NKABA naatandikire kukunda amazima g’omu Baibuli. Maawe akaba aine ebitabo ebirikushoboorora Baibuli, kandi nkaba ninkunda ebirimu, okukira munonga ebishushani. Tata akaba atarikwenda ngu maawe anyegyese ebi yaabaire naayega. Kwonka, nkaba niinyenda kumanya kandi nkaba mbuuza maawe ebibuuzo, n’ahabw’ekyo akaba anyegyesa Baibuli tata yaaba atariho. N’ekyarugiremu, naanye nkacwamu ngu niinyenda kwehayo ahari Yehova. Nk’abatirizibwa omuri Blackpool, England, omu 1943 nyine emyaka ikumi.

Kuruga obu naabatizibwa, nyowe na maawe tukaba tubuurira hamwe obwire obwingi. Omu kubuurira, tukaba nitukoresa obwoma oburiho embazo. Bukaba niburemeera nka kiro ina n’ekicweka. Teera akashushani nyowe, omwojo muto, ndikukiriza kamwe aharibwo!

Ndikuza kuhitsya emyaka 14, nkaba ninyenda kuba payoniya. Maawe akangira ngu nshemereire kubanza naagambaho n’omuheereza w’ab’eishe-emwe (omureeberezi orikutaayaayira ebibiina hati). Akampabura ngu nteereho  kugira eki naayega kubaasa kwebaisaho ndikuheereza nka payoniya. N’ahabw’ekyo, ekyo nikyo naakozire. Bwanyima y’okukora emyaka ebiri, nkagaaniiraho n’omureeberezi ondiijo orikutaayaayira ebibiina aha bikwatiraine n’okuba payoniya. Akangira ati: “Ba nikyo waakora!”

Omu Apuri 1949, nyowe na maawe tukaguza ebintu byaitu ebi twabaire twine omu nju ei twabaire nituraaramu reero twaza omuri Middleton, haihi na Manchester, ahu twatandikire kuheereza nka baapayoniya. Bwanyima y’ameezi ana, nkatunga ow’eishe-emwe w’okuguma nimbuurira nawe. Ofiisi y’eitaagi ekatushaba kuza kuheereza omu kibiina kisya ekyabaire kitandikirweho omuri Irlam. Maawe na munyaanyazi-itwe ondiijo bakagumizamu nibaheereza nka baapayoniya omu kibiina ekindi.

N’obu ndaabe naabaire nyine emyaka 17, nyowe n’ou naabaire nimbuurira nawe tukaheebwa obujunaanizibwa bw’okwebeembera enteerane ahakuba omu kibiina hakaba harimu ab’eishe-emwe bakye abaabaire nibahikiiriza ebirikwetengyesa. Bwanyima, nkashabwa kuza omu kibiina kya Buxton, ekyabaire kiine ababuurizi bakye kandi kirikwetenga obuhwezi. Butoosha nkaba ndeeba ebi naabaire nindabamu obwire obwo nk’okutendekwa kw’omu biro by’omumaisho.

Omu mwaka gwa 1951, nkaijuza foomu y’okuza omu ishomero rya Gileadi. Kwonka, omu Okwaikumi-n’abiri 1952, nketwa kuza omu mahe. Nkateekateeka ngu bakaba nibaza kundeka ahabw’okugira ngu nkaba ndi omuheereza ow’obutwire, kwonka kooti ekyo terakikiriize kandi ekacwamu ngu nk’omwe emyaka mukaaga  omu kihome. Ku naabaire ndi omu kihome, nkatunga ebaruha erikunyeeta omu ishomero rya Gileadi erya 22. N’ahabw’ekyo omu Okwamushanju 1953, nkaba ndi aha meeri erikwetwa Georgic, ndikuza New York.

Ku naahikireyo omuri 1953, nkabaasa kuza omu Ruteerane Oruhango hati orw’ekiro kimwe orwabaire rwine omutwe Abantu b’Ensi Ensya. Bwanyima nkakoresa egaari y’omwika kuza South Lansing, New York, ahu eishomero ryabaire riri. Nibwo naabaire naaruga omu kihome, nkaba nyine sente nkye. Ku naarugire omu gari y’omwika, nkaba nyine kukwata baasi kuza omu South Lansing, kandi nkeeguza sente z’okushashura, aha muntu omwe ou naabaire ndi nawe omu baasi egyo.

Eishomero rya Gileadi rikatutendeka gye kutuhwera ngu ‘ahari boona tuhinduke byona,’ omu murimo gw’obumiisani. (1 Kor. 9:22) Twena bashatu, Paul Bruun, Raymond Leach, naanye, tukashabwa kuza omuri Philippine. Tukaba twine kutegyereza ameezi maingi kutunga ebipapura ebirikutwikiriza kugyenda, kwonka tukatandika kugyendera aha ryato kurabira Rotterdam, aha nyanja ya Mediterranean, aha mugyera Suez, aha nyanja empango erikwetwa Indian Ocean, Malaysia, na Hong Kong, kumara ebiro 47 turikugyendera aha maizi! Bwanyima tukahika Manila omu Okwaikumi-na-kumwe 19, 1954.

Tukaba twine kukora empindahinduka kubaasa kumanyiira abantu basya, omwanya musya, n’orurimi rusya. Kwonka, twena bashatu tukashabwa kuza omu kibiina ekiri omu rurembo Quezon, ahu abantu baingi baabaire nibagamba Orungyereza. Bwanyima y’ameezi mukaaga, tukaba nitumanya ebigambo bikye omu rurimi rwa Tagalog. Ahu twabaire nituza kugaruka kuheereza niho haabaire nihaija kumaraho oburemeezi obwo.

Eizooba rimwe omuri Mei 1955 ku twahikire omuka turikuruga kubuurira, nyowe n’Ow’eishe-emwe Leach tukashanga amabaruha omu nju yaitu. Tukashanga ngu tukaba tushabirwe kuza kuheereza nk’abareeberezi abarikutaayaayira ebibiina. Nkaba nyine emyaka 22, kwonka obuheereza obu bukampa omugisha ‘gw’okuhinduka byona ahari boona’ omu miringo misya.

Nk’eky’okureeberaho, nkaha orubazo rwangye rw’okubanza nk’omureeberezi orikutaayaayira ebibiina aheeru y’eduuka. Bwanyima nketegyereza ngu obwire obwo gukaba guri omuze gwabo omuri Philippine kuha orubazo rw’abantu boona aheeru ahu abantu bari! Ku naabaire ntaayaayira ebibiina, nkaba mpa embazo aheeru ahu abantu barikukira kushutama, omu butare, omu maisho g’ebyombeko, aha bishaayi by’omupiira, ahu abantu barikuhuumurira omushana, n’ahandi. Eizooba rimwe omu rurembo rwa San Pablo, hakagwa enjura nyingi eyaandemeise kuha orubazo omu katare, n’ahabw’ekyo nkagambiraho ow’eishe-emwe omwe ow’obujunaanizibwa ngu tuze omu Kyombeko ky’Obukama. Bwanyima, ab’eishe-emwe bakabuuza yaaba orubazo oru nirubaasa kugambwaho nk’orubazo rw’abantu boona, ahabw’okugira ngu tirurabaire heeru ahu abantu bari!

Tukaba nitukira kuraara omu maka g’ab’eishe-emwe. N’obu baraabe baabaire baine amaka g’ekyooro, gakaba gaba gacumire gye. Obwire bwingi nkaba nindaara aha mukyeka obwo ahansi ziri embaaho. Tukaba tutaine binaabiro birungi by’okunabiramu, n’ahabw’ekyo nkeega kunaaba njwaire emyenda. Nkaba ngyendera omu baasi kandi obundi gyendera omu bwato naba ninza aha birwa ebindi. Emyaka yoona ei naahitsya omu buheereza, tinkangirahoga motoka.

Okwejumba omu kubuurira n’okutaayaayira ebibiina bikampwera kwega orurimi rwa Tagalog. Tihaine owaanyegyeise orurimi orwo, kureka nkaba mpurikiza ab’eishe-emwe omu kubuurira n’omu nteerane. Ab’eishe-emwe bakaba nibenda kumpwera, kandi nkabasiima ahabw’okungumisiriza n’okumpabura omu mazima.

 Ku haahingwireho obwire, obuheereza busya obu naatungire bukampiga kukora empindahinduka. Omuri 1956 obu Ow’eishe-emwe Nathan Knorr yaatutaayaayira, nkashabwa kukora aha nshonga z’abantu aha ruteerane ruhango. Nkaba ntarikumanya eki nyine kukora, n’ahabw’ekyo abandi bakampwera. Ku haahingwireho ameezi makye, tukatebeekanisa oruteerane orundi kandi Ow’eishe-emwe Frederick Franz kuruga aha ofiisi enkuru akatutaayaayira. Obwo ndikuheereza nk’omureeberezi orikutaayaayira ebibiina, nkegyera aha w’eishe-emwe Franz okukora empindahinduka kuhikaana n’eki abantu barikwenda. Ab’eishe-emwe bakashemererwa kureeba Ow’eishe-emwe Franz arikuha orubazo ajwire barong Tagalog, ekijwaro ky’obuhangwa omuri Filipino.

Nkaba nyine kukora empindahinduka nyingi obu naatandika kuheereza nk’omureeberezi wa disiturikiti. Obwire obwo, tukooreka vidiyo The Happiness of the New World Society, haihi buri izooba omu myanya eyaabaire erimu abantu bingi. Obundi, tukaba tuteganisibwa obukooko. Bukaba bureeba ekyererezi reero butaaha omu porogyekita. Gukaba guri omurimo gw’amaani okuboneza porogyekita twaheza! Kikaba kitoorobi kworeka vidiyo ezi, kwonka kikaba nikigaruramu amaani kureeba abantu nibasiima kandi barikwetegyereza ekibiina kya Yehova omu nsi yoona.

Abeebembezi b’ediini y’Abanyakaturiki bakaba bagyemesereza abantu abamwe ngu batatwikiriza kugira enteerane. Nari bakaba bateeraho  kututeganisa barikuteera ebide by’ekanisa, embazo zaaba niziheebwa omu mwanya oguri haihi n’amakanisa gaabo. Kwonka, omurimo gukaguma nigutunguuka, kandi baingi omu bicweka ebyo hati n’abaheereza ba Yehova.

Omuri 1959, nkatunga ebaruha erikworeka ngu nyetsirwe kuheereza aha ofiisi y’eitaagi. Eki kikarugamu kwega ebintu bingi. Ku haahingwireho obwire, nkashabwa kuza kutaayaaya omu mahanga agandi nk’omujwekyerwa wa ofiisi enkuru. Omu kutaayaaya kumwe, nkabugana Janet Dumond, omumiisani omuri Thailand. Tukaguma nitugaaniira hamwe kumara obwire, kandi bwanyima twataaha omu bushwere. Twahitsya emyaka 51 omu bushwere turikuheereza hamwe tushemereirwe.

Omuri byona, ntungire omugisha gw’okutaayaayira abaheereza ba Yehova omu mahanga 33. Ninshemererwa munonga ahabw’okugira ngu okutendekwa oku naatungire enyima kukampwera kwetebeekanisa kukora n’abantu b’emiringo mingi! Okutaayaaya okwo kukampwera kwetegyereza oku Yehova ainiire abantu b’emiringo yoona rukundo.​—Byak. 10:34, 35.

Buzima ka n’omugisha gw’amaani okuheereza n’ab’eishe-emwe omuri Philippine! Omubaro gw’ababuurizi obunaku obu hati gweyongyeire emirundi ikumi okukira obu naatandika kuheereza aha. Nyowe na Janet nitugumizamu kuheereza hamwe aha ofiisi y’eitaagi omuri Philippine omu rurembo Quezon. N’obu ndaabe mmazire emyaka 60 nimpereza omu ihanga erindi, nabwo nyine kuba nyeteekateekire kukora empindahinduka kuhikaana n’eki Yehova arikwenda. Empindahinduka eziherize kukorwa omu kibiina nizitwetengyesa kuguma tweteekateekire kuhindura omu ku turikuheereza Ruhanga n’ab’eishe-emwe.

Tukozire kyona ekirikubaasika kukuratira obuhabuzi bwa Yehova, kandi kitureeteire okumarwa. Tutaireho n’okukora empindahinduka kuheereza gye ab’eishe-emwe. Eego, Yehova yaaba nikyo arikwenda, tumaririire ‘Ahari boona kuhinduka byona.’