Nwane Mɔ A Le Nɛfelema Ne?
Baebolo ne bua kɛ
Nɛfelema le kakanyinlima atisesebɛma mɔɔ sunsum nu abɔdeɛ nee mraalɛ wole bɛ wɔ Nowa mekɛ zo la. *
Baebolo ne ka kɛ “anwomanyunlu menli bie nwunle kɛ menli amra mraalɛ ne mɔ anwo yɛ fɛ.” (Mɔlebɛbo 6:2) Ɛnee “anwomanyunlu menli” zɔhane mɔ le Nyamenle anwumabɔvolɛma mɔɔ ɛde atua na ‘bɛkpo bɛ tɛnlabelɛ ne mɔɔ fɛta la.’ Bɛhakyile bɛvale sonla nwonane bɛkpolole na bɛvale mraalɛ mɔɔ bɛdabɛ bɛkulo la bɛgyale bɛ.”—Dwuudu 6; Mɔlebɛbo 6:2.
Ngakula mɔɔ vi agyalɛ ɛhye anu rale la ɛnee le ngakyile. (Mɔlebɛbo 6:4) Nɛfelema ne le mgbole yɛɛ bɛ nwo yɛ se. Bɛvale basabasayɛlɛ bɛrale azɛlɛ ne azo amuala. (Mɔlebɛbo 6:13) Baebolo ne ka bɛ nwo edwɛkɛ kɛ “menli kakanyinlima ne mɔ mɔɔ mɔmoane ne bɛliele duma la.” (Mɔlebɛbo 6:4) Bɛvale basabasayɛlɛ nee ɛzulolɛ bɛrale ewiade.—Mɔlebɛbo 6:5; Ɛdianlɛ 13:33. *
Nɛfelema Anwo Adalɛ Edwɛkɛ
Adalɛ edwɛkɛ: Nɛfelema ne tɛbɔ ɛkɛ wɔ azɛlɛ ye azo.
Nɔhalɛ edwɛkɛ: Gyihova vale azuyilɛ zɛkyele ewiade ɛtane zɔhane vile ɛkɛ. Bɛzɛkyele Nɛfelema ne bɛbokale amumuyɛma ne anwo wɔ azɛlɛ ne azo. Noko , Nowa nee ye abusua ne nyianle Gyihova anyunlu ɛlolɛ yemɔti bɛ ngome ala a bɛnyianle ngoane a.—Mɔlebɛbo 6:9; 7:12, 13, 23; 2 Pita 2:5.
Adalɛ edwɛkɛ: Azɛlɛ ye azo mrenyia a wole Nɛfelema ne mɔ a.
Nɔhalɛ edwɛkɛ: Bɛfɛlɛ mrenyia ne mɔ mɔɔ wole bɛ la “anwomanyunlu menli.” (Mɔlebɛbo 6:2) Baebolo ne fa edwɛkɛkpɔkɛ ɛhye di gyima maa anwumabɔvolɛma. (Dwobu 1:6; 2:1; 38:7) Anwumabɔvolɛma kola kakyi bɛ nwo menli. (Mɔlebɛbo 19:1-5; Dwɔhyua 5:13-15) Ɛzoanvolɛ Pita hanle “sunsum mɔɔ bɛgua efiade, mɔɔ bɛyɛle anzosesebɛ wɔ mekɛ mɔɔ ɛnee Nyamenle ɛlɛkendɛ abotane nu wɔ Nowa mekɛ zo” la anwo edwɛkɛ. (1 Pita 3:19, 20) Mɔɔ Baebolo kɛlɛvolɛ Dwuudu ka ɛhye anwo edwɛkɛ la, ɔhilele nu kɛ anwumabɔvolɛma bie mɔ “andɛnla ɛleka mɔɔ ɛnee bɛde wɔ mɔlebɛbo ne na bɛkpole bɛ tɛnlabelɛ ne mɔɔ fɛta la.”—Dwuudu 6.
Adalɛ edwɛkɛ: Nɛfelema ne le anwumabɔvolɛma mɔɔ ɛde ɛgua aze.
Nɔhalɛ edwɛkɛ: Kɛzi bɛwula edwɛkɛ mɔɔ wɔ Mɔlebɛbo 6:4 la maa yɛnwu kɛ Nɛfelema ne ɛnle anwumabɔvolɛ na emomu bɛle menli mɔɔ anwumabɔvolɛma nee menli ɛwo bɛ a. Mɔɔ anwumabɔvolɛma ne bɔle ɔ bo kɛ ‘bɛfa azɛlɛ ye azo mraalɛ mɔɔ bɛkulo la bɛagya bɛ la,’ Gyihova hanle kɛ ɔbazɛkye ewiade ɛtane ɛhye wɔ ɛvolɛ 120 anu. (Mɔlebɛbo 6:1-3) Edwɛkɛ ne toa zo kɛ “mekɛ zɔhane,” anwumabɔvolɛ ne mɔ mɔɔ bɛhakyi bɛ nwo menli la nee mraalɛ ne mɔ wole mralɛ. “Bɛmɛ a bɛle kakanyinlima ne mɔɔ dɛnlanle aze tete ne,” Nɛfelem ne mɔ.—Mɔlebɛbo 6:4.
^ Hibulu edwɛkɛkpɔkɛ mɔɔ bɛhile ɔ bo “Nɛfelem” la bahola ahile “Azedolɛma.” Wilson’s Old Testament Word Studies buluku ne ka bɛ nwo edwɛkɛ kɛ “menli mɔɔ dua konle nee basabasayɛlɛ zo maa awie mɔ tɔ aze la.”
^ Ɔda ali kɛ Yizilayɛ busiama ne mɔɔ bɛha bɛ nwo edwɛkɛ wɔ Ɛdianlɛ 13:33 la nwunle menli mɔɔ bɛ mgbole maanle bɛhakyele Nɛfelema ne mɔɔ ɛnee bɛwu dɛbadɛba la.—Mɔlebɛbo 7:21-23.
Bie A Eza Ɛ Nye Balie
BAEBOLO KPUYA MƆƆ BƐBUA
Asoo Sunsum Ɛtane Ne Mɔ Wɔ Ɛkɛ Ne Amgba Ɔ?
Sunsum ɛtane ne mɔ a le nwane? Bɛvi ni a bɛrale a?
ƐZINZALƐ ARANE
Nowa “Nee Nɔhalɛ Nyamenle Ne Luale”
Duzu a yɛsukoa yɛfi Nowa, ɔ ye, nee bɛ abusua ne ɛkɛ a?
YƐ NWO EDWƐKƐ
Maa Yɛrakpɔla Wɔ
Ɛ nee yɛ ɛzuzu Baebolo nu edwɛkɛ bie anwo anzɛɛ sukoa Gyihova Alasevolɛ anwo edwɛkɛ dɔɔnwo.