1. Ni biragiro ki ebimwe ebiri omu Baibuli, kandi nitugasirwa tuta twabyorobera?

OMU Baibuli, Yehova atuhaire ebiragiro ebirikutumanyisa eki arikwenda ngu tukore. Nk’eky’okureeberaho, naayanga obushambani, okuramya ebishushani, okwiba, n’obusinzi. (1 Kor. 6:9, 10) Okwongyera ahari ekyo, Omwana wa Ruhanga, Yesu Kristo, akaha abeegi be ekiragiro kitoorobi, kwonka ekirikureeta okushemererwa eki: ‘Mugyende omu mahanga goona, muhindure abantu abeegi nimubabatiza omu iziina rya Isheboona n’ery’Omwana n’ery’omwoyo gurikwera, nimubeegyesa kworobera byona ebi naabaragiire; kandi reeba, ndi hamwe naimwe ebiro byona okuhitsya obu ensi egi erihwaho.’ (Mat. 28:19, 20) Ebiragiro bya Ruhanga ka nibitugasira! Ku turikubyorobera nitwongyera kweha ekitiinisa, tugira amagara marungi, kandi twongyera kugira okushemererwa omu maka gaitu. Ekikuru munonga, Yehova naatusiima kandi atuha emigisha ahabw’okworobera ebiragiro bye, otwariiremu n’eky’okwejumba omu kubuurira.

2, 3. (a) Ahabw’enki Baibuli etarikutuha ebiragiro omuri buri mbeera? (b) Nituza kushwijuma bibuuzo ki omu kicweka eki? (Reeba ekishushani aha kutandika.)

² Kwonka omu mbeera ezimwe nyingi Baibuli terikutuha ebiragiro. Nk’eky’okureeberaho, Ebyahandiikirwe tibirimu ebiragiro ebirikugamba butunu emyenda ei Abakristaayo bashemereire kujwara. Eki nikyoreka kita obwengye bwa Yehova? N’obu  abantu baraabe baine emiringo y’okujwara etarikushushana, kandi n’emishono y’emyenda erikuguma neehanguura, Baibuli yo terikuhwa aha murembe. Kuri noogira ngu Baibuli ekooreka omuringo gumwe ogw’okujwara n’okweboneza, gukaabaire gwahweire kare aha murembe. Ahabw’enshonga nizo zimwe, Ekigambo kya Ruhanga tikirikuha ebiragiro bingi ebirikukwata aha mirimo ei Abakristaayo baine kukora, eby’obujanjabi nari eby’okweshemeza. N’ahabw’ekyo, Yehova naaha abantu hamwe n’emitwe y’amaka obugabe kwecweramu omu nshonga ezi.

³ Mbwenu shi nikimanyisa ngu Yehova tarikufayo aha bi turikucwamu kukora, n’obu ebimwe byakuba nibikwata aha magara gaitu? Mbwenu shi Tataitwe ow’omu iguru naija kusiima kyona eki turaacwemu kyaba kitarikuhenda ebiragiro by’omu Baibuli? Haaba hatariho kiragiro, nitubaasa kucwamu tuta ebirikushemeza Yehova?

4, 5. Ebi turikucwamu nibitukwataho bita hamwe n’abandi?

⁴ Abamwe nibateekateeka ngu nibabaasa kucwamu eki barikwenda. Kwonka twaba nitwenda kucwamu ebirikushemeza Yehova, twine kuteekateeka aha biragiro n’emisingye ebiri omu Baibuli kandi tukabyorobera. Nk’eky’okureeberaho, kubaasa kusiimwa Ruhanga twine kworobera ekiragiro kye ekirikukwata aha shagama. (Kut. 9:4; Byak. 15:28, 29) Okushaba nikutuhwera kucwamu gye ebirikuhikaana n’ebiri omu biragiro n’emisingye ya Baibuli.

⁵ Ebi turikucwamu omu nshonga nkuru nibibaasa kukwata aha mukago gwaitu na Ruhanga n’amagara gaitu. Kyona eki turikucwamu nikikwata aha mukago gwaitu na Yehova omu muringo murungi nari mubi. Twacwamu gye nituhamya omukago gwaitu na Ruhanga, kandi twacwamu kubi nitubaasa kugushiisha. Kandi twacwamu kubi nitubaasa kukora kubi abandi, tubateeze entsibo, nari tushiishe obumwe bw’ekibiina. Hatariho kubanganisa ebi turikucwamu nibikwata aha bandi.—Shoma Abarooma 14:19; Abagalatia 6:7.

6. Tushemereire kwihirira ahari ki twaza kucwamu?

⁶ Baibuli yaaba etarikugamba butunu eki tushemereire kukora nitubaasa kucwamu gye tuta? Omu mwanya gw’okukora eki turikukunda, twine kushwijuma bingi ebirikukwata aha nshonga egyo tukacwamu ebirikushemeza Yehova. Twakora ekyo, nitugira obuhame ngu Yehova naaza kutuhwera kucwamu gye.—Shoma Zaaburi 37:5.

7. Haaba hatariho kiragiro kuruga omu Baibuli, nitubaasa kumanya tuta ebi Yehova arikwenda ngu tukore?

⁷ Noobaasa kwebuuza oti: ‘Baibuli yaaba etarikugamba butunu aha bintu ebimwe nitubaasa kumanya tuta ebi Yehova arikukunda?’ Abaefeso 5:17 nihagira hati: “Mumanye buzima ebi Mukama waitu arikwenda.” Haaba hatariho kiragiro kuruga omu Baibuli, nitubaasa kumanya tuta ebi Ruhanga arikukunda? Nitubaasa kubimanya twamushaba kandi tukaikiriza obuhabuzi bw’omwoyo gurikwera.

8. Yesu akamanya ata ebi Yehova yaabaire naayenda ngu akore? Ha eky’okureeberaho.

⁸ Yetegyereze oku Yesu yaamanyire ebi Ishe yaabaire naayenda ngu akore. Emirundi ebiri obu Yesu yaaha abantu baingi eby’okurya omu muringo gw’eky’okutangaaza, akabanza yaashaba. (Mat. 14:17-20; 15:34-37) Kwonka akanga kuhindura amabaare eby’okurya obu yaabaire naayohibwa Omuregi omu ihamba kandi aine enjara. (Shoma Matayo 4:2-4.) Ahabw’okugira  ngu Yesu akaba naamanya emiteekateekyere ya Ishe, akamanya ngu amabaare taine kugahinduramu eby’okurya. Buzima Yesu akamanya ngu Ruhanga tarikwenda ngu akorese amaani ge okwesherurira ebye. Obu yaayanga kukora ekyo, akaba aine obuhame ngu Ishe naaza kumuha obuhabuzi kandi amuhe eby’okurya obu arikubyenda.

9, 10. Niki ekiraatuhwere kucwamu gye? Ha eky’okureeberaho.

⁹ Twaba nitwenda kucwamu gye nk’oku Yesu yaakozire, twine kwesiga Yehova kutuha obuhwezi. Twine kukora ebirikuhikaana n’ebigambo ebi: “Yesigye Mukama n’omutima gwawe gwona, orekye kwegamira okwetegyereza kwawe ahabwawe; omwemere omu mitwarize yaawe yoona, nawe aryaguma naatebeekanisa emihanda yaawe yoona. Reka kwemanya obwengye; Tiina Mukama, orugye omu bibi.” (Enf. 3:5-7) Okumanya emiteekateekyere ya Yehova kurabira omu kwega Baibuli, nikituhwera kumanya ebi arikwenda ngu tukore omu mbeera ezimwe. Oku turikweyongyera kumanya emiteekateekyere ya Yehova, nikwo turikweyongyera kugyendera aha buhabuzi bwe.—Ezk. 11:19.

¹⁰ Nk’eky’okureeberaho, ka tugire ngu omukazi oshwairwe ariyo naagura ebintu. Areeba enkaito ezi arikwenda, kwonka nizigura esente nyingi. N’ahabw’ekyo ayebuuza ati: ‘Ibanyi naija kwehurira ata naashohoza esente ezi zoona?’ Obundi naamanya eki iba araamugarukyemu n’obu araabe atamwine. Ahabw’enki naakimanya? N’ahabw’okugira ngu kumara obwire atwire naamanya emiteekateekyere ya iba aha bikwatiraine n’embeera yaabo. N’ekirikurugamu naamanya oku iba arikubaasa kwehurira yaacwamu kugura enkaito ezo. Omu muringo nigwo gumwe, twayeyongyera kumanya emiteekateekyere ya Yehova n’emiringo ye, nitweyongyera kwetegyereza ebi arikwenda ngu tukore omu mbeera ezitarikushushana.

11. Nitubaasa kwebuuza bibuuzo ki, twaba nitushoma Baibuli nari turikugyega? (Reeba akabokisi “ Waaba Nooshwijuma Baibuli, Yebuuze Oti.”)

¹¹ Kubaasa kumanya emiteekateekyere ya Ruhanga, twine kuba nitukunda kweshomesa. Twaba nitushoma Ekigambo kya Ruhanga, nitubaasa kwebuuza tuti: ‘Ebi ndikushoma nibinyegyesa ki ahari Yehova, emitindo ye ehikire, n’emiteekateekyere ye?’ Tushemereire kugira emiteekateekyere nk’eya Daudi owaayeshongoire ati: “Ompabure emihanda yaawe, ai Mukama; kandi onyegyese emitwarize yaawe. Onyebembere omu mazima gaawe, kandi onyegyese, ahakuba niiwe Ruhanga w’okujunwa kwangye; niiwe ntegyereza eizooba ryona.” (Zab. 25:4, 5) Waaba nooteekateeka aha bi waashoma omu Baibuli, noobaasa kwebuuza ebibuuzo nk’ebi: ‘Nimbaasa kugyendera nta aha bi ndikushoma omu ka yangye? Nimbaasa kubigyenderaho naaba ndi nkahi? Omuka? Aha murimo? Aha ishomero? Omu kubuurira?’ Twaheza kumanya ahu twine kubigyenderaho, nikitworobera kwetegyereza oku turikubaasa kubita omu nkora.

12. Ebitabo byaitu n’enteerane zaitu nibituhwera bita kumanya emiteekateekyere ya Yehova omu mbeera zitarikushushana?

¹² Omuringo ogundi ogu turikubaasa kumanya emiteekateekyere ya Yehova, n’okwetegyereza obuhabuzi oburikwegamira aha Baibuli oburikuheebwa ekibiina kye. Nk’eky’okureeberaho, ebirikuba biri omu Munaara gw’Omurinzi n’omu Katabo k’Okucondooza ak’Abajurizi ba Yehova nibiteerwa kutuhwera kumanya emiteekateekyere ya Yehova omu mbeera ezitarikushushana  ezirikutwetengyesa kwecweramu. Kandi nitugasirwa munonga twahurikiza gye omu nteerane z’Ekikristaayo kandi tukazejumbamu. Okuteekateeka aha birikwegyesibwa nikiija kutuhwera kwongyera kumanya emiteekateekyere ya Yehova n’okuteekateeka nkawe. Twakoresa gye eby’omwoyo ebi Yehova atuhaire, mporampora nitwija kumanya emitindo ye. N’ekiraarugyemu, nitwija kucwamu ebirungi ebi Yehova araahe omugisha.

13. Ha eky’okureeberaho ekirikworeka oku turikubaasa kucwamu gye twamanya emiteekateekyere ya Yehova.

¹³ Teekateeka aha ky’okureeberaho ekirikworeka ngu okumanya emiteekateekyere ya Yehova nikibaasa kutuhwera kucwamu gye. Omubuurizi naabaasa kuba aine ekyetengo ky’okuba payoniya ow’obutwire. Kubaasa kuhikiiriza ekigyendererwa kye, aine kureeba ngu taine ebintu bingi ebirikumuremesa. Kwonka nabwo, naabaasa kuba ayerarikiriire ngu tarikubaasa kushemererwa yaaba aine ebintu bikye. Buzima, tihariho ekiragiro ekirikugira ngu tube baapayoniya, nitubaasa kugumizamu nituheereza Yehova nk’ababuurizi abeesigwa. Kwonka Yesu naatuhamiza ngu abo abarikwefeerereza ahabw’Obukama nibaija kutunga emigisha mingi. (Shoma Luka 18:29, 30.) Kandi Ebyahandiikirwe nibyoreka ngu nikishemeza Yehova twahayo ‘empongano z’okuhimbisa’ kandi tukakora eki turikubaasa kushagika okuramya kw’amazima. (Zab. 119:108; 2 Kor. 9:7) Twagyendera aha Byahandiikirwe ebi kandi tukashaba Yehova obuhabuzi, nitubaasa kumanya emiteekateekyere ye. Twabiteekateekaho nikiija kutuhwera kucwamu gye, kandi tutungye emigisha ya Ruhanga.

14. Noobaasa kumanya ota yaaba omuringo gw’okujwara nigushemeza Yehova?

¹⁴ Teekateeka aha ky’okureeberaho ekindi: Ka tugire ngu oine enjwara ei orikukunda kwonka erikubaasa kuteganisa abandi omu kibiina. Kwonka torikumanya ekiragiro omu Baibuli ekirikuzibira enjwara yaawe. Yehova we ekyo naakiteekateekaho ki? Entumwa Paulo akahwerwa Ruhanga kuha obuhabuzi obu: “Abakazi bo bagume beecume, bajware ebijwaro ebi bashemereire, baine obucureezi n’okwerinda, barekye kutsiba eishokye, n’obu kwakuba okujwara ezaabu nari eruuru nari ebijwaro by’obuguzi bwingi. Kureka bakore emirimo mirungi eshemereire abakazi abeeyeta abarikutiina Ruhanga.” (1 Tim. 2:9, 10) Omusingye ogu, nigukwata n’aha bashaija Abakristaayo. Nk’abaheereza ba  Yehova abeehaireyo, titurikufayo aha bi turikukunda byonka, beitu n’oku enjara yaitu n’oku turikweboneza birikukwata aha bandi. Okwegyendesereza na rukundo nibitureetera kuteekateeka aha miteekateekyere y’ab’eishe-emwe bagyenzi baitu kubaasa kwetantara kubahuzya nari kubagwisa kubi. (1 Kor. 10:23, 24; Fil. 3:17) Twateekateeka aha ki Ebyahandiikirwe birikugamba, nikibaasa kutuhwera kumanya emiteekateekyere ya Yehova omu nshonga egi kandi nikibaasa kutuhwera kucwamu ebirikumushemeza.

15, 16. (a) Yehova naayehurira ata twaguma nituteekateeka aha by’obushambani? (b) Twaba nitutoorana eby’okweshemeza, nitubaasa kumanya tuta ebirikushemeza Yehova? (c) Tushemereire kucwamu tuta omu nshonga enkuru?

¹⁵ Baibuli neegira ngu Yehova naayehurira kubi abantu ku barikukora ebitahikire kandi ‘n’eibiteekateeko by’omu mitima byabo byaba biri bibi obutoosha.’ (Shoma Okutandika 6:5, 6.) N’ahabw’ekyo okuhimbisiriza okuteerana kigwire, ahakuba nikubaasa kurugamu okukora ekibi ky’amaani kandi ekitarikuhikaana n’emiteekateekyere ya Yehova. Yakobo omwegi wa Yesu akahandiika ati: “Obwengye oburikuruga omu iguru, okubanza buba obushemeire, kandi obw’obusingye, obw’okutwaza gye, obwikiriza okuteisibwa, obwijwire embabazi n’ebyana ebirungi, obutarimu kugambira habiri n’obu bwakuba obugobya.” (Yak. 3:17) Okumanya eki, kishemereire kutuhiga kwanga eby’okweshemeza ebirikubaasa kwimutsya ebiteekateeko n’ebigyendererwa bibi. Abakristaayo abarikwetegyereza tikirikubetengyesa kubuuza yaaba bashemereire kushoma ekitabo, kureeba vidiyo, nari omuzaano gwona ogurimu ebi Yehova arikwanga. Emiteekateekyere ye aha bintu ebyo neeyorekwa butunu omu Kigambo kye.

¹⁶ Twaba twine eki turikwenda kucwamu, nitubaasa kucwamu omu miringo etarikushushana kwonka yoona erikushemeza Yehova. Twaba nitwenda kucwamu aha nshonga ezigumire, ni kikuru kusherura obuhabuzi aha bareeberezi nari Abakristaayo abandi abakuzire omu by’omwoyo. (Tit. 2:3-5; Yak. 5:13-15) Kwonka nikiba kitahikire kushaba abandi kutucweramu. Abakristaayo baine kutendeka okubaasa kwabo kw’okutaanisa kandi bakakukoresa. (Heb. 5:14) Twena twine kugyendera aha bigambo bya Paulo ebi: “Omuntu weena aryayekorera omutwaro gwe wenka.”—Gal. 6:5.

17. Nitugasirwa tuta twacwamu ebirikushemeza Yehova?

¹⁷ Twacwamu kurugiirira aha miteekateekyere ya Yehova, nitumwirira haihi. (Yak. 4:8) Naatusiima kandi naatuha n’emigisha. N’ekiraarugyemu, nitweyongyera kwikiririza omuri Tataitwe ow’omu iguru. N’ahabw’ekyo, ka tugyendere aha biragiro n’emisingye ya Baibuli, ahakuba nibyoreka emiteekateekyere ya Ruhanga aha nshonga zitari zimwe na zimwe. Hatariho kubanganisa, nitwija kuguma twine ebisya eby’okwega ahari Yehova. (Yob. 26:14) Kwonka na hati twateeraho munonga, nitubaasa kutunga obwengye, okumanya, n’okwetegyereza ebirikwetengyesa omu kucwamu gye. (Enf. 2:1-5) Ebiteekateeko n’entebeekanisa z’abantu abatahikiriire niziguma nizihindahinduka, kwonka omuhandiiki wa zaaburi naatwijutsya ati: “Enaama za Mukama zihamire ebiro byona, ebiteekateeko by’omu mutima gwe bigumaho okuhitsya obusingye bwona.” (Zab. 33:11) N’ahabw’ekyo, nitubaasa kucwamu gye ebiteekateeko byaitu n’ebikorwa byaitu byaba nibihikaana n’emiteekateekyere ya Yehova Ruhanga.