1, 2. Obumwe nitubaasa kwebuuza ki, kandi ni baahi omu Baibuli abarayebuurizeho?

ORAYEBUURIZEHO oti: ‘Ninyija kukira endwara egi?’ Nari ow’omu ka yaanyu nari munywani waawe naayebuuza yaaba naija kukira? Okwerarikirira nk’okwo nikukira kubaho omuntu yaaba arwaire. Abagabe babiri nabo bakooreka okwerarikirira nk’okwo omu biro bya Eliya na Elisa. Omugabe Ahazia mutabani wa Ahabu na Yezebeeli, ku yaagwire ahansi, akabuuza ati: ‘Ninyija kukira egi ndwara?’ Kandi n’Omugabe Benihadadi owa Siria obu yaabaire arwaire munonga, akabuuza ati: ‘Ndyakira egi ndwara?’—2 Bag. 1:2; 8:7, 8.

² Twaba turwaire nari twine abu turwarize nituba twine amatsiko g’okukira. Kwonka nabwo, baingi nibeebuuza yaaba Ruhanga aine eki araakore kuhwera abantu. Omu bunaku bw’Abagabe abo, Ruhanga akaba akora eby’okutangaaza kutambira abantu. Yehova arikukoresa baanabi be, akazoora n’abafu. (1 Bag. 17:17-24; 2 Bag. 4:17-20, 32-35) Mbwenu shi hariho ekishemereire kutureetera kugira amatsiko ngu naabaasa kukora nikyo kimwe omu bunaku obu?

3-5. Ruhanga na Yesu baine maani ki, kandi eki nikireetaho bibuuzo ki?

³ Hatariho kubanganisa, Ruhanga aine amaani g’okuhindura amagara g’omuntu. Baibuli eki neekihamya. Obumwe, akaba afubira  abantu arikukoresa endwara, nk’obu yaafubira Faraho omu bunaku bwa Abrahamu, kandi akaija yaafubira na munyaanya Musa orikwetwa Miriamu. (Kut. 12:17; Kub. 12:9, 10; 2 Sam. 24:15) Ruhanga akarabura ngu Abaisraeli baaba batabaire beesigwa, naija kubareetera ‘endwara n’enfu zoona.’ (Bir. 28:58-61) Kandi obundi, Yehova akaba aiha endwara aha bantu nari abarinda kutabakwata. (Kur. 23:25; Bir. 7:15) Obumwe akaba akiza abantu. Ruhanga akakiza Yobu obu yaarwara munonga akeetenga ngu afe!—Yob. 2:7; 3:11-13; 42:10, 16.

⁴ Buzima, Ruhanga aine amaani g’okukiza omuntu yaaba arwaire. Nikyo kimwe n’Omwana we. Ebyahandiikirwe nibigira ngu Yesu omu muringo gw’eky’okutangaaza akatambira ababembe, abarikugwa entsimbo, empumi, n’abazingazingirwe. (Shoma Matayo 4:23, 24; Yoh. 9:1-7) Ka nikigaruramu amaani kumanya ngu Yesu okutambira abantu nikyoreka eki arikwija kukora omu nsi ensya yoona. Obunaku obwo “tihaine mutuuzi waayo origira ati: Ndwaire.”—Isa. 33:24.

⁵ Mbwenu shi twine kuteekateeka ngu Ruhanga nari Yesu nibaza kutukiza omu muringo gw’eky’okutangaaza obunaku obu? Tushemereire kutwara tuta endwara z’amaani, kandi twine kuzikorera ki?

6. Nitumanya ki aha ‘biconco by’okutamba endwara’ ebi bamwe aha Bakristaayo ba ira baabaire baine?

⁶ Kurugiirira aha Baibuli nitumanya ngu omu kyasha ky’okubanza, Ruhanga akabaasisa bamwe aha Bakristaayo abashukirweho amajuta kukora eby’okutangaaza. (Byak. 3:2-7; 9:36-42) Bimwe aha ‘biconco by’emiringo mingi’ eby’omwoyo, bikaba biri “ebiconco eby’okutamba endwara.” (1 Kor. 12:4-11) Kwonka ebiconco ebyo n’ebindi bingi, nk’okugamba endimi nari obunabi, bikaba nibiija kuhendera. (1 Kor. 13:8) Hati tibikiriho. N’ahabw’ekyo, titushemereire kuteekateeka ngu hati Ruhanga naza kutukorera eby’okutangaaza hamwe n’abakundwa baitu.

7. Ebiri omu Zaaburi 41:3 nibituhamiza ki?

⁷ Kwonka nabwo twarwara, nitubaasa kwesiga Ruhanga kutuhuumuriza, kutuha obwengye, n’okutuhwera, nk’oku yaabaire akorera abaheereza be aba ira. Omugabe Daudi akahandiika ati: “Osaasibwa abooro aine omugisha; MUKAMA aryamujuna aha izooba ry’okureeberaho enaku. MUKAMA aryamurinda, agume ari ohuriire.” (Zab. 41:1, 2) Nitumanya ngu omu bunaku bwa Daudi owaabaire ahwera omworo akaba atagumaho ebiro byona. N’ahabw’ekyo, Daudi akaba atarikumanyisa ngu omuntu orikusaasibwa abandi naija kutunga amagara agatahwaho omu muringo gw’eky’okutangaaza. Ebigambo ebyo, nibimanyisa ngu Ruhanga akaahwereire omuntu orikuhwera abandi. Mu muringo ki? Daudi akashoboorora ngu Yehova “aryamweyegamiza, arembeire aha kitabo kye; niiwe orimwarira arwaire.” (Zab. 41:3) Buzima, omuntu owaabaire ahwera ondiijo akaba abaasa kuhamya ngu Ruhanga naamumanya ahabw’okuba omwesigwa. Kandi yaarwara, omubiri gwe ogu Ruhanga yaakozire gurikubaasa kwetambira, gukaba nigubaasa kumuhwera kuba gye.

8. Kurugiirira ahari Zaaburi 41:4, Daudi akashaba ki Yehova?

⁸ Daudi akaba naagamba arikwihirira aha byamubaireho: “Nyowe nkagira nti: Ngirira embabazi, ai MUKAMA! Kiza amagara gangye; ahakuba nkucumwireho.” (Zab. 41:4) Ebi Daudi naabaasa kuba yaabihandiikire obu Abusalomu yaabaire naateeraho kuhamba engoma ye, obwo arwaire atarikubaasa kuremesa Abusalomu. N’obu Ruhanga araabe yaasaasiire Daudi, kwonka Daudi tarayebirwe ekibi eki yaakozire na Batisheba n’ebyarugire omu kibi ekyo. (2 Sam. 12:7-14) Beitu nabwo, omugabe Daudi akaba naahamya ngu Ruhanga naija kumuhwera omu kurwara  kwe. Kwonka shi Omugabe Daudi akaba naashaba Ruhanga ngu amutambire omu muringo gw’eky’okutangaaza ayongyere n’aha buhangaazi bwe?

9. (a) Ebyahikire ahari Daudi nibitaana bita n’eby’Omugabe Hezekia? (b) Daudi akaba aine amatsiko g’okutunga buhwezi ki kuruga ahari Yehova?

⁹ Bwanyima, Ruhanga akacwamu kukiza Omugabe Hezekia, ‘owaarwaire, akahika aha ncwamba za rufu.’ Hezekia akakira yaagumaho kumara endiijo emyaka 15. (2 Bag. 20:1-6) Kwonka Daudi tarashabire Ruhanga kumukiza omu muringo gw’eky’okutangaaza. Kureka Daudi akashaba Ruhanga kumuhwera nk’oku yaakuhwereire ogwo owaasaasibwa ondiijo. Eki nikitwariramu okumuhwera ‘arembeire aha kitanda kye.’ Ahabw’okugira ngu Daudi akasaasiirwa ekibi kye, akaba naabaasa kushaba Ruhanga ngu amuhuumurize kandi amushagike, reero ngu okubaasa kw’omubiri gwe kumubaasise kukira. (Zab. 103:3) Naitwe nitubaasa kukora tutyo.

10. Nitubaasa kuhendera tuta kurugiirira aha byahikire ahari Trofimo na Epafurodiito?

¹⁰ Daudi taratambiirwe omu muringo gw’eky’okutangaaza emyaka ye ekoongyerwaho, kandi nikyo kimwe na Trofimo, omwe aha baabaire nibaheereza na Paulo. Nitumanya ngu obumwe Paulo akaba aheebwa amaani g’okutambira abarwaire. (Shoma Ebyakozirwe. 14:8-10.) Akatambira ‘ishe wa Pubulio owaabaire arwaire omushwija n’esheshe.’ Paulo akamushabira’ yaakira. (Byak. 28:8) Kwonka Paulo, tarabaasize kutambira Trofimo, owaabaire ari nawe omu rugyendo rw’obumiisani. (Byak. 20:3-5, 22; 21:29) Trofimo ku yaarwaire akaba atarikubaasa kugumizamu na Paulo, kwonka Paulo tarabaasize kumutambira, kureka akamutsiga Mileeto ngu abanze akire. (2 Tim. 4:20) Na Epafurodiito ku yaabaire “arwaire, ari haihi kufa,” tihariho ekirikworeka ngu Paulo akakora eky’okutangaaza kutambira munywani we ogwo ow’aha mara.—Fil. 2:25-27, 30.

11, 12. Ahabw’enki Luka yaabaasize kuha Paulo obuhabuzi, kandi nitubaasa kugamba ki aha kutendekwa kwe?

¹¹ ‘Luka omushaho orikukundwa,’ owaahandiikire ekitabo ky’Ebyakozirwe, nawe haine obu yaagyenda na Paulo. (Kol. 4:14; Byak. 16:10-12; 20:5, 6) Luka naabaasa kuba yaahaire Paulo obuhabuzi bw’eby’obujanjabi kandi akamuragurira n’abandi abu yaabaire naagyenda nabo. Ahabw’enki Luka ashemereire kuba yaakozire atyo? Ahakuba Paulo akarwara obu yaabaire ari omu rugyendo rw’obumiisani. (Gal. 4:13) Luka ashemereire kuba yaaraguriire Paulo ahakuba akaba naamanya ebigambo bya Yesu ngu ‘abahuriire tibetenga mushaho, kureka abarwaire.’—Luk. 5:31.

¹² Baibuli terikworeka ahu yaatendekiirwe kuba omushaho. Kwonka neeyoreka ngu Paulo akoherereza Abakristaayo ba Kolosai endamutsyo kuruga ahari Luka. N’ahabw’ekyo, Luka naabaasa kuba yaatendekiirwe omu ishomero ry’eby’obushaho omuri Laodikea haihi n’orurembo rwa Kolosai. Buzima, Luka akaba atari muntu waabutoosha owaabaire naakunda kugambira abantu eby’obujanjabi, kureka akaba ari omushaho. Eki nitubaasa kukihamya kuruga aha rurimi rw’ekishaho oru Luka yaakoreise omu Ngiri ye n’omu kitabo ky’Ebyakozirwe, n’oku yaagambire aha ku Yesu yaatambiire abandi.

13. Tushemereire kugira miteekateekyere ki etagwereire rubaju aha buhabuzi bw’eby’obujanjabi?

¹³ Obwire obu, Abakristaayo bagyenzi baitu tibarikukoresa “ebiconco eby’okutamba endwara.” Kwonka ab’eishe-emwe abamwe ahabw’okugira ngu nibaba nibenda kutuhwera, nibabaasa kutuhabura eby’obujanjabi ebi turaakorese n’obu twakuba tutabashabire buhwezi. Buzima, obuhabuzi bwona ti bubi. Paulo akahabura Timoseo obu yaabaire naarwararwara omu nda, ahabw’okugira ngu shana amaizi agu yaabaire  naakoresa gakaba gatari marungi. * (Shoma 1 Timoseo 5:23.) Kwonka, ekyo nikitaana n’okuteeraho kubeihabeiha ow’eishe-emwe mugyenzi waawe kukoresa ebishaka, omubazi, nari ngu arye eby’okurya by’omuringo nanka, nari ngu abyetantare. Ow’eishe-emwe naabaasa kukugira ngu omubazi nari eby’okurya bikahwera ow’omu ka yaabo owaabaire aine oburemeezi nk’obwawe. Kwonka ekyo tikirikumanyisa ngu naiwe nibwija kukuhwera. Obuhabuzi n’obu bwakuba nibureebeka nka burungi, twine kuguma nitwijuka ngu nangwa n’obu abantu baingi baakuba nibakoresa omubazi nari obujanjabi obwo, nibubaasa kuba burimu akabi.—Shoma Enfumu 27:12.

14, 15. (a) Abantu abamwe nibareeba okurwara kw’abandi nk’omugisha gw’okukora ki? (b) Ebiri omu Enfumu 14:15 nibituhwera bita twaba nitusherura obuhabuzi bw’eby’obujanjabi?

¹⁴ Abakristaayo twine ekyetengo ky’okugira amagara marungi kubaasa kuheereza gye Ruhanga. Kwonka nabwo, nitukira kurwara, ahabw’okugira ngu tukahungura okutahikiirira. Twarwara, nihaba hariho obujanjabi bw’emiringo mingi, kandi twine obugabe bw’okucwamu obu turaikirize. Eky’obusaasi, omu nsi egi erimu omururu kandi abantu barikurwara munonga, hariho abarikugingirira emibazi kukora sente. Abamwe nibagambirira obujanjabi bwabo nari emibazi yaabo barikugamba ebishuba, kandi abandi nibaha obujurizi butahikire. Ebitongore nari abantu abamwe nibahiga abandi kukoresa ebintu byabo eby’esente nyingi ahabw’okwenda kukora amagoba maingi. Omuntu yaaba arwaire arikusherura ekiraamutambire, emibazi nk’egyo neebaasa kureebeka nk’erikukora. Kwonka titushemereire kwebwa, ngu Ekigambo kya Ruhanga nikituhabura kiti: “Otaine bwengye aikiririza eryo, kwonka omwerinzi ayetegyereza ahu arikuraba.”—Enf. 14:15.

¹⁵ “Omwerinzi” naayegyendesereza kureeba ngu obuhabuzi obu yaatunga niburuga aha muhangu omu by’obujanjabi. “Omwerinzi” naabaasa kuteekateeka ati: ‘Omuntu ogu naagira ngu emibazi, ebishaka, nari eby’okurya ebi arikugambirira nibihwera abantu, kwonka shi hariho obuhame burikumara kubaasa kwikiriza enshonga egi? Abantu nibataana. Hariho enshonga ehikire eshemereire kundeetera kwikiriza ngu omubazi ogu nigwija kumpwera? Mbwenu shi nkore okucondooza nari mbuuze omuntu orikumanywa gye ngu atendekirwe gye omu by’obushaho?’—Bir. 17:6.

16. Nitubaasa kwebuuza bibuuzo ki kworeka ngu turi ‘abeerinzi’ aha bikwatiraine n’obuhabuzi bw’eby’obujanjabi?

¹⁶ Ekigambo kya Ruhanga nikitwehanangiriza “kugumaho omu busingye obu obwa hati, nitwerinda turi abahikiriire.” (Tit. 2:12) ‘Okwerinda,’ nari okugira ebiteekateeko birungi, kushemereire kukuhwera, omuntu yaakushoboororera aha by’obujanjabi omu muringo ogutarikwetegyerezibwa. Ogwo orikubigambirira nari orikubiguza naabaasa kushoboorora gye oku birikukora? Enshoboorora ye neehikaana n’amazima agarikumanywa, kandi abantu baingi abatendekirwe omu by’obujanjabi nibaikiriza ngu nibikora? (Enf. 22:29) Nari n’okwenda kureetera omuntu kwehurira gye kwonka? Obundi omuntu naabaasa kugira ngu obujanjabi bujumbwirwe hare munonga, kandi ngu n’abashaho tibakabumanyire. Mbwenu shi ebi arikugamba biine obuhame nari n’eby’oburyo? Obujanjabi obumwe nari ebyoma ebimwe ebirikukoresibwa omu kucebera abantu nibigambwaho nk’ebirikukoresa ‘amaani agatarikwetegyerezibwa’ nari ‘agatarikumanywa.’ Ekyo kishemereire kutureetera kwegyendesereza, ahakuba Ruhanga naaturabura kwetantara okukoresa amaani agatarikwetegyerezibwa n’okwejumba omu by’obufumu.—Isa. 1:13; Bir. 18:10-12.

17. Ni kyetengo ki eky’oburyo eki twine?

¹⁷ Akakiiko akareeberezi ak’omu kyasha ky’okubanza kakoohereza ebaruha nkuru omu bibiina. Bwanyima y’okugamba ebintu ebi Abakristaayo baine kwetantara, ebaruha egyo ekahendera eti: “Ku muraayerinde ebyo, muryaguma muri gye. Mugumeho!” (Byak. 15:29) Omu ndimi ezimwe, ebigambo ebirikuhererukayo omu mushororongo ogu bivunwirwe nka “mugire amagara marungi.” N’obu ebigambo ebi biraabe biine agandi amakuru ag’okusiibura omuntu, nibitwijutsya ngu n’eky’obuhangwa kwenda kugira amagara marungi kubaasa kuheereza Yehova.

18, 19. Niki eki turikubaasa kugirira ekihika omu nsi ensya?

¹⁸ Ensi egi embi yaaba ekiriho kandi tukiri abatahikiriire, nitwija kuguma niturwara. Titushemereire kuteekateeka ngu obunaku obu nitwija kutambirwa omu muringo gw’eky’okutangaaza. Kwonka, Okushuuruurwa 22:1, 2 nihagamba aha bwire obu turikwija kukirira kimwe. Entumwa Yohaana omu kworekwa akareeba “omugyera gw’amaizi g’amagara” hamwe ‘n’omuti gw’amagara’ ogwine amababi “ag’okutambira amahanga.” Omushororongo ogu tigurikugamba aha kishaka ekirikutambira abantu hati nari ekirikwija kubatambira omu biro by’omumaisho. Kureka, nigugamba aha ki Yehova arikwija kukora kurabira omuri Yesu, kutubaasisa kutunga amagara agatahwaho omu biro by’omumaisho.—Isa. 35:5, 6.

¹⁹ Twaba tutegyereize ebiro by’omumaisho ebyo, nitumanya ngu Yehova naafayo ahari buri omwe ahariitwe, n’obu twakuba turwaire. Nitubaasa kugira obuhame nk’obu Daudi yaabaire aine, ngu Ruhanga naija kuturamira twaba turwaire. Kandi naitwe nka Daudi nitubaasa kugira tuti: “Kwonka nyowe omu bwesigwa bwangye onkwatiriire, wanta omu maisho gaawe, okuguma naiwe ebiro byona.”—Zab. 41:12.