Mɔɔ Limoa Kɔmaa Kɔlentema 13:1-13
-
Ɛlɔlɛ—adenle mɔɔ tɛla ndenle kɔsɔɔti la (1-13)
13 Saa mekola menli nee anwumabɔvolɛma aneɛ ngakyile ne mɔ ka na menlɛ ɛlɔlɛ a, ɛnee mele kɛ ɛlawule anzɛɛ bulalɛ mɔɔ dielie la.
2 Na saa melɛ ngapezo ahyɛlɛdeɛ ne na mete fealeranu edwɛkɛ nwuanzanwuanza kɔsɔɔti abo na melɛ ndelebɛbo kɔsɔɔti,+ na melɛ diedi kɔsɔɔti mɔɔ maa mekola metudu awoka, na menlɛ ɛlɔlɛ a, menle ɛhwee.*+
3 Na saa mefa mɔɔ melɛ ye la amuala menea awie mɔ,+ na mefa me sonlabaka ne memaa amaa meadu me nwo, na menlɛ ɛlɔlɛ a,+ menrɛnyia nvasoɛ biala.
4 Ɛlɔlɛ+ lɛ abotane+ yɛɛ ɔ ti akunlu le kɛnlɛma.+ Ɛlɔlɛ ɛndwe nungule.*+ Ɔndu ɔ nloa anu, ɔmmemaa ɔ nwo zo,+
5 ɔnyɛ ninyɛne mgbane mgbane,*+ ɔnle angomedi,+ ɔnva ɛya ndɛndɛ.+ Ɔnva ɛtane ɔnzie ye nu.*+
6 Ɔ nye ɛnlie ninyɛndane nwo,+ emomu ɔdi fɛlɛko wɔ nɔhalɛ ne anwo.
7 Ɔto ɔ rɛle aze wɔ debie biala anu,+ ɔdie debie biala ɔdi,+ ɔlɛ debie biala anu anyelazo,+ ɔgyinla debie biala anloa.+
8 Ɛlɔlɛ ɛmkpo aze ɛlɛ.* Noko saa ngapezo nwo ahyɛlɛdeɛ wɔ ɛkɛ a, bɛbaye bɛavi ɛkɛ; saa aneɛ ngakyile ɛhanlɛ wɔ ɛkɛ a, bɛ bo bapɛ; saa ndelebɛbo wɔ ɛkɛ a, ɔbavi ɛkɛ.
9 Ɔluakɛ yɛ ndelebɛbo ɛnli munli+ yɛɛ ngapezo mɔɔ yɛka la ɛnli munli,
10 na saa mɔɔ di munli la ba a, mɔɔ ɛnli munli la bavi ɛkɛ.
11 Mekɛ mɔɔ mele kakula la, mendendɛle kɛ kakula, mendwenlenle kɛ kakula, yɛɛ menzuzule edwɛkɛ nwo kɛ kakula; noko kɛkala mɔɔ meyɛ kpanyinli la, megyakyi ngakula ninyɛne ne mɔ ɛyɛlɛ.
12 Kɛkala, yɛnwu ninyɛne monzomonzo kɛ asɛɛ yɛlɛnea bulalɛ neanleɛ nu la, na akee yɛbanwu ninyɛne wienyi.* Kɛkala, mɔɔ meze la ɛnli munli, noko kenle bie ɔbali munli, kɛ mɔɔ bɛze medame noko kpalɛ la.
13 Na kɛkala ninyɛne nsa ɛhye mɔ a wɔ ɛkɛ a: diedi, anyelazo, ɛlɔlɛ; na mɔɔ le kpole kpalɛ wɔ nu la a le ɛlɔlɛ.+
Ɔbodwɛkɛ
^ Anzɛɛ “nvasoɛ ɛnle me nwo zo.”
^ Anzɛɛ “Ɛlɔlɛ ɛnle anyebolo.”
^ Anzɛɛ “Ɔmbu nvonleɛ anzɛɛ ɛtane nwo mgbonda.”
^ Anzɛɛ “basabasa.”
^ Anzɛɛ “Ɛlɔlɛ ɛnwie ɛlɛ.”
^ Giliki aneɛ nu, “akee yɛ nye bayia zo.”
