Ruhanga akaraganisa nabi Abrahamu ngu ensi yoona ekaba neija kuheebwa omugisha kurabira omuri omwe ahari baijukuru be. (Okutandika 22:18) Mbwenu shi akaba naija kuba oha?

Emyaka nka 2,000 enyima, Ruhanga akaha Yesu mwijukuru wa Abrahamu amaani g’okukora eby’okutangaaza by’amaani. Eby’okutangaaza ebyo bikooreka ngu ekiraganiso eki Abrahamu yaahairwe Ruhanga kikaba nikiza kuhikiirira omuri Yesu.​—Abagalatia 3:14.

Eby’okutangaaza ebi Yesu yaakozire bikahamya ngu niwe ou Ruhanga atooraine kuha abantu emigisha, kandi bikooreka oku Ruhanga arikwija kumukoresa kuha abantu emigisha ey’obutwire. Yetegyereze oku eby’okutangaaza ebi Yesu yaakozire birikworeka emitwarize ye erikushemeza.

Embabazi​—Yesu akakiza abarwaire.

Eizooba rimwe, omubembe akeeshengyereza Yesu kumukiza. Yesu akamukwataho reero yaamugira ati: “Ninkunda!” Ahonaaho, ebibembe bikamurugaho.​—Mako 1:40-42.

Obufura​—Yesu akariisa abaine enjara.

Yesu akaba atarikwenda abantu baitwe enjara. Emirundi erengire gumwe, akakora eby’okutangaaza yaariisa abantu baingi arikukanyisa emigaati n’eby’enyanja. (Matayo 14:17-21; 15:32-38) Bwanyima y’okurya, boona bakaiguta kandi ebindi byatsigaraho.

Esaasi​—Yesu akazoora abafu.

‘Ahabw’esaasi,’ Yesu akazoora mutabani w’omukazi efaakazi omwe heza owaabaire aine amaganya kandi ataine kireeberera.​—Luka 7:12-15.