ABAMWE NIBAGIRA NGU NGAAHA. Omushaho omwe akagyeragyeranisa okukoresa obuhabuzi bwa Baibuli nk’okukoresa ekitabo kya chemistry ekyateirwe omu myaka ya 1920 kwegyesa abeegi. Omuntu otarikuha Baibuli ekitiinisa naabaasa n’okubuuza yaaba noobaasa kukoresa endagiriro ya kompyuta nkuru kukuhwera kwega kukoresa kompyuta ensya kandi eri aha murembe. Ekirikumanyisa ngu abamwe nibareeba Baibuli nk’ehaangwire.

Mbwenu shi ahabw’enki omuntu aine kukoresa obuhabuzi bwa ira omu biro ebi eby’okutunguuka kw’amaani omu by’obwengye? Nangwa n’emikura mingi ya Intaneeti neeyohereza obuhabuzi bwingi oburi aha murembe. Aha TV nihaba hariho abanyabwengye baingi, ab’emishono y’enjwara, n’abahandiiki baingi. Amateerero g’ebitabo nigakora esente nyingi garikushohoza ebitabo bingi munonga ebirikuhwera omuntu yaabyeshomera.

Ku haraabe hariho obuhabuzi obu oburikushohora buri dakiika, ahabw’enki omuntu aine kushwijuma Baibuli eyahandiikirwe emyaka nka 2,000 enyima? Mbwenu shi abatarikuha Baibuli ekitiinisa nibaba batahikire kugira ngu okukoresa ekitabo kya ira nk’ekyo kutunga obuhabuzi ni nk’okukoresa ekitabo kya chemistry ekihwaire aha murembe, nari endagiriro ya kompyuta ekuzire? Buzima emiteekateekyere egyo egwire. Saayansi n’okutunguuka omu by’obwengye nibihinduka ahonaaho, kwonka shi ebyetengo by’abantu ebikuru nabyo bihindukire? Na hati abantu nibakyenda kugira ekigyendererwa, okugira okushemererwa n’oburinzi, okukwatanisa omu maka, n’abanywani barungi.

Baibuli n’obu eraabe eri eya ira, neegamba aha nshonga ezo n’ezindi nyingi. Kandi neeyoreka ngu ekahandiikisibwa Omuhangi. Neebaasa kutuhabura omuri byona ebi turikukora n’okwetebeekanisiza embeera zigumire. (2 Timoseo 3:16, 17) Kandi neeha obuhabuzi oburikukora obwire bwona, obutarikubaasa kuhanguura! Baibuli neegira eti: “Ekigambo kya Ruhanga kiine amagara.”​—Abaheburaayo 4:12.

Baibuli buzima ehikire? Mbwenu shi ehaangwire, nari erimu obuhabuzi oburikukora, ekirikugireetera kuba ekitabo ekiine amagara? Ekigyendererwa ky’Omunaara gw’Omurinzi gw’omutaano ogu, ogw’okubanza ogwine ebicweka ebiraabe nibishoboorora aha nshonga emwe, niguza kukuhwera kutunga eby’okugarukamu by’ebibuuzo ebyo.