Ngaaha. Baibuli neeyegyesa ngu twine kushaba Ruhanga wenka, kurabira omu iziina rya Yesu. Yesu akagambira abeegi be ati: “Mwine kushaba muti: Tataitwe ow’omu iguru, eiziina ryawe ryezibwe.” (Matayo 6:9) Tarayegyeise abeegi be kushaba abarikwera, baamaraika, nari ekindi kintu kyona atari Ruhanga.

 Kandi Yesu akagambira abeegi be ati: ‘Niinye muhanda, n’amazima, n’amagara, tihariho orikwija ahari Isheboona, atarabire muriinye.’ (Yohaana 14:6) Yesu akatooranwa kuba omuhikaanisa waitu na Ruhanga.​—Abaheburaayo 7:25.

Kandi shi naashaba Ruhanga kandi nkashaba n’abarikwera?

 Omu Kiragiro kya Ikumi, Ruhanga akagira ati: “Nyowe [Yehova] Ruhanga waawe ndi Ruhanga ow’eihato.” (Okuruga 20:5) Ruhanga n’ow’eihato mu muringo ki? Obugambo obw’ahansi New American Bible nibugira ngu “naayenda kuba niwe yaahamirwaho wenka.” Ruhanga naayenda ngu ekintu kyona ekiine akakwate n’okuramya, nk’okushaba tube niwe twakiha nari twakigambira butunu.​—Isaaya 48:11.

 Nitugwisa kubi Ruhanga twashaba omuntu ondiijo, nangwa n’obu baakuba abarikwera nari baamaraika. Entumwa Yohaana ku yaateireho kuramya maraika, akamwangira arikumugira ati: “Ndi omuheereza mugyenzi waawe n’owa beena sho abarikuhamya amazima ga Yesu. Ramya Ruhanga.”​—Okushuuruurwa 19:10, NAB.