Giliki duma mɔɔ bɛfa bɛfɛlɛ Yekile buluku ne la a le A·po·kaʹly·psis na ɔ bo kile kɛ “Ɛbuke Debie Zo” anzɛɛ “Ɛmaa Debie Nwo Ala Ɛkɛ.” Duma ɛhye maa yɛte Yekile abo​—ɔbuke ninyɛne mɔɔ vea la azo yɛɛ ɔmaa yɛnwu mɔɔ bazi kenle bie la. Bɔ zo mɔɔ nuhua ngapezo ne mɔ anu dɔɔnwo bara nu a.

Yekile buluku ne anu edwɛkɛ

•   Mukenye.​—Yekile 1:​1-9.

•   Nrɛlaleɛ mɔɔ Gyisɛse vale hɔmaanle asafo nsuu ne mɔ la.​—Yekile 1:10–​3:​22.

•   Nyamenle mɔɔ de ye belemgbunli ebia nu wɔ anwuma la anwo yekile.​—Yekile 4:1-​11.

•   Yekile ngakyile, ko biala maa yɛnwu mɔɔ badoa ye la:

  •   Ɛyɛlɛ nsuu.​—Yekile 5:1–​8:6.

  •   Aweɛne ndendenle nsuu, nsa ne mɔɔ li awieleɛ la ka ngyegyelɛ nsa anwo edwɛkɛ.​—Yekile 8:7–​14:20.

  •   Dwora anzɛɛ ahyɛnze nsuu, ngyegyelɛ mɔɔ gyi ɛkɛ maa Gyihova ndɛnebualɛ ne mɔɔ bɛbawola bɛagua azɛlɛ ye azo la a wɔ ko biala anu a.​—Yekile 15:1–​16:21.

  •   Nyamenle agbɔvolɛ ɛzɛkyelɛ nwo yekile.​—Yekile 17:1–​20:10.

  •   Kɛzi Nyamenle bayila anwuma nee azɛlɛ ye la anwo yekile.​—Yekile 20:11–​22:5.

•   Adwulaleɛ.​—Yekile 22:​6-​21.

Ninyɛne mɔɔ maa yɛte Yekile buluku ne abo la

1.   Edwɛkɛ kpalɛ a wɔ nu a, na ɔmmaa ɛzulolɛ ɛnga menli mɔɔ sonle Nyamenle la. Menli dɔɔnwo bu Yekile ne kɛ ɔkile ngyegyelɛ kpole, noko Yekile buluku ne ka ye wɔ ye mɔlebɛbo nee ye awieleɛ kɛ, menli mɔɔ kenga, bɛte ɔ bo na bɛfa nuhua edwɛkɛ ne bɛdi gyima la anye balie kɛ bɛyɛ ye zɔ la.​—Yekile 1:3; 22:7.

2.   Yekile buluku ne fa sɛkɛlɛneɛ dɔɔnwo mɔɔ ɔnle kɛ yɛfa bɛ kɛzi bɛha ye ala la di gyima.​—Yekile 1:1.

3.   Bɛlimoale bɛhanle ninyɛne titili nee sɛkɛlɛneɛ bie mɔ anwo edwɛkɛ wɔ Baebolo ne anu kolaa na eza bɛaha nwolɛ edwɛkɛ wɔ Yekile ne anu:

   •   Gyihova​—ɔle nɔhalɛ “Nyamenle wɔ anwuma” na ɔdaye a ɔbɔle ninyɛne kɔsɔɔti a.​—Mɛla ne 4:39; Edwɛndolɛ 103:19; Yekile 4:11; 15:3.

   •   Gyisɛse Kelaese​—“Nyamenle Boaneralɛ ne.”​—Dwɔn 1:29; Yekile 5:6; 14:1.

   •   Seetan Abɔnsam​—Nyamenle kpɔvolɛ ne.​—Mɔlebɛbo 3:14, 15; Dwɔn 8:44; Yekile 12:9.

   •   Babelɔn Kpole ne​—ɔle kɛ tete Babelɔn (Babɛle), ɔle Gyihova Nyamenle nee ye menli ne kpɔvolɛ yɛɛ ɛkɛ ne a ɛzonlenlɛ nu adalɛ ngilehilelɛ vi a.​—Mɔlebɛbo 11:2-9; Ayezaya 13:1, 11; Yekile 17:4-6; 18:4, 20.

   •   “Nyevile ne”​—alesama amumuyɛma mɔɔ bɛdwazo bɛtia Nyamenle la.​—Ayezaya 57:20; Yekile 13:1; 21:1.

   •   Ninyɛne mɔɔ ɛnee wɔ tete ɛdanlɛsua ne mɔɔ ɛnee bɛsonle Nyamenle wɔ nu anu la​—bie a le ngyekyeleɛ ɛlɛka ne, nyevile mɔɔ le kɛ neanleɛ (debie mɔɔ bɛsa nzule bɛgua nu bɛfa bɛwowo bɛ nwo), ahɛnlaneɛ, ɛyɛlɛ evuanlɛ ɛyelalɛ, yɛɛ afɔlemokyea.​—Adendulɛ 25:10, 17, 18; 40:24-32; Yekile 4:5, 6; 5:8; 8:3; 11:19.

   •   Nane anwo ɛzulolɛ​—ɔgyi ɛkɛ ɔmaa alesama arane ne mɔ.​—Daneɛle 7:1-8, 17-26; Yekile 13:2, 11; 17:3.

   •   Nɔma mɔɔ bɛvale bɛlile gyima wɔ sɛkɛlɛneɛ adenle zo.​—Yekile 1:20; 8:13; 13:18; 21:16.

4.   Yekile ne mɔ fale “Awulae kenle ne” mɔɔ bɔle ɔ bo wɔ mekɛ mɔɔ Nyamenle Belemgbunlililɛ ne bɔle ɔ bo kɛ ɔdi tumi wɔ 1914 na bɛziele Gyisɛse Belemgbunli la. (Yekile 1:​10) Yemɔti, yɛ nye bahola ala kɛ Yekile ne anu ninyɛne titili ne mɔ bara nu wɔ yɛ mekɛ ye azo.

5.   Saa yɛbade Yekile buluku ne abo a, yɛhyia deɛ ko ne ala mɔɔ boa yɛ ɔmaa yɛte Baebolo ne afoa mɔɔ ɛha la abo mɔɔ bie a le nrɛlɛbɛ mɔɔ vi Nyamenle ɛkɛ yɛɛ menli mɔɔ bɛte ɔ bo dɛba mɔɔ yɛbamaa bɛaboa yɛ la.​—Gyima ne 8:26-39; Gyemise 1:5.