EBICWEKA eby’enyima nibyoreka oku oburemeezi butari bumwe na bumwe burikutureetera kureeba embeera nk’ezitarikubaasa kwemerwa. Waaba nooraba omu mbeera zigumire, noobaasa kwebuuza yaaba nikigasha kuguma ohuriire nari yaaba haine orikukufaho. Gira obuhame ngu Ruhanga naakufaho waaba oine amaganya. Ori ow’omuhendo ahariwe.

Omuhandiiki wa Zaaburi 86 naayoreka obwesigye omuri Ruhanga arikugira ati: ‘Aha kiro ky’okureeba enaku, ninyija kukutakira; ahakuba noija kungarukamu.’ (Zaaburi 86:7) Kwonka nabwo noobaasa kwebuuza oti: ‘Ruhanga naija kungarukamu ata ‘aha kiro ky’okureeba enaku’?’

N’obu Ruhanga araabe naabaasa kutaihaho oburemeezi bwawe ahonaaho, Ekigambo kye Baibuli, nikihamya ngu naabaasa kukuha obusingye bw’omu mutima kugumisiriza, kirikugira kiti: ‘Muteemereza omutima aha kintu kyona, kureka omuri byona mumanyise Ruhanga ebi murikwetenga omu kushaba n’okweshengyereza, kandi musiime. Kandi obusingye bwa Ruhanga oburengire okwetegyereza kw’omuntu weena, nibwija kuguma niburinda emitima yaanyu n’obwengye bwanyu.’ (Abafilipi 4:6, 7) Nyabura ’we yetegyereze oku Ebyahandiikirwe ebi birikutuhamiza ngu Ruhanga naatufaho.

‘Tihariho [kiteera-nkumba] na kimwe aharibyo ekirikweba omu maisho ga Ruhanga Muri ab’obuguzi okukira ebiteera-nkumba bingi.’​—Luka 12:6, 7.

KITEEKATEEKYEHO: Ruhanga naafayo aha bunyonyi bukye nk’ebiteera-nkumba. Tihariho na kamwe aku arikwebwa, buri kamwe n’ak’omuhendo ahariwe. Abantu n’ab’omugasho okukira ebiteera-nkumba. Omu bintu byona ebi Yehova yaahangire, abantu n’ab’omuhendo munonga, akabahanga omu ‘kishushani kye,’ kandi nibabaasa kugira emitwarize nk’eye bakore n’ebirikworeka ngu bagiine.​—Okutandika 1:26, 27.

‘Ai Mukama [Yehova], okancaaka, wammanya. Noomanyira hare ebiteekateeko byangye. Ongyeze, omanye ebiteekateeko byangye.’​—Zaaburi 139:1, 2, 23.

KITEEKATEEKYEHO: Ruhanga naakumanya gye. Naamanya enyehurira zaawe n’ebirikukwerarikiriza byona. N’obu abandi baakuba batarikwetegyereza gye oburemeezi bwawe, Ruhanga we naakufaho kandi naayenda kukuhwera. Ekyo nikyoreka ngu okuguma ohuriire n’eky’omugasho.

‘Hurira okushaba kwangye, ai Mukama [Yehova], n’okutaka kwangye kukuhikyeho. Ontegye okutu kwawe. Naija kuta omutima aha kushaba kw’enshoberwa.’​—Zaaburi 102:1, 2, 17.

KITEEKATEEKYEHO: Noobaasa kushusha ngu kuruga obu okubonabona kwatandika, Yehova atwire naahandiika omuhendo gw’amarira g’abantu boona. (Zaaburi 56:8) Eki nikitwariramu amarira gaawe. Ruhanga naamanya okugyezibwa kwawe n’amarira gaawe ahakuba ori ow’omuhendo ahariwe.

‘Otahahaaza omutima, ahabw’okuba ndi Ruhanga waawe. Ninyija kukuha amaani, nkuhwere ahabw’okuba nyowe, Mukama Ruhanga waawe, ninkugira nti: Otatiina, naija kukuhwera.’​—Isaaya 41:10, 13.

KITEEKATEEKYEHO: Ruhanga ayeteekateekire kukuhwera. Ku oraagwe ahansi, naija kukwihaho.

‘Ruhanga akakunda ensi, yaahayo Omwana we omwe nyamunegyere, ngu omuntu weena orikumwikiriza arekye kuhwerekyerera, kureka atungye amagara agatahwaho.’​—Yohaana 3:16.

KITEEKATEEKYEHO: Ori ow’omuhendo munonga ahari Ruhanga, akahayo n’Omwana we, Yesu nk’ekitambo ahabwawe. Ekitambo nikikubaasisa kugira amatsiko g’okugumaho ebiro byona oshemereirwe oine n’ekigyendererwa. a