Don na Margaret * bakashemererwa obu muhara waabo n’abaana be baabatayaayiire. Aha izooba ry’okugarukayo, Margaret owaahuumwire, owaabaire ari omukugu omu kuteeka akateekyera abaijukuru be eby’okurya ebi barikukunda munonga amakuroni n’amajuta.

Boona ku baabaire bashutami, Margaret akareeta eby’okurya ebi yaabaire ateekire yaabita aha meeza. Ku yaafundwire ebakuri, boona baakwata aha munwa. Omu bakuri hakaba harimu amajuta gonka. Margaret akaba ayeebirwe kutamu amakuroni!

Yaaba nitumanya bingi nari turi bato, twena nitukora enshobi. Nitubaasa kugamba ekigambo ekitarikushemeza abandi nari tukore ekintu omu bwire obutahikire nari twebwe kukikora. Ahabw’enki enshobi nizibaho? Nitubaasa kukora ki twakora enshobi? Nitubaasa kuzetantara? Okugira emiteekateekyere mirungi aha nshobe nikiija kutuhwera kugarukamu ebibuuzo ebi.

Hagira eki twakora gye, nitushemererwa baatusiima ahabw’ekyo eki twakora. Twakora enshobe n’obu twakuba tutakigyendereire nari abandi baaba batakimanyire, tushemereire kuzikiiriza. Twine kuba abacureezi kubaasa kukora ekyo.

Twayeteekateekaho munonga, nitubaasa kutandika kuteekateeka ngu enshobe ei twakora ninkye, tujunaane abandi nari twehakane enshobe ei twakora. Twatwaza tutyo tihakurugamu karungi na kakye. Oburemeezi nibubaasa kugumaho butashoboroirwe kandi tujunaane abantu abataine mushango. Kwonka n’obu twakujunaana abandi ahabw’eki twakora, twijukye ngu ahamuheru gwa byona, “buri omwe omuriitwe aryegambira, naayetonganira ahari Ruhanga.”​—Abarooma 14:12.

Ruhanga aine emiteekateekyere eringanaire aha nshobe zaitu. Omuri Zaaburi, Ruhanga nagambwaho ‘nk’omunyambabazi kandi omusaasizi’; kandi “tariguma naahana obutoosha n’obu kwakuba okuguma n’ekiniga ebiro byona.” Naayetegyereza obuhangwa bwaitu naamanya ngu tituhikiriire, “naijuka ku turi omucuucu.”​—Zaaburi 103:8, 9, 14.

Okwongyera ahari ekyo, nka ishe abaana oine embabazi, Ruhanga naayenda ngu naitwe abaana be, tureebe enshobe nk’oku arikuzireeba. (Zaaburi 130:3) Ekigambo kya Ruhanga kirimu obuhabuzi bwingi oburikubaasa kutuhwera twakora enshobe nari abandi baakora enshobe.

Obwire obwingi,omuntu ku arikukora enshobe, atandika kujunaana abandi nari atandika kwehozaho. Omu mwanya gw’ekyo, ebigambo byawe byagwisa kubi abandi, shaba okusaasirwa, oteereza enshobi yaawe orinde omukago gwawe n’omuntu ogwo. Orakozireho enshobe ekareetera abandi kugwibwa kubi nari okeehurira kubi? Omu mwanya gw’okwecwera orubanja nari okwekwatsa abandi, kora kyona ekirikubaasika okuteereza enshobi. Orubanja twaruta aha bandi nikiija kwongyeraho  oburemeezi ahagati yaitu n’abandi. Kureka, twine kugira eki twayegyera aha nshobe zaitu kandi tukazishoboorora.

Abandi baakora enshobe, kyorobi kubatwariza kubi nari kworeka enyehurira zaitu. Ni kirungi kukuratira obuhabuzi bwa Yesu obu yaagira ati: “N’ahabw’ekyo byona ebi mwenda ngu abantu babagirire, naimwe mube nikwo mwabagirira.” (Matayo 7:12) Ku orikukora enshobe, nangwa n’egyo erikureebeka nka nkye munonga, hatariho kubanganisa nooba nooyenda ngu abandi bakutwarize omu muringo gw’embabazi nari beehuzye enshobe ei waakora. Mbwenu shi ahabw’enki otarikuteeraho kugirira abandi embabazi?​—Abaefeso 4:32.

Kashoboorozi emwe n’eshoboorora ngu enshobe niziruga “omu kucwamu kubi, okutatunga okumanya okuhikire nari kuremwa kufayo aha kintu.” Obumwe n’obumwe, twena nitubaasa kutwaza tutyo kandi tukore enshobe. Kwonka, nitubaasa kukora enshobe nkye twashwijuma emisingye emwe ey’omu Byahandiikirwe.

Gumwe aha misingye egi guri omu Enfumu 18:13: “Ogarukamu atabandize kuhurira kyoreka obushema bwe n’okuhemuka.” Buzima okubanza twayetegyereza ekiriho tutakagambire nikiija kuturinda kutarahuka kugamba nari kugamba kubi. Nitwija kwetantara enshobe ezirikuretwaho okutagira okumanya okuhikire twateeraho kuhurikiza gye.

Omusingye ogundi oguri omu Baibuli nigugira guti: “Ku kiraabe nikibaasika aha rubaju rwanyu, mutuurane n’abantu boona n’obusingye.” (Abarooma 12:18) Teeraho kuguma noorinda obusingye kandi okwataniise n’abandi. Waaba nookora n’abandi, yoreka ngu nobafaho kandi noobaha ekitiinisa kandi teeraho kubasiima n’okubagaruramu amaani. Omu mbeera nk’egyo, hakoresibwa ebigambo ebitari birungi nari enshobi ekabaho nikiija kworoba kugyehuzya nari kusaasira kandi enshobe ezigumire niziija kworoba kushoboororwa, kandi twaba tukozire enshobi y’amaani nikiija kutworobera kugitereeza.

Teeraho kugira eki waayega omu nshobe ei waakora. Omu mwanya gw’okusherura obushonga bw’okwekwatsakwatsa ahabw’eki waakora nari eki waagamba, koresa omugisha ogu kumanya emitwarize ei oine kugira.Mbwenu shi nooyetenga kugira omutwarize gw’okugumisiriza, embabazi nari okwerinda? Kandi shi obucureezi, obusingye nari rukundo? (Abagalatia 5:22, 23) Ekindi eki orikubaasa kwega n’okutagarukamu enshobe egi obundi. Bwanyima y’okukora enshobe, reka kuta omutima aha ku orikwehuurira. Emiteekateekyere mirungi neebaasa kuhwera kwikaikanisa embeera.

Okugira emiteekateekyere mirungi aha nshobe nikiija kutuhwera haabaho enshobe. Nitwija kugira obusingye kandi tubugire n’abandi. Twateereho kwegyera aha nshobe zaitu, nitwija kuba abanyabwengye kandi abantu nibiija kutukunda. Nitwija kwetantara kwereeba nk’abatarikubaasa nari kweteekateekaho kubi. Okumanya ngu abandi n’abo nibateeraho kurwanisa enshobe nkaiwe nikiija kukwiriza haihi n’abo. Ekikuru munonga, nitubaasa kugasirwa twayega kutooreza Ruhanga oine rukundo kandi orikusaasira.​—Abakolosai 3:13.

Mbwenu shi enshobe eyaaba yaagambirweho ei Margaret yaakozire ekashiisha okutaayaaya kwabo? Ngaaha. Boona kikabatangaaza, okukira munonga Margaret, kandi barya emboga zonka hatariho amakuroni! Emyaka ku yaahingwire, abaijukuru be bombi bakakiteebezaho abaana abu baazaire kandi kikabaijutysa obu bataayaayira ishenkuru na nyinenkuru bo. Ahakuba ekaba eri enshobe kwonka!