Nabi Musa akagira ngu twayorobera ebiragiro bya Ruhanga, naatuha emigisha ye. (Eky’Ebiragiro 10:13; 11:27) Titurikworobera Ruhanga ahabw’okutiina kutufubira. Emitwarize mirungi ya Ruhanga neetuhiga kumworobera ahabw’okumukunda, n’okutenda kukora ekintu kyona ekirikumugwisa kubi. “Oku nikwo kukunda Ruhanga, itwe okworobera ebiragiro bye.”​—1 Yohaana 5:3.

Kwonka shi okworobera Ruhanga nikurugamu kuta emigisha? Yetegyereze emiringo ebiri.

“Niinye [Yehova] Ruhanga waawe orikukwegyesa eby’okukugasira, nkakwebembera omu muhanda ogu oshemereire kutoora.”​—ISAAYA 48:17.

Yehova Ruhanga, Omuhangi waitu naatumanya kandi naatuha obuhabuzi oburikwetengyesa. Twaba nitwenda ngu enyegyesa ze zituhwere kucwamu gye, twine kwega Ebyahandiikirwe Ebirikwera kumanya eki Ruhanga arikwenda ngu tukore, reero tukikore.

‘Okukira abaine [okushemererwa] n’abarikuhurira ekigambo kya Ruhanga bakakyorobera!’​—LUKA 11:28.

Obunaku obu, obukaikuru bw’abantu abarikworobera Ekigambo kya Ruhanga nibatunga okushemererwa okwabuzima. Nk’eky’okureeberaho, teekateeka aha mushaija omuri Spain owaabaire aine ekiniga ky’amaani, kandi arikutwariza kubi abandi otwariiremu n’omukazi we. Eizooba rimwe akashoma ebigambo bya nabi Musa ebirikukwata aha kutwaza gye kwa Yosefu, mutabani wa Yakobo. Yosefu bakamuguza omu buhuuku, kandi yaateebwa omu kihome omu muringo gutari gw’oburingaaniza, kwonka akaguma atuurize, aikaikaine, kandi arikusaasira. (Okutandika, eshuura 37-45) Omushaija ogwo omuri Spain naagira ati: “Okuteekateeka ahari Yosefu kikampiga kutwaza gye, kugira embabazi, n’okwerinda. N’ekirugiremu, hati nyine okushemererwa.”

Ebyahandiikirwe Ebirikwera nibituhabura oku twine kutwariza abandi. Yongyera kwetegyereza eki omu kicweka ekirikukurataho.