Dwɔhyua 5:1-15
5 Mɔɔ Amɔlema+ arelemgbunli kɔsɔɔti mɔɔ wɔ Dwɔdan adɔleɛ afoa nu* nee Keenama+ arelemgbunli kɔsɔɔti mɔɔ wɔ nyevile ne anloa lɔ la dele kɛ Gyihova ɛmaa Dwɔdan azule ne ɛsesa wɔ Yizilayɛma kɔsɔɔti anyunlu hɔkpulale kɛ bɛpɛle la, bɛ ahonle dule*+ na Yizilayɛma ati bɛannyia akɛnrasesebɛ bieko.*+
2 Mekɛ zɔhane Gyihova zele Dwɔhyua kɛ: “Fa awolɛ mɔɔ yɛ nla la yɛ dadeɛ na pɛ Yizilayɛma mrenyiazo+ bieko.”
3 Ɔti Dwɔhyua vale awolɛ mɔɔ yɛ nla la yɛle dadeɛ pɛle Yizilayɛma mrenyiazo wɔ Gebeyat-haalalɔto.*+
4 Deɛmɔti Dwɔhyua pɛle bɛ mrenyiazo la ɛne: Mrenyia kɔsɔɔti mɔɔ kɔ konle* mɔɔ vile Yigyibiti la wule fienemgbole ne anu wɔ mekɛ mɔɔ bɛvi Yigyibiti bɛlɛba la.+
5 Bɛpɛle menli kɔsɔɔti mɔɔ vile Yigyibiti la mrenyiazo, noko bɛampɛ menli kɔsɔɔti mɔɔ bɛwole bɛ wɔ fienemgbole ne anu wɔ mekɛ mɔɔ bɛvi Yigyibiti bɛlɛba la mrenyiazo.
6 Yizilayɛma luale fienemgbole ne anu ɛvolɛ 40+ hɔkpulale kɛ maanle ne amuala wule, ɛhye kile, menli mɔɔ kola kɔ konle mɔɔ vile Yigyibiti na bɛandie Gyihova ane+ la. Gyihova hanle ndane hilele bɛ kɛ ɔnrɛmaa bɛnrɛnwu azɛlɛ ne+ mɔɔ Gyihova hanle nwolɛ ndane hilele bɛ nenyia mɔ kɛ ɔbava yeamaa bɛ la ɛlɛ,+ azɛlɛ mɔɔ meleke nee wolɛ se zolɛ+ la.
7 Yemɔti ɔvale bɛ mra ne mɔ ɔziele bɛ gyakɛ anu.+ Ɛhye mɔ a Dwɔhyua pɛle bɛ mrenyiazo a; ɛnee bɛtɛpɛle bɛ mrenyiazo ɔluakɛ mekɛ mɔɔ bɛlua adenle nu la bɛampɛ bɛ mrenyiazo.
8 Mɔɔ bɛpɛle maanle ne amuala mrenyiazo bɛwiele la, bɛdɛnlanle azokoɛleɛ ɛkɛ ne too bɛ nganlɛ ne mɔ hɔle.
9 Akee Gyihova zele Dwɔhyua kɛ: “Ɛnɛ kenle ye, meye Yigyibitima anyiemgba ne mevi bɛ nwo zo.” Ɔti bɛvɛlɛle ɛkɛ ne Gelegale*+ too badwu ɛnɛ.
10 Yizilayɛma hɔle zo dɛnlanle Gelegale, na bɛlile Akpabɛnwo ne wɔ siane ne kenle 14 ne azo+ nɔsolɛ nu, wɔ Gyɛleko ɛsɛlɛ ne azo.
11 Mɔɔ bɛlile Akpabɛnwo ne na aleɛ hyenle la, bɛbɔle ɔ bo kɛ bɛdi azɛlɛ ne azo aleɛ ne bie, paano mɔɔ mgbɔvonle ɛnle nu+ nee ma ngyehye, wɔ kenle zɔhane ala.
12 Kenle mɔɔ bɛlile azɛlɛ ne azo aleɛ ne bie la, mana ne gyakyile; Yizilayɛma annyia mana bieko+ na bɛbɔle ɔ bo bɛlile Keena azɛlɛ ne azo aleɛ ne bie wɔ ɛvolɛ zɔhane anu.+
13 Mɔɔ Dwɔhyua bikyele Gyɛleko la, ɔmaanle ɔ nye zo na ɔnwunle kɛ nrenyia bie+ gyi ɔ nyunlu nehane na ɔlɛ konle dadeɛ ɔ sa nu.+ Dwɔhyua hɔle ɔ nwo ɛkɛ na ɔbizale ye kɛ: “Ɛwɔ yɛ afoa anzɛɛ ɛwɔ yɛ kpɔvolɛma afoa?”
14 Na nrenyia ne hanle kɛ: “Kyɛkyɛ, emomu, mera kɛ Gyihova ɛlɔne ne kpanyinli.”+ Yemɔti Dwɔhyua lale na ɔbutule ɔ nyunlu aze na ɔbizale ye kɛ: “Duzu edwɛkɛ a me menle ka ahile ye sonvolɛ a?”
15 Gyihova ɛlɔne kpanyinli ne buale Dwɔhyua kɛ: “Yeye wɔ mgbɔlaboa ne mɔɔ ɛwula la, ɔluakɛ ɛleka mɔɔ ɛgyi la le nwuanzanwuanza.” Na ɛkɛ ne ala Dwɔhyua yɛle ye zɔ.+
Ɔbodwɛkɛ
^ Hibulu aneɛ nu, “mɔɔ wɔ nyevile ne afoa nu.”
^ Hibulu aneɛ nu, “bɛ ahonle holole.”
^ Hibulu aneɛ nu, “ɛnee sunsum biala ɛnle bɛ nu bieko.”
^ Ɔ bo kile “Mrenyiazo Ɛpɛlɛ Boka.”
^ Anzɛɛ “Mrenyia mɔɔ bɛdwu sogya ɛhɔlɛ.”
^ Ɔ bo kile “Debie Ɛyelɛ; Ɛye Ɛvi Ɛkɛ.”
