Ɛzɛdɔso 15:1-27
15 Mekɛ zɔhane, Mosisi nee Yizilayɛma dole edwɛne maanle Gyihova kɛ:+
“Mebado edwɛne meamaa Gyihova, ɔluakɛ ye anyunlunyia ɛyɛ kpole.+
Yevuandi ɛkpɔnwɔ nee ye kavolɛ ne yegua nyevile ne anu.+
2 Me anwosesebɛ nee me tumi a le Gyaa,* ɔluakɛ yeyɛ me ngoanedievolɛ.+
Me Nyamenle ne ɛne, na mebaye ye ayɛlɛ;+ me papa Nyamenle ne ɛne,+ na mebahanvo ye.+
3 Gyihova le kovolɛ kpole.+ Ye duma a le Gyihova.+
4 Yevuandi Falo ehwili ne mɔ nee ye ɛlɔnema ne yegua nyevile ne anu,+Yɛɛ ye kovolɛma kpalɛ ne ɛnloma Nyevile Kɔkɔlɛ ne anu.+
5 Nzule ne mɔɔ ɛlɛbu ava zo la hedale bɛ nwo zo; bɛnlomanle ɔ bo kɛ bolɛ.+
6 O Gyihova, tumi kpole wɔ ɛ sa fema ne anu;+O Gyihova, ɛ sa fema ne kola bubu kpɔvolɛ.
7 Wɔ wɔ anyunlunyia kpole nu, ɛfuandi menli mɔɔ dwazo tia wɔ la ɛgua aze;+Ɛsoa wɔ ɛya wuluwulu ne, na ɔyela bɛ kɛ ndile.
8 Ɛ bonyi nu ɛnwomenle ko maanle nzule ne boɔboale bɛ nloa;Bɛgyinlanle ɛleka ko dii kɛ bane la,Nzule ne mɔɔ ɛlɛtu la gyinlanle dii wɔ nyevile ne avinli.
9 Kpɔvolɛ ne hanle kɛ: ‘Mebadoa bɛ! Mebahye bɛ!
Mebahyɛ ninyɛne mɔɔ mebanyia la kɔkpula kɛ me* kunlu kɛdwo!
Mebahwe me konle dadeɛ ne! Me sa bali bɛ nwo zo konim!’+
10 Ɛgule ɛnwomenle, na nyevile ne hedale bɛ nwo zo;+Bɛnlomanle azule kpole ne abo kɛ sumi.
11 O Gyihova, nyamenle ne mɔ boni a le kɛ ɛdawɔ a?+
Nwane a le kɛ ɛdawɔ mɔɔ ɛle kpole wɔ nwuanzanwuanzayɛlɛ nu la a?+
Ahenle mɔɔ ɔwɔ kɛ bɛsulo ye na bɛto edwɛne bɛye ye ayɛlɛ, Ahenle mɔɔ yɛ nwanwane ninyɛne la.+
12 Ɛdendenle ɛ sa fema ne, na azɛlɛ ne menle bɛ.+
13 Wɔ wɔ ɛlɔlɛ kpundii ne anu, ɛlile wɔ menli ne mɔɔ ɛliele bɛ la anyunlu;+Wɔ wɔ anwosesebɛ nu, ɛbahile bɛ adenle wɔahɔ wɔ tɛnlabelɛ nwuanzanwuanza ne.
14 Menli bade;+ bɛ nwo bawoso bɛ,Menli mɔɔ de Filisitia la bade nyane.*
15 Mekɛ zɔhane, Yidɔm mbusua mgbanyinli ahonle badu,Yɛɛ Mowabe tumivolɛma anwo bawoso bɛ.+
Ɛzulolɛ baha menli mɔɔ de Keena la amuala.+
16 Ɛzulolɛ nee ahunlundetelɛ badɔ bɛ nwo.+
Ɔlua ɛ sa kpole ne ati, bɛnrɛhola bɛ bo tu, bɛbayɛ kɛ bolɛ laKɔkpula kɛ wɔ menli ne bapɛ nu ahɔ, O Gyihova,Kɔkpula kɛ menli mɔɔ wɔkpa bɛ la+ bapɛ nu ahɔ.+
17 Ɛbava bɛ wɔara na wɔalua bɛ wɔ wɔ boka ne, mɔɔ le wɔ agyapadeɛ ne la azo,+Ɛleka mɔɔ wɔziezie kɛ ɛbadɛnla la, O Gyihova,Ɛzonlenlɛsua mɔɔ wɔva ɛ sa wɔzi la, O Gyihova.
18 Gyihova bali belemgbunli dahuu.+
19 Mekɛ mɔɔ Falo mgbɔnwɔ nee ye konle ehwili ne mɔ yɛɛ ye mgbɔnwɔkavoma ne hɔle nyevile ne anu la,+Gyihova maanle nyevile ne ziale rahedale bɛ nwo zo,+Noko Yizilayɛma luale azɛlɛ resee zo wɔ nyevile ne anu.”+
20 Akee ngapezonli raalɛ Meleam, Aalɔn adiema raalɛ ne, vale akɛya, yɛɛ mraalɛ ne mɔ amuala vale akɛya nee agolezilɛ lile ɔ nzi.
21 Meleam dole edwɛne liele mrenyia ne mɔ zo kɛ:
“Bɛdo edwɛne bɛmaa Gyihova, ɔluakɛ ye anyunlunyia ɛyɛ kpole.+
Yevuandi ɛkpɔnwɔ ne nee ye kavolɛ ne yegua nyevile ne anu.”+
22 Nzinlii Mosisi vale Yizilayɛma vile Nyevile Kɔkɔlɛ ne anloa hɔle Hyɔɔ fienemgbole ne anu, na bɛdiale fienemgbole ne anu too kenle nsa, noko bɛannyia nzule.
23 Bɛradwule Meela*+ noko bɛangola bɛanno nzule mɔɔ wɔ Meela la bie ɔluakɛ ɛnee ɔyɛ ɛnwonle. Ɛhye ati a ɔvɛlɛle ɛkɛ ne Meela la.
24 Ɔti menli ne bɔle ɔ bo dendɛle bɛ nzo abo tiale Mosisi+ kɛ: “Duzu a yɛno a?”
25 Ɔzunle ɔvɛlɛle Gyihova,+ na Gyihova hilele ye baka bie. Mɔɔ ɔvuandinle ɔdole nzule ne anu la, nzule ne yɛle fɛ.
Ɛkɛ ne a Nyamenle vale ngyehyɛleɛ nee edwɛkɛ mɔɔ bɛgyinla zo bɛbua ndɛne la ɔmaanle bɛ a, na ɛkɛ ne a ɔzɔle bɛ ɔnleanle a.+
26 Ɔhanle kɛ: “Saa bɛbadie Gyihova bɛ Nyamenle ne ane bɔkɔɔ na bɛayɛ mɔɔ sɔ ɔ nye la na bɛadie ye mɛla ne mɔ na bɛali ye ngyehyɛleɛ ne amuala azo a,+ menrɛva ewule ne mɔɔ menvale membale Yigyibitima anwo zo la bie menrɛra bɛ nwo zo,+ ɔluakɛ medame Gyihova a melɛyɛ bɛ ayile a.”+
27 Akee bɛradwule Yilem, ɛleka mɔɔ nzubula 12 nee mrɛlɛ 70 wɔ la. Ɔti bɛyɛle bɛ azokoɛleɛ wɔ nzule ne anwo.
Ɔbodwɛkɛ
^ “Gyaa” le Gyihova duma ne mɔɔ bɛpɛ ye sinli la.
^ Anzɛɛ “me ɛkɛla.”
^ Hibulu aneɛ nu, “awolɛ nyane.”
^ Ɔ bo kile “Ɛnwonle.”
