwe omu bantu abatahikiriire. N’ahabw’ekyo eki kibaasiise abo abarikwetwa ‘emijigaijo’ kutooranwa kuza kutegyeka omu Bukama oburaareetere abantu abacureezi emigisha mingi. (Yak. 1:18; 1 Pet. 2:9) Yaaba twine amatsiko g’okuza omu iguru kutuura na Yesu nari kutuura omu nsi ebiro byona, ebyabaireho eizooba eryo nibitukwataho!

5. Nitumanya tuta ngu abarikushukwaho omwoyo gurikwera tibarikugushukwaho omu muringo gurikushushana?

⁵ Ku ogire ngu okaba ori omwe aha beegi ba Yesu abaagiirweho endimi nk’ez’omuriro aha mitwe yaabo, okaba otarikwija kwebwa eizooba eryo. Okaba otarikubaasa kubanganisa ngu waashukwaho omwoyo gurikwera, na munonga waaba waatungire ekiconco ky’okugamba endimi. (Byak. 2:6-12) Mbwenu shi boona abarikushukwaho omwoyo gurikwera nigubashukwaho nk’oku abeegi 120 ab’okubanza baagushukirweho? Ngaaha. Abandi abaabaire bari omuri Yerusaalemu eizooba eryo bakaija kushukwaho omwoyo gurikwera obu baabatizibwa. (Byak. 2:38) Tibarareebire endimi nk’ez’omuriro aha mitwe yaabo. Kandi, ti Bakristaayo boona ngu nibashukwaho omwoyo gurikwera aha kubatizibwa. Abasamaria bakabanza baabatizibwa reero ku haahingwireho obwire baashukwaho omwoyo gurikwera. (Byak. 8:14-17) Kandi Koruneelio n’ab’omu ka ye bakashukwaho omwoyo gurikwera batakabatiziibwe.​—Byak. 10:44-48.

6. Boona abashukirweho amajuta nibatunga ki, kandi eki nikibakwataho kita?

⁶ Buzima, oku abantu barikushukwaho omwoyo gurikwera tikurikushushana. Abamwe nibabaasa kuba baamanyire ahonaaho ngu beetsirwe kuza omu iguru, kandi abandi nibabaasa kuba baakimanyire mporampora. Kwonka, n’obu baraabe nibashukwaho omwoyo gurikwera omu miringo etarikushushana, buri omwe aharibo aine eki entumwa Paulo yaashobooroireho ati: ‘Mukaikiriza Yesu, mwahamibwa omuriwe n’akamanyiso k’omwoyo gurikwera ogwaraganisiibwe; nigwo mukwato gw’obuhunguzi bwaitu.’ (Efe. 1:13, 14) Okushukwaho omwoyo gurikwera ni nk’akamanyiso akarikworeka ngu omuntu aine obuhame nari yaaraganisibwa ekiraabeho omu biro by’omumaisho. Omukristaayo oshukirweho amajuta naatunga obuhame ahabw’omukwato nari akamanyiso aku arikutunga.​—Shoma 2 Abakorinso 1:21, 22; 5:5.

7. Buri Mukristaayo oshukirweho amajuta aine kukora ki kubaasa kutunga ekiconco kye eky’okuza omu iguru?

 ⁷ Mbwenu shi Omukristaayo orikutunga omukwato ogu naaba naahamiza kimwe ngu naija kuza omu iguru omu biro by’omumaisho? Ngaaha. Omuntu ogu naaba naahamya ngu ayetsirwe. Kwonka naatunga ekiconco kye ky’okuza omu iguru yaaba omwesigwa kandi yaaba atabaire mwesigwa tarikukitunga. Petero akakishoboororaho ati: ‘N’ahabw’ekyo, b’eishe-emwe, mwongyere kwezirika kuhamya okwetwa kwanyu n’okutooranwa kwanyu; ahakuba ku muraatwaze mutyo, timurigwa biro byona; kureka muryaheerwa kimwe okutaaha omu bukama obutahwaho bwa Mukama waitu kandi Omujuni waitu Yesu Kristo.’ (2 Pet. 1:10, 11) N’ahabw’ekyo, buri Mukristaayo oshukirweho amajuta aine kuteeraho kuguma ari omwesigwa. Yaaba atabaire mwesigwa, okwetwa kwe, tikurikwija kumugirira makuru.​—Heb. 3:1; Kush. 2:10.

8, 9. (a) Ahabw’enki abantu baingi nibagumirwa kwetegyereza ekirikubaho omuntu yaashukwaho amajuta? (b) Omuntu naamanya ata ngu ayetsirwe kuza omu iguru?

⁸ Abaheereza ba Ruhanga baingi obunaku obu nibabaasa kugumirwa kwetegyereza oku abantu barikushukwaho omwoyo gurikwera. Kandi ekyo kihikire, ahakuba ti kintu ekirikubahikaho. Omu kubanza Ruhanga akaba naayenda ngu abantu batuure omu nsi ebiro byona. (Kut. 1:28; Zab. 37:29) Okutoorana abamwe kuza omu iguru kutegyeka nk’abagabe n’abanyamurwa tiky’obuhangwa. Egi n’entebeekanisa eyaizireho bwanyima. Okwetwa oku nikuhindura emiteekateekyere n’amatsiko g’omuntu orikuba ashukirweho omwoyo gurikwera.​—Shoma Abaefeso 1:18.

⁹ Kwonka omuntu naamanya ata ngu ayetsirwe kuza omu iguru, ngu buzima atungire akamanyiso aka ak’omutaano? Eky’okugarukamu kiri omu bigambo bya Paulo ebi yaahandiikire Abakristaayo b’omuri Rooma abashukirweho amajuta, “abaayetsirwe kuba abarikwera.” Akabagira ati: ‘Timurahairwe mwoyo gw’obuhuuku kugaruka kutiina, kureka mukaheebwa omwoyo ogwabahindwire abaana ba Ruhanga, ogutugambisa tukagira tuti: Abba, Taata!’ Omwoyo ogwo nigwo guhamya n’emyoyo yaitu ku turi abaana ba Ruhanga.’ (Rom. 1:7; 8:15, 16) Ruhanga naahamiza omuntu ngu ayetsirwe kwija kuba omuhunguzi omu Bukama omu biro by’omumaisho arikukoresa omwoyo gurikwera.​—1 Tes. 2:12.

10. Ebigambo ebiri omuri 1 Yohaana 2:27 ebirikugira ngu Abakristaayo abashukirweho amajuta tibarikwetenga omuntu w’okubeegyesa nibimanyisa ki?

¹⁰ Abarikutunga okwetwa oku okw’omutaano kuruga ahari Ruhanga, tibarikwetenga omuntu ondiijo kubahamiza. Tibarikwetenga omuntu ondiijo kubamanyisa ekibabaireho. Yehova tarikubarekamu kubanganisa kwona. Entumwa Yohaana naagambira abashukirweho amajuta ati: “Kwonka imwe mukashukwaho amajuta Ogwo Orikwera, kandi mwena nimukimanya.” Kandi naayongyeraho ati: “Naimwe okushukwaho amajuta, oku yaabahaire, nikuguma omuriimwe, kandi timurikwetenga w’okubeegyesa; nk’okushukaho amajuta kwe oku kubeegyesa ahari byona, kandi oku kuri okw’amazima, kutari kw’ebishuba, nk’oku kwabeegyeise, mube nikwo mwaguma omuriwe.” (1 Yoh. 2:20, 27) Aba baine kwegyesibwa omu by’omwoyo nk’abandi. Kwonka tibarikwetenga muntu weena kubahamiza ngu bashukirweho amajuta. Omwoyo gurikwera ogurikukizayo amaani omu nsi n’omu iguru nigubaha obuhame obwo!

11, 12. Abashukirweho amajuta nibabaasa kwebuuza ki, kwonka niki eki batarikubanganisaho?

¹¹ Omuntu oshukirweho omwoyo gurikwera ku arikutunga obuhame obu, naahindukira kimwe. Eki Yesu akakigambaho ‘nk’okuzaarwa ogwa kabiri.’ ^[2] (Yoh. 3:3, 5.) Akoongyera yaashoboora ati: “Otatangaarira eki naakugambira nti: Mushemereire kuzaarwa obwa kabiri. Omuyaga guhuuha nigugarura ei gurikwenda, iwe ohurira okuhuuha kwagwo, kwonka tomanya i gurikuruga, n’obu yaakuba ei gurikuza; n’ozairwe omwoyo weena nikwo aba.” (Yoh. 3:7, 8) Buzima, tikirikubaasika kushoboororera gye omuntu otashukirweho amajuta oku abashukirweho majuta barikwehurira.

¹² Abo abarikuba beetsirwe nibabaasa kwebuuza: ‘Ahabw’enki ntoorainwe? Ahabw’enki niinye ntoorainwe atari ndiijo muntu?’ Nibabaasa kuba nibeereeba nk’abatashemereire okwetwa okwo. Kwonka tibarikubaasa kubanganisa ngu beetsirwe. Nibaba baine okushemererwa kwingi n’okusiima. Nibeehurira nk’oku Petero yaayehuriire obu Ruhanga yaamuhwera kuhandiika ati: “Ruhanga Ishe wa Mukama waitu Yesu Kristo, asiimwe! Ahabw’embabazi ze nyingi akatuzaara obwa kabiri ngu tugire amatsiko agatahwaho ahabw’okuzooka omu bafu kwa Yesu Kristo; ngu tutungye obuhunguzi obutarikubaasa kuhwerekyerera, obutarikusiisikara, kandi obutarikuhunduuka, obwababiikiirwe omu iguru.” (1 Pet. 1:3, 4) Oshukirweho amajuta ku arikushoma ebigambo ebi, atarikubanganisa naamanya ngu Ishebo ow’omu iguru naaba naamugambira.

13. Emiteekateekyere y’omuntu neehinduka eta bwanyima y’okushukwaho omwoyo gurikwera, kandi niki ekirikureeta empinduka egi?

¹³ Obu baabaire batakashukirweho omwoyo gurikwera, bakaba baine amatsiko g’okutuura omu nsi. Bakaba baine ekihika ky’okureeba Yehova arishemeza ensi, kandi bakaba nibenda kuba omu nsi egyo omu biro by’omumaisho. Obundi nibabaasa kuba baabaire nibateera akashushani barikwereeba nibaakiira abantu baabo kuruga omu bituuro. Bakaba baine ekihika ky’okutuura omu maka gaabo agu beeyombekyeire n’okurya ebijuma by’emiti ei beebyariire. (Isa. 65:21-23) Ahabw’enki emiteekateekyere yaabo neehinduka? Ti kugira ngu nibaba batamirwe amatsiko g’okutuura omu nsi. Tibarikuhindura emiteekateekyere yaabo ahabw’amaganya nari obujune. Ti kugira ngu nibatamwa ensi, ahabw’okugira ngu nibateekateeka ngu okutuura omu nsi ebiro byona nikiija kuba nikirusya nari nikitama, nari ngu nibenda kumanya ebirikufa omu iguru. Kureka, nibahindura emiteekateekyere yaabo ahabw’okugira ngu omwoyo gwa Ruhanga gubeetsire, kandi gwahindura emiteekateekyere yaabo n’amatsiko gaabo.

14. Abashukirweho amajuta nibeehurira bata baaba bari aha omu nsi?

¹⁴ Mbwenu shi, twine kuteekateeka ngu abashukirweho amajuta nibaba nibenda kufa? Ruhanga akahwera Paulo kugarukamu ati: “Ahakuba itwe abakiri omu nju egi ey’orusiisira nitutsinda turemeirwe, ti habw’okwenda kujuurwa, kureka okwongyera kujwekwa, ngu eky’okufa kimirwe amagara.” (2 Kor. 5:4) Nibaba batatamirwe amagara aga, kugira ngu bafe juba. Kureka, nibaba baine ekihika ky’okuheereza Yehova bari na banywani baabo n’abanyabuzaare. Kwonka, kyona eki barikuba nibakora, nibaba nibateekateeka aha matsiko g’omuhendo agu baine omu biro by’omumaisho.​—1 Kor. 15:53; 2 Pet. 1:4; 1 Yoh. 3:2, 3; Kush. 20:6.

15. Ni bintu ki ebitarikuhamya ngu omuntu ashukirweho omwoyo gurikwera?

¹⁵ Obundi shana nooyebuuza yaaba otungire okwetwa oku okw’omutaano. Ku oraabe noogira ngu noobaasa kuba oyetsirwe,  teekateeka aha bibuuzo bikuru ebi. Nooreeba ngu oine omujinya gw’amaani omu kubuurira? Ori omwegi murungi w’Ekigambo kya Ruhanga orikukunda kucondooza aha bintu ebitoorobi kwetegyereza? (1 Kor. 2:10) Yehova akuhaire emigisha y’omutaano omu buheereza bwawe? Oine ekyetengo ky’amaani eky’okukora ebi Yehova arikukunda? Nooreeba ngu oine obujunaanizibwa bw’amaani obw’okuhwera abandi omu by’omwoyo? Nooreeba obuhame ngu Yehova akuhwereire omu miringo mingi? Mbwenu shi waagarukamu ebibuuzo ebi byona ngu eego, nikimanyisa ngu oyetsirwe kuza omu iguru? Ngaaha buzima. Ahabw’enki? Ahakuba abaheereza ba Ruhanga boona nibabaasa kwehurira batyo yaaba bashukirweho omwoyo gurikwera nari batagushukirweho. Omwoyo gwa Yehova ogurikwera niguhwera abaheereza be boona omu miringo erikushushana. Buzima, ku oraabe noobanganisa yaaba oyetsirwe kuza omu iguru, ekyo nikyoreka ngu toyetsirwe. Abo abu Yehova ayetsire tibarikubanganisa yaaba beetsirwe nari bateetsirwe! Nibaba nibakimanya!

16. Nitumanya tuta ngu ti boona abahairwe omwoyo gurikwera beetsirwe kuza omu iguru?

¹⁶ Omu Byahandiikirwe, nitureebamu abashaija baingi abaabaire baine okwikiriza abu omwoyo gurikwera gwahwereire, kwonka abaabaire bataine matsiko g’okuza omu iguru. Omwe aharibo akaba ari Yohaana Omubatizi. Yesu akahimbisa munonga Yohaana omubatizi kwonka t’omwe aha baraahungure Obukama bw’omu iguru. (Mat. 11:10, 11) Daudi nawe akatunga amaani ahabw’omwoyo gurikwera. (1 Sam. 16:13) Daudi akaba ari omushaija orikukunda eby’omwoyo kandi akahwerwa Ruhanga kuhandiika bimwe aha bitabo bya Baibuli. (Mak. 12:36) Kandi, aha Pentekoote, Petero akagira ngu ‘Daudi we taratembire mu iguru.’ (Byak. 2:34) Yehova akakoresa omwoyo gwe gurikwera kuhwera abashaija aba kukora ebintu birikutangaaza, kwonka bakaba batatoorainwe kuza omu iguru. Ekyo tikirikumanyisa ngu bakaba baine akamogo nari batashemeire. Kureka Yehova naija kubazoora batungye amagara omu paradiso omu nsi.​—Yoh. 5:28, 29; Byak. 24:15.

17, 18. (a) Baingi aha baheereza ba Ruhanga baine ekihika ky’okutunga kiconco ki? (b) Ni bibuuzo ki ebiraagarukwemu omu kicweka ekirikukurataho?

¹⁷ Abaheereza ba Ruhanga baingi obunaku obu ti beetsirwe kuza omu iguru. Baine amatsiko nk’agu Daudi, Yohaana omubatizi, n’abashaija n’abakazi abandi abeesigwa aba ira baabaire baine. Baine ekihika nk’eki Abrahamu yaabaire aine eky’okutuura omu nsi barikutegyekwa Obukama bwa Ruhanga. (Heb. 11:10) Bakye aha batoorainwe kuza omu iguru bakiri aha omu nsi omu biro ebi eby’emperu. (Kush. 12:17) Eki nikimanyisa ngu baingi aha 144,000 abatoorainwe, baaherize kufa bari abeesigwa.

¹⁸ Mbwenu shi abaine amatsiko g’okutuura omu nsi baine kutwara bata ogwo weena orikugira ngu ayetsirwe kuza omu iguru? Oshemereire kureeba ota omwe omu kibiina kyanyu yaarya kandi akanywa aha bumanyiso, twaba nitwijuka okufa kwa Mukama waitu? Mbwenu shi oshemereire kutiina ahabw’okweyongyera kw’omubaro gw’abarikugira ngu beetsirwe kuza omu iguru? Ebibuuzo ebi nibiza kugarukwamu omu kicweka ekirikukurataho.