Samoɛle Mɔɔ Limoa 20:1-42
-
Dwɔnatan lile nɔhalɛ maanle Devidi (1-42)
20 Akee Devidi nriandile vile Naeyɔto mɔɔ wɔ Releema la. Ɔhɔle Dwɔnatan anwo lɔ na ɔbizale ye kɛ: “Duzu a meyɛ a?+ Amumuyɛ boni a meyɛ, yɛɛ ɛtane boni a meyɛ metia wɔ papa mɔɔ ɔkpondɛ kɛ ɔku me* a?”
2 Na Dwɔnatan zele ye kɛ: “Ɔnrɛzi zɔ ɛlɛ!+ Ɛnrɛwu. Nea! Me papa ɛnrɛyɛ debie biala, kpole o, ekyi o, mɔɔ ɔnrɛmaa menrɛde a. Duzu ati a me papa bava edwɛkɛ ɛhye avea me a? Ɛhye ɛnrɛzi ɛlɛ.”
3 Noko Devidi hanle ndane bokale nwo kɛ: “Wɔ papa ze ye wienyi kɛ menyia ɛ nyunlu ɛlolɛ+ na ɔbaha kɛ, ‘Bɛmmamaa Dwɔnatan te ɛhye anrɛɛ ɔkɛva ɛya.’ Noko mekɛ ala mɔɔ Gyihova de aze yɛɛ mekɛ ala mɔɔ ɛde aze* la, me nee ewule avinli anwa!”+
4 Na Dwɔnatan zele Devidi kɛ: “Debie biala mɔɔ ɛkɛha la, mebayɛ meamaa wɔ.”
5 Ɔti Devidi zele Dwɔnatan kɛ: “Ɛhyema le siane fofolɛ,+ na ɔwɔ kɛ me nee belemgbunli ne tɛnla aze di debie; maa mengɔ, na mebahɔvea kpɔkɛ nu lɔ too kenle nsa ne azo nɔsolɛ nu.
6 Saa wɔ papa nwu kɛ menle ɛkɛ a, ka kɛ, ‘Devidi zɛlɛle me adenle kɛ memaa ɔhɔ ye sua zo Bɛtelɛhɛm+ ndɛndɛ ɔluakɛ abusua ne amuala babɔ bɛ ɛvolɛ biala afɔle ne wɔ ɛkɛ.’+
7 Saa ɔka kɛ, ‘Edwɛkɛ kpalɛ ɔ’ a, ɔkile kɛ ɔle anzodwolɛ ɔmaa wɔ sonvolɛ. Noko saa ɔfa ɛya a, ɛnee ɛze kɛ yebɔ kpɔkɛ kɛ ɔyɛ me ɛtane.
8 Da ɛlɔlɛ kpundii ali kile wɔ sonvolɛ,+ ɔluakɛ ɛ nee wɔ sonvolɛ ɛyɛ ngyekyeleɛ wɔ Gyihova anyunlu.+ Noko saa medi fɔlɛ a,+ ɛnee ɛdawɔ mumua ne ku me. Duzu ati a ɔwɔ kɛ ɛfa me ɛkɔmaa wɔ papa ɛ?”
9 Na Dwɔnatan hanle kɛ: “Mmanyia adwenle zɛhae bɔbɔ! Saa menwu kɛ me papa kpondɛ kɛ ɔyɛ wɔ ɛtane a, menrɛha menrɛhile wɔ ɔ?”+
10 Akee Devidi zele Dwɔnatan kɛ: “Saa wɔ papa ammaa wɔ mualɛ kpalɛ a, nwane a baha ahile me a?”
11 Dwɔnatan zele Devidi kɛ: “Bɛla maa yɛhɔ kpɔkɛ nu lɔ.” Yemɔti bɛ mu nwiɔ bɛhɔle kpɔkɛ nu lɔ.
12 Na Dwɔnatan zele Devidi kɛ: “Maa Gyihova, Yizilayɛ Nyamenle ne ɛli daselɛ kɛ ɛhyema anzɛɛ kenle nsa ne azo mekɛ zɛhae, mebaha ɛhye anwo edwɛkɛ meahile me papa. Saa ɔlɛ Devidi anwo adwenle kpalɛ a, asoo menrɛdo wɔ nrɛlaleɛ na menrɛmaa ɛnrɛde ɔ?
13 Noko saa me papa kulo kɛ ɔyɛ wɔ ɛtane na meambɔ wɔ amaneɛ meammaa wɔangɔ anzodwolɛ nu a, Gyihova ɛdua Dwɔnatan kakɛ na ɔgua bie zo. Gyihova nee wɔ ɛlua+ kɛ mɔɔ ɔ nee me papa luale la.+
14 Na saa mede ngoane nu anzɛɛ mewu bɔbɔ a, ɛnrɛla Gyihova ɛlɔlɛ kpundii ne ali ɛnrɛhile me ɔ?+
15 Saa Gyihova ye Devidi kpɔvolɛma kɔsɔɔti fi azɛlɛ ye azo bɔbɔ a, mmaye wɔ ɛlɔlɛ kpundii ne ɛfi me abusua ne anwo zo ɛlɛ.”+
16 Ɔti Dwɔnatan nee Devidi abusua ne yɛle ngyekyeleɛ kɛ: “Gyihova bahwe Devidi kpɔvolɛma anzo.”
17 Yemɔti Dwɔnatan maanle Devidi hanle ɛlɔlɛ mɔɔ ɔlɛ ɔmaa ye la anwo ndane bieko, ɔluakɛ ɛnee ɔkulo ye kɛ ɔdaye ɔ nwo* la.+
18 Akee Dwɔnatan zele ye kɛ: “Ɛhyema le siane fofolɛ,+ na bɛbanwu kɛ ɛnle ɛkɛ, ɔluakɛ wɔ ebia ne bala ɛkɛ ne mgbane.
19 Kenle nsa ne azo, akee bɛbanwu ye bɔkɔɔ kɛ ɛnle ɛkɛ, na ɔwɔ kɛ ɛba ɛleka mɔɔ ɛkenle* ɛveale la na ɛtɛnla bolɛ ɛhye anwo ɛke.
20 Mebado ɛda mbaka nsa meagua ye foa ko kɛ asɛɛ meto meabɔ debie la.
21 Saa mesoa me sonvolɛ ne a, mebaha kɛ, ‘Kɔkpondɛ ɛda mbaka ne mɔ.’ Saa meka mekile sonvolɛ ne kɛ, ‘Nea! Ɛda mbaka ne mɔ wɔ wɔ foa ko, kɔva’ a, ɛnee ɛbahola wɔazia wɔara, ɔluakɛ mekɛ ala mɔɔ Gyihova de aze la, ɔkile kɛ debie biala le anzodwolɛ maa wɔ na esiane biala ɛnle ɛkɛ.
22 Noko saa meka mekile kakula ne kɛ, ‘Nea! Ɛda mbaka ne mɔ wɔ ɛ nyunlu lɔ’ a, ɛnee kɔ, ɔluakɛ Gyihova kulo kɛ ɛkɔ.
23 Noko ɛwɔkɛ ne mɔɔ me nee wɔ yɛ mu nwiɔ yɛbɔ yɛ nwo la ɛdeɛ,+ Gyihova ɛyɛ dasevolɛ wɔ yɛ avinli dahuu.”+
24 Yemɔti Devidi hɔveale kpɔkɛ nu lɔ. Mɔɔ siane fofolɛ ne dwule la, belemgbunli ne radɛnlanle aze kɛ ɔdi debie.+
25 Ɛnee belemgbunli ne de ye ebia ne azo wɔ bane ne anwo kɛ mɔɔ ɔta ɔyɛ la. Ɔ nee Dwɔnatan anye bɔ zo yɛɛ Abenɛɛ+ de Sɔɔlo foa ko, noko ɛnee Devidi ebia ne la ɛkɛ mgbane.
26 Kenle zɔhane, Sɔɔlo anga ɛhwee ɔluakɛ ɔhanle ye ɔ ti anu kɛ: ‘Bie a debie ɛzi yemɔti ɔ nwo ɛnde.+ Ɛhɛe, ɔbayɛ kɛ ɔ nwo ɛnde.’
27 Na siane fofolɛ ne alehyenlɛ nu, wɔ kenle nwiɔ ne azo, ɛnee Devidi ebia ne tɛda ɛkɛ mgbane. Akee Sɔɔlo bizale ɔ ra Dwɔnatan kɛ: “Duzu ati a anoma nee ɛnɛ Gyɛsi+ ara ne ambanli debie ɛ?”
28 Dwɔnatan buale Sɔɔlo kɛ: “Devidi zɛlɛle me adenle kɛ ɔkɔ Bɛtelɛhɛm.+
29 Ɔhanle kɛ, ‘Mesɛlɛ wɔ, maa me adenle maa mengɔ, ɔluakɛ abusua ne babɔ afɔle wɔ sua ne azo, na me diema bie ɛvɛlɛ me kɛ membɛla. Ɔti saa menyia ɛ nyunlu ɛlolɛ a, mesɛlɛ wɔ, maa mengɔnwu me mediema ne mɔ.’ Ɛhye ati a yeamba belemgbunli ɛkponle ye anwo a.”
30 Sɔɔlo vale Dwɔnatan anwo ɛya na ɔhanle kɛ: “Wɔmɔ atuadelɛnli raalɛ ara, ɛdwenle kɛ menze kɛ ɛkulo kɛ ɛfa ɛ nwo ɛbɔnle Gyɛsi ara ne na ɛfa ɛgua ɛ nyunlu aze na ɛbɔ wɔ mame anyiemgba* ɔ?
31 Mekɛ ala mɔɔ Gyɛsi ara ne de ngoane nu wɔ azɛlɛ ye azo la, ɛdawɔ nee wɔ belemgbunlililɛ ne ɛnrɛgyinla ɛlɛ.+ Yemɔti soa awie maa ɔhɔva ye ɔrɛlɛ me, ɔluakɛ ɔfɛta kɛ ɔwu.”*+
32 Noko Dwɔnatan bizale ye papa Sɔɔlo kɛ: “Duzu ati a ɔwɔ kɛ bɛku ye a?+ Duzu a yeyɛ a?”
33 Na Sɔɔlo dole ye atwɛ ne kɛ ɔfa yeawɔ ye,+ ɔti Dwɔnatan nwunle kɛ ye papa ɛbɔ kpɔkɛ kɛ ɔku Devidi.+
34 Ɛkɛ ne ala, Dwɔnatan vale ɛya kpole dwazole vile ɛkponle ne anwo, na yeanli aleɛ wɔ siane fofolɛ ne kenle ne mɔɔ tɔ zo nwiɔ la azo, ɔluakɛ Devidi+ ati ɔvale ɛya yɛɛ ye papa noko guale ɔ nyunlu aze.
35 Nwonlomɔ ne, Dwɔnatan dwazole hɔle kpɔkɛ nu lɔ kɛ mɔɔ ɔ nee Devidi hanle ziele la, na ɛnee sonvolɛ kakula bie boka ɔ nwo.+
36 Na ɔzele ye sonvolɛ ne kɛ: “Mesɛlɛ wɔ, nriandi kɔkpondɛ ɛda mbaka ne mɔ mɔɔ melɛto la.” Sonvolɛ ne nriandile hɔle, na Dwɔnatan dole ɛda baka ne ɔmaanle ɔdɛlale ye.
37 Mɔɔ sonvolɛ ne dwule ɛleka mɔɔ Dwɔnatan dole ɛda baka ne hɔdwule la, Dwɔnatan deanle nu vɛlɛle sonvolɛ ne kɛ: “Ɛda baka ne ɛnle ɛ nyunlu lɔ ɔ?”
38 Dwɔnatan deanle nu vɛlɛle sonvolɛ ne kɛ: “Ka ɛ nwo! Kɔ ndɛndɛ! Mmagyinla ɛkɛ!” Na Dwɔnatan sonvolɛ ne sesale ɛda mbaka ne mɔ na ɔziale ɔrale ɔ menle anwo ɛkɛ.
39 Ɛnee sonvolɛ ne ɛnze mɔɔ ɛlɛkɔ zo la anwo ɛhwee; Dwɔnatan nee Devidi ala a ze mɔɔ ɔkile a.
40 Akee Dwɔnatan vale ye konle ninyɛne ne mɔ maanle ye sonvolɛ ne na ɔzele ye kɛ: “Fa kɔ sua zo.”
41 Mɔɔ sonvolɛ ne hɔle la, Devidi vi ɛleka bie mɔɔ bikye wɔ nyiakɛ afoa nu la vindele. Akee ɔbutule ɔ nyunlu aze na ɔbɔle ɔ ti aze fane nsa, bɛvole bɛ nloa anwo na ko biala zunle maanle ɔ gɔnwo, noko Devidi zunle kpole kpalɛ.
42 Dwɔnatan zele Devidi kɛ: “Kɔ anzodwolɛ nu, ɔluakɛ yɛ mu nwiɔ yɛha ndane+ wɔ Gyihova duma nu kɛ, ‘Gyihova ɛli medame nee ɛdawɔ yɛ avinli daselɛ na ɔli ɛ bo zo amra nee me bo zo amra avinli daselɛ dahuu.’”+
Akee Devidi dwazole hɔle, na Dwɔnatan ziale hɔle sua zo.
Ɔbodwɛkɛ
^ Anzɛɛ “ɔlɛkpondɛ me ɛkɛla.”
^ Anzɛɛ “wɔ ɛkɛla de aze.”
^ Anzɛɛ “ɔdaye ye ɛkɛla.”
^ Hibulu aneɛ nu, “mɔɔ gyimayɛlɛ kenle ne.”
^ Hibulu aneɛ nu, “ɛye wɔ mame anwo ɛto zo anyiemgba nu.”
^ Hibulu aneɛ nu, “ɔluakɛ ɔle ewule ara.”
