Nkazaarirwa Paddington, omu kyanga ekirikutuurwamu abantu baingi omuri London, England. Nkaba nintuura na maawe na bakuru bangye bashatu. Tata akaba atarikukira kuba omu ka ahabw’okuba omusinzi.

Obu naabaire nkiri omuto, maawe akanyegyesa kushaba buri kiro. Nkaba nyine Baibuli nkye erimu Zaaburi yonka, kandi nkaba nyeshongora zaaburi ezo omu magara agangye. Ninyijuka ndikushoma ebigambo omu kimwe omu bitabo by’ensi kandi nkaguma nimbiteekateekaho: “Eizooba rimwe tiharikwija kubaho nyencakare.” Ebigambo ebi bikandeetera kutagwejegyera nyekiro ndikuteekateeka ahari nyentsya. Hatariho kubangaanisa hariho ekirikukira aha kuba ohuriire,’ nikwo naateekateekire. ‘Ahabw’enki ndiho?’ Nkaba ntarikwenda kufa!

Nkejumba omu by’obufumu. Nkateeraho kugamba n’abafu, kuza aha bituuro n’abeegi bagyenzi bangye, kandi tukaba nitureeba vidiyo ezirikutiinisa. Zikaba nizishemeza kandi zirikutiinisa.

Nkatandika kuba engomi nyine emyaka ikumi yonka. Nkatandika kureetsa etaabe, kandi gwahinduka omuze. Bwanyima, nkahika n’aha kureetsa enjaaya. Kuza kuhika emyaka 11, nkaba niinywa amaarwa. N’obu garaabe gaabaire nigashaarira, kwonka nkaba ningakunda ahabw’okureeta esindo. Nkaba ninkunda ebyeshongoro n’okuzina. Nkaba ninza aha mikoro n’omu mwanya y’okuziniramu nyekiro. Nkaba ngyenda nyekiro bwesherekye, reero nkangaruka butakaseesire gye. Ahabw’oburuhe nkaba ntarikukira kuza omu kibiina aha ishomero. Ku naabaire nzamu, nkaba nywa amaarwa ntakagiire omu ishomo erindi.

Nkakora kubi munonga omu mwaka gw’aha muheru. Ahabw’obugomi bwangye burengyesereize, maawe akagira ekiniga yaareeba ngu mmureebize. Nkatongana nawe, naahunga naaruga omuka. Kumara akaire, nkaba niintuura n’omwojo wangye, Tony, owaabaire ari Omurasita. Akaba naakwatanisa n’enkozi z’ebihagaro, arikuguza emibazi y’ekitabura bwongo, kandi akaba naamanywa nk’omuntu orikurahuka kugira ekiniga. Omu bwire bukye nkatwara enda kandi aha myaka 16 yonka, naazaara mutabani waitu.

Nkabugana Abajurizi ba Yehova obu naabaire niintuura omu kyombeko ky’abakazi abaine abaana kwonka abatari mu bushwere. Ab’obushoboorozi bakaba bampaireyo ekishengye ky’okutuuramu. Abakazi babiri b’Abajurizi ba Yehova bakaba nibakira kutaayaayira bamwe aha bakazi omu mwanya ogwo. Eizooba rimwe nkeejumba omu kigaaniiro kyabo. Nkaba ngyendereire kworeka ngu Abajurizi ba Yehova bagwire. Kwonka bakagaruka bimwe aha bibuuzo byangye bingi baikaikaine kandi barikukoresa Baibuli. Bakaba baine embabazi kandi barikutwaza gye, ekyandetaire kubakunda. N’ahabw’ekyo nkaikiriza ngu baanyegyese Baibuli.

Ahonaaho nkeega ekintu omu Baibuli ekyahindwire embeera zangye. Omu buto, nkaba nintiina okufa. Kwonka hati nkamanya eki Yesu yaayegyeise aha kuzooka! (Yohaaana 5:28, 29) Kandi, nkeega ngu Ruhanga akaba naanfaho. (1 Petero 5:7) Okukira munonga nkakwatwaho ebigambo ebiri omu Yeremia 29:11, aharikugira hati: “‘Ahakuba nimmanya ebi ndikubateekateekyera,’ nikwo Yehova arikugira, ‘eby’oburungi bitari eby’obubi, ngu mbone kubatamu amatsiko g’ebirikwija kubaho bwanyima.’” Nkatandika kwikiririza ngu nimbaasa kwija kutuuraho ebiro byona omu Paradiso omu nsi.—Zaaburi 37:29.

Abajurizi ba Yehova baakanyoreka rukundo eyaabuzima. Obu naabanza kuza omuri rumwe aha nteerane zaabo, nkehurira gye, buri omwe akaba naatwaza gye! (Yohaana 13:34, 35) Entwaza yaabo ekaba neetaanira kimwe aha y’ab’ekanisa y’ekicweka ekyo. Abajurizi ba Yehova baakanyakira nk’oku naabaire ndi. Bakamara obwire naanye, baandeeberera, baanfaho, kandi baampwera. Nkehurira ndi nk’omwe aha b’eka mpango, eine rukundo.

Omu kwega Baibuli, nketegyereza ngu nyine kukora empinduka kuhikaana n’emitindo ya Ruhanga ey’emicwe. Kikangumira kucwa omuze gw’okureetsa etaabe. Kandi, nketegyereza ngu ebyeshongoro ebimwe bikaba nibyenegyeza ekyetengo kyangye ky’okureetsa enjaaya, n’ahabw’ekyo nkahindura ebyeshongoro ebi naabaire nimpurikiza. Kubaasa kugaruka omu mbeera zangye eza butoosha, nkarekyera aho kuza aha mikoro n’omu bidongo bya nyekiro ahu naabaire nimbaasa kwohibwa kunywa amaarwa. Kandi nkateeraho kusherura abanywani basya abaabaire nibabaasa kumpwera kuguma nintwaza gye.—Enfumu 13:20.

Omu bwire obwo, Abajurizi ba Yehova bakaba batandikire kwegyesa Tony Baibuli. Ku baagumire nibagarukamu ebibuuzo bye barikukoresa Baibuli, nawe akaikiriza amazima agu yaabaire naayega. Akakora empinduka z’amaani, yaarekyera aho kukwatanisa n’ebigombe by’obushaarizi, eby’enkozi z’ebihagaro, kandi yaacwa omuze gw’okureetsa enjaaya. Kubaasa kushemeza Yehova omu bwijwire, twembi tukeetegyereza ngu twine kuhindura omu mitwarize yaitu kubaasa kworora gye mutabani waitu. Tukataaha hamwe omu bushwere omu 1982.

Ninyijuka ndikusherura ebicweka bya Watchtower na Awake! * ebirikugamba aha bantu abaabaire abasinguzi omu kukora empinduka nk’ezi naabaire niinyenda kukora. Eby’okureeberaho byabo bikangaruramu amaani! Eki kikandeetera kuguma niinteeraho munonga n’okutahanika. Nkaguma ninshaba Yehova kuntsigaho. Nyowe na Tony tukabatizibwa kandi twaba Abajurizi ba Yehova omu Kwamushanju 1982.

Okugira omukago murungi na Yehova Ruhanga kukajuna amagara gangye. Nyowe na Tony tureebire oku Yehova atuhwereire kuraba omu mbeera zigumire. Twegire kwesiga Yehova n’omu mbeera ezigumire, kandi atwire naatuhwera arikutushagika omu ka yaitu.—Zaaburi 55:22.

Nkahwera mutabani waitu na muhara waitu kumanya Yehova nkaanye. Hati ninshemererwa kureeba ngu n’abaana baabo nibeeyongyera omu kumanya Ruhanga.

Tinkibyama nyerarikiriire ahari nyentsya yangye nari okufa. Nyowe na Tony nitwejumbira kimwe omu kutaayaayira ebibiina bitari bimwe na bimwe eby’Abajurizi ba Yehova buri saabiiti kubigumya. Nitukora nabo turikwegyesa abantu ngu baikiririza omuri Yesu, nabaija kutunga amagara agatahwaho.