Mbwenu shi nitubaasa kugira obuhame ngu ebi Ruhanga arikuraganisa nibiija kuhikiirira? Yesu akaba naahamya ngu nibiija kuhikiirira, kandi ebi yaayegyeise bikareetera abamuhurikiize kugira okwikiriza. Yetegyereze eky’okureeberaho eki yaahaire omu Rubazo rwe orw’aha Rushozi, ekiri omuri Matayo 5:18: “Buzimazima nimbagambira nti: Eiguru n’ensi okuhitsya obu birihwaho, Ebiragiro tibirihwaho, n’obu yaakuba enyuguta emwe nari akatonyezi kamwe okuhitsya byona obu birihikiirizibwa.”

Enyuguta y’Oruheburaayo erikuhererukayo obukye ni י (yod), kandi niyo nyuguta y’Oruheburaayo ey’okubanza omu iziina rya Ruhanga, Yehova. * Okwongyerera aha bigambo n’enyuguta z’Ebiragiro bya Ruhanga, abahandiiki n’Abafarisaayo bakaba nibareeba buri ‘katonyezi’ nka kakuru munonga.

Yesu naabaasa kuba yaabaire naamanyisa ngu eiguru n’ensi nibaija kuhwaho omu mwanya gw’akashonshorekye kakye kubura kuhikiirizibwa. Kwonka, Ebyahandiikirwe nibituhamiza ngu eiguru n’ensi nibiija kugumaho ebiro byona. (Zaaburi 78:69) N’ahabw’ekyo ebigambo bya Yesu biine amakuru ngu nangwa n’akashonshorekye kakye omu Biragiro buzima nikaija kuhikiirira.

Mbwenu shi Yehova Ruhanga naafayo aha bushonshorekye bukye? Eego buzima. Teekateeka ahari eki: Abaisraeli aba ira bakagambirwa ngu tibaine kuhenda eigufa ry’omwana gw’entaama ogw’Okuhingurwaho. (Okuruga 12:46) Obundi aka kakaba kari akashonshorekye kakye. Mbwenu shi bakeetegyereza enshonga ahabw’enki baabaire bataine kuhenda eigufa na rimwe? Obundi ngaaha. Kwonka we Yehova akaba naamanya ngu akashonshorekye aka bukaba buri obunabi ngu tihariho na rimwe aha magufa ga Mesia eryabaire niriija kuhendwa yaaba naaza kufa ahanikirwe aha muti.​—Zaaburi 34:20; Yohaana 19:31-33, 36.

Ebigambo bya Yesu nitubyegaho ki? Naitwe nitubaasa kugira obuhame ngu byona ebi Yehova araganiise nibiija kuhikiirira, n’obushonshorekye bukye. Oku ka n’okuhamizibwa kw’amaani kuruga aha nyuguta nkye y’Oruheburaayo!