Waaba nooyenda kugira eki waakora, noobaasa kwebuuza oti: ‘Nikiija kungasira kita?’ Mbwenu shi tiky’obwengye, kubuuza ekibuuzo nk’ekyo aha bikwatiraine n’okushaba? Ngaaha. Omu buhangwa nituba nitwenda kumanya oku turikugasirwa omu kintu tutakakikozire.

Omu kicweka eky’enyima, tureebire obuhame ngu okushaba ti kikorwa ky’ediini ekirikuhwera abantu kuba gye kwonka. Ruhanga ow’amazima naahurira okushaba kwaitu. Twashaba omu muringo murungi kandi tukashaba ebihikire, naatuhurira. Buzima, naatuhiga kumwirira haihi. (Yakobo 4:8) N’ahabw’ekyo, nitubaasa kugira matsiko ki twaba nitukira kushaba? Ka tureebe emwe aha migasho.

Ku orikutunga oburemeezi n’emirabanamu, nooyerarikirira ohwamu amaani? Baibuli neetuhiga ‘kushaba obutoosha’ omu bunaku nk’obwo kandi ‘tumanyise Ruhanga ebi turikwetenga.’ (1 Abatesalonika 5:17; Abafilipi 4:6) Baibuli neetuhamiza ngu twashaba, “obusingye bwa Ruhanga oburengire okwetegyereza kw’omuntu weena,” nibwija kurinda emitima yaitu n’obwengye bwaitu. (Abafilipi 4:7) Nitubaasa kutunga obusingye twagambira Tataitwe ow’omu iguru ebirikutwerarikiriza. Kandi naatuhiga ngu tukikore. Zaaburi 55:22 neegira ngu yegyekyera Yehova “omutwaro gwawe, nawe aryaguma naakukwatirira.”

Abantu baingi munonga omu nsi yoona batungire obusingye obu. Hee Ran, kuruga South Korea, naagira ati: “N’obu ndikuba nyine oburemeezi bw’amaani, ku ndikuheza kushaba, nimpurira naagira oburuhuuko kandi nimpurira naagira amaani g’okugumisiriza.” Cecilia, kuruga Philippines, naashoboorora ati: “Ahabw’okugira ngu ndi omuzaire,  ninyerarikirira munonga ahari bahara bangye na maawe, hati otarikubaasa kummanya. Kwonka ahabw’okushaba, nimbaasa kugumizamu ninkora emirimo yangye y’obutoosha ntaine kwerarikirira kwingi. Nimmanya ngu Yehova naija kumpwera.”

Oine amaganya agarengyesereize, obundi orwaire nari ori omu mbeera mbi? Waashaba “Ruhanga ow’okuhuumuza kwona” naija kukuhuumuriza. Baibuli neegira ngu naatuhuumuriza “omu busaasi bwaitu bwona.” (2 Abakorinso 1:3, 4) Nk’eky’okureeberaho, eizooba rimwe obu Yesu yaabaire aine amaganya mingi, akatsimba “amaju, yaashaba.” Niki ekyarugiremu? ‘Maraika akamweyoreka  naaruga omu iguru, yaamugumya.’ (Luka 22:41, 43) Omushaija ondiijo omwesigwa, Nehemia, akateganisibwa abantu babi abaabaire nibenda kuremesa omurimo gwa Ruhanga. Akashaba ati: “Ai Ruhanga, gumya emikono yangye.” Ebyabaireho nibyoreka ngu buzima Ruhanga akamuhwera kutatiina kandi yaaba omusinguzi omu kukora omurimo gwe. (Nehemia 6:9-16) Reginald, kuruga Ghana, naayegambaho aha bikwatiraine n’okushaba: “Ku ndikushaba, na munonga omu buremeezi bwingi, nimba nimmanya ngu naagambira omuntu orikubaasa kumpwera kandi orikumpamiza ngu tinshemereire kutiina.” Buzima, Ruhanga naabaasa kutuhuumuriza twamushaba.

Ebimwe ebi turikucwamu nibibaasa kutukwataho munonga hamwe n’abakundwa baitu. Nitubaasa kucwamu tuta omu muringo gw’obwengye? Baibuli neegira eti: “Omuriimwe ku haraabe harimu obuzirwe obwengye [na munonga omu kusingura oburemeezi], abushabe Ruhanga, oha boona n’omutima ogutarikwima, n’obu kwakuba okweshaanya, kandi aryabuheebwa.” (Yakobo 1:5) Twashaba kutunga obwengye, Ruhanga naabaasa kukoresa omwoyo gwe gurikwera kutuhabura kucwamu gye. Buzima, nitubaasa kushaba kutunga omwoyo gurikwera, ahakuba Yesu naatuhamiza ngu Tataitwe ow’omu iguru naija kuha omwoyo gurikwera abo abarikumushaba.—Luka 11:13.

Nangwa na Yesu akamanya ngu nikyetengyesa kushaba Ishe kumuhwera kucwamu gye. Baibuli neegira ngu obu yaabaire naayenda kutoorana abashaija 12 abaabaire nibaija kuba entumwa ze, akamara “ekiro naashaba Ruhanga.”—Luka 6:12.

Nka Yesu, baingi obunaku obu bagizire obuhame ahabw’okureeba Ruhanga naabagarukamu baamushaba obuhwezi kucwamu gye. Regina, kuruga Philippines, naagamba aha buremeezi bwingi obu atungire, nk’okwereeberera hamwe n’eka ye bwanyima ya iba kufa, okufeerwa omurimo, n’okugumirwa kworora abaana. Niki ekyamuhwereire kucwamu gye? Naagira ati: “Niinyesiga Yehova kumpwera kurabira omu kushaba.” Kwabena, kuruga Ghana, naatugambira ahabw’enki yaashabire Ruhanga obuhwezi ati: “Nkafeerwa omurimo gwangye murungi ogw’okwombeka. Ntakacwiremu butoosha nkaba nshaba Yehova obuhwezi kugira ngu ncwemu gye.” Naayongyeraho ati: “Nimpurira nyine amaani ahabw’okugira ngu Yehova akampwera kucwamu omurimo ogurikumbaasisa kwereeberera omu by’omwoyo n’omu by’omubiri.” Naiwe noobaasa kutunga obuhabuzi bwa Ruhanga orikushaba aha bikwatiraine n’omukago gwawe nawe.

Twagamba aha bintu bikye oku okushaba kurikubaasa kutuhwera. (Kubaasa kureeba eby’okureeberaho ebindi, reeba akabokisi “ Emigasho y’Okushaba.”) Kwonka kubaasa kutunga emigasho egi, nooba oine kubanza waamanya Ruhanga n’ebi arikukunda. Ekyo ku oraabe nikyo orikwenda, nitukuhiga kushaba Abajurizi ba Yehova kukuhwera kwega Baibuli. * Eri niribaasa kuba eidaara ry’okubanza kwirira haihi ogwo “ohurira okushaba.”—Zaaburi 65:2.