Entumwa Paulo naagamba ahari Yehova * nka “Ruhanga ow’okuhuumuza kwona, otuhuumuza omu busaasi bwaitu bwona.” (2 Abakorinso 1:3, 4) N’ahabw’ekyo Baibuli neetuhamiza ngu tihariho muntu orikubaasa kurema Ruhanga kumuhwera kandi ngu tihariho kagwe aku Ruhanga atarikubaasa kutuhuumurizamu.

Kwonka naitwe nituba twine kugira eki twakora twaba nitwenda ngu Ruhanga atuhuumurize. Mbwenu shi omushaho naabaasa kutuhwera ata twaba tutakozire entebeekanisa y’okumureeba? Nabi Amosi naabuuza ati: “Nimugira ngu abantu babiri nibabaasa kugyenda hamwe bataikirizaine?” (Amosi 3:3) N’ahabw’ekyo Ebyahandiikirwe nibituhiga biti: “Mwirire haihi Ruhanga, nawe abone kubairira haihi.”​—Yakobo 4:8.

Nitubaasa kuhamya tuta ngu Ruhanga naija kutwirira haihi? Eky’okubanza, emirundi mingi  naatugambira ngu naayenda kutuhwera. (Reeba  akabokisi k’ekicweka eki.) Ekya kabiri, twine obujurizi kuruga aha bantu abu Ruhanga yaahuumuriize aba ira n’ab’obunaku obu.

Nka baingi abarikusherura obuhwezi ahari Ruhanga, Omugabe Daudi akaba naamanya gye ebirikukwata aha kagwe. Rimwe akeeshengyereza Yehova ati: “Ohurire eiraka ry’okweshengyereza kwangye.” Ruhanga akamugarukamu? Eego. Daudi akoongyeraho ati: “Omutima gwangye gumwesigire, naahwerwa.”​—Zaaburi 28:2, 7.

Ruhanga akagyenderera ngu Yesu agire obujunaanizibwa bukuru omu kuhuumuriza abantu. Ruhanga akaha Yesu obujunaanizibwa bwingi otwariiremu ‘n’okushemba abacwekire emitima’ hamwe ‘n’okuhuumuriza boona abarikuganya.’ (Isaaya 61:1, 2) Nk’oku kyabaire kigambirwe, Yesu akaba naafayo aha bantu “abaruhire n’abaremereirwe.”​—Matayo 11:28-30.

Yesu akahuumuriza abantu arikubaha obuhabuzi burungi, arikubatwariza gye, nangwa n’obundi arikubakiza endwara zaabo. Eizooba rimwe omubembe akeeshengyereza Yesu ati: “Ku oraabe nookunda, noobaasa kunshemeza.” Yesu akahigwa esaasi yaagarukamu ati: “Ninkunda; shemera!” (Mak. 1:40, 41) Omubembe akakira.

Hati, Omwana wa Ruhanga tari omu nsi kutuhuumuriza butunu. Kwona Ishe, Yehova, “Ruhanga ow’okuhuumuza kwona,” naagumizamu kuhwera abarikwetenga obuhwezi. (2 Abakorinso 1:3) Yetegyereze emiringo ena ei Ruhanga arikukoresa kuhuumuriza abantu.

• Baibuli. “Ebyahandiikirwe ira byona bikahandiikwa kutwegyesa, ngu tubone kugira amatsiko ahabw’okugumisiriza, n’ahabw’okuhuumuzibwa Ebyahandiikirwe ebyo.”​—Abarooma 15:4.

• Omwoyo gwa Ruhanga Ogurikwera. Hahingwireho akaire kakye Yesu aherize kufa, ekibiina kyona Ekikristaayo kikaza omu bwire bw’obusingye. Ahabw’enki? Abakristaayo bakaba “nibagyendera omu kutiina Mukama, bahangainwe” omwoyo gurikwera. (Ebyakozirwe 9:31) Amaani ga Ruhanga nari shi omwoyo gurikwera gwine amaani maingi. Ruhanga naabaasa kugukoresa kuhuumuriza buri omwe omu mbeera zoona.

• Okushaba. Baibuli neetuha obuhabuzi obu: “Muteemereza omutima aha kintu kyona.” Omu mwanya gw’ekyo, neegira eti: “Mumanyise Ruhanga ebi murikwetenga omu kushaba n’okweshengyereza, kandi musiime. Kandi obusingye bwa Ruhanga oburengire okwetegyereza kw’omuntu weena, buryaguma burinde emitima yaanyu n’obwengye bwanyu.”​—Abafilipi 4:6, 7.

• Abakristaayo Bagyenzi Baitu nibabaasa kuba banywani baitu abaabuzima abu turikuhungiraho omu mbeera zigumire kutuhuumuriza. Entumwa Paulo akagamba ahari bagyenzi be nk’abarikumuhuumuriza “omu kushoberwa n’omu kubonabona.”​—Abakolosai 4:11; 1 Abatesalonika 3:7.

Kwonka noobaasa kuba nooyebuuza oku ebi byona birikubaasa kuteebwa omu nkora. Ka twetegyereze ebyahikire aha bantu abaatungire oburemeezi abaagambwaho aha kutandika. Nkabo, noija kureeba ngu na hati Ruhanga naakihikiiriza eki yaaraganiise ati: “Nk’oku nyina w’omwana amurembesereza, nikwo ndibarembesereza.”​—Isaaya 66:13.