Ɛhɛe, Baebolo ne maa yɛnwu daselɛ wienyi mɔɔ kile kɛ Nyamenle wɔ ɛkɛ la. Ɔmaa yɛ anwosesebɛ kɛ yɛnyia diedi wɔ Nyamenle anu, tɛ kɛ yɛdie ɛzonlenlɛ nu edwɛkɛ bie yɛali ala, emomu, ɔwɔ kɛ ‘yɛdwenle’ na yɛfa “adwenlenunwunlɛ” yɛnyia diedi. (Wulomuma 12:1; 1 Dwɔn 5:20, ɔbodwɛkɛ) Suzu edwɛkɛ ɛhye mɔ mɔɔ doɔdoa zo mɔɔ gyi Baebolo ne azo la anwo:

•   Kɛzi bɛhyehyɛ ninyɛne pɛpɛɛpɛ wɔ anwuma nee aze mɔɔ ngoane boka nwo la kile kɛ Bɔvolɛ bie wɔ ɛkɛ. Baebolo ne ka kɛ: “Nɔhalɛ nu, sua biala awie a si a, na ahenle mɔɔ yɛle ninyɛne kɔsɔɔti la a le Nyamenle.” (Hibuluma 3:4) Ɔwɔ nu kɛ edwɛkɛ ɛhye le sikalɛ ɛdeɛ, noko menli dɔɔnwo mɔɔ ze nwoma la nwu kɛ tumi kpole wɔ nu. *

•   Yɛle menli mɔɔ yɛlɛ ɛhulolɛ kɛ yɛbade bodane mɔɔ ɔti bɛbɔle sonla la abo. Saa yɛ sa kɛ yɛ nwonane afoa nu ngyianlɛ bɔbɔ a, ɛhulolɛ ɛhye ɛnvi ɛkɛ. Ɛhye boka yɛ “sunsum nu ngyianlɛ” ne mɔɔ Baebolo ne ka nwolɛ edwɛkɛ la anwo, bie a le ɛhulolɛ mɔɔ yɛlɛ kɛ yɛbanwu Nyamenle na yɛazonle ye la. (Mateyu 5:3; Yekile 4:11) Sunsum nu ngyianlɛ ɛhye di daselɛ kɛ Nyamenle wɔ ɛkɛ, na eza ɔmaa yɛnwu kɛ ɔle Bɔvolɛ mɔɔ lɛ ɛlɔlɛ mɔɔ ɔkulo kɛ yɛdi yɛ ngyianlɛ ɛhye anwo gyima a.—Mateyu 4:4.

•   Baebolo ngapezo dɔɔnwo mɔɔ bɛhɛlɛle bɛdole ɛkɛ wɔ ɛvoya dɔɔnwo anu la rale nu pɛpɛɛpɛ wɔ ye mekɛ nloa. Kɛzi ngapezo ɛhye mɔ le nɔhalɛ na bɛrale nu pɛpɛɛpɛ la maa ɔda ali bɔkɔɔ kɛ awie mɔɔ ɔlɛ tumi ɔtɛla sonla la a maanle bɛhɛlɛle a.—2 Pita 1:21.

•   Ɛnee Baebolo kɛlɛvoma ze abɔdeɛ nwo edwɛkɛ dɔɔnwo tɛla bɛ mekɛ zo amra. Kɛ neazo la, ɛnee menli dɔɔnwo die di wɔ tete ne kɛ azɛlɛ ne gyi nane le kɛ ɛzonle, kpolike nyinli anzɛɛ ɛnlankɛ nyinli nwo zo. Noko, Baebolo ne ka kɛ Nyamenle ‘ɛhenda azɛlɛ ne mɔɔ debie biala ɛnlɛ nu a.’ (Dwobu 26:7) Baebolo ne eza ka azɛlɛ ne anwo edwɛkɛ kɛ ɔle “kutukpunli.” (Ayezaya 40:22) Menli dɔɔnwo te nganeɛ kɛ ndelebɛbo kpole zɛhae mɔɔ Baebolo kɛlɛvoma ne nyianle la kile kɛ bɛ edwɛkɛ ne vi Nyamenle ɛkɛ.

•   Baebolo ne bua kpuya dɔɔnwo mɔɔ ɔ bo ɛdelɛ yɛ se, kpuya mɔɔ bɛannyia nwolɛ mualɛ kpalɛ a ɔmaa awie die di kɛ Nyamenle ɛnle ɛkɛ la. Kɛ neazo la: Saa Nyamenle lɛ ɛlɔlɛ nee tumi kpole a, ɛnee duzu ati a amaneɛnwunlɛ nee amumuyɛyɛlɛ ɛbu ewiade a? Duzu ati a menli ɛnlua ɛzonlenlɛ duma nu ɛnyɛ debie kpalɛ na bɛfa bɛdi ɛtane a?—Taetɛse 1:16.