Edwɛne 7:1-17
-
Gyihova le Ndɛnebuavolɛ tenlene
-
“O Gyihova, bua me ndɛne” (8)
-
Awolɛyelɛ* edwɛne mɔɔ Devidi dole maanle Gyihova, ɔfale Bɛngyamanenli Kuhye edwɛkɛ ne anwo.
7 O Gyihova me Nyamenle, wɔ nu a menriandi mebafea a.+
Ye me fi bɛdabɛ mɔɔ bɛyɛ me kpɔdekpɔde la asa anu na die me.+
2 Anrɛɛ bɛbatete me nu* azinli azinli kɛ mɔɔ awenade yɛ ye la,+Na bɛava me bɛahɔ mɔɔ awie ɛnrɛlie me a.
3 O Gyihova me Nyamenle, saa mevo wɔ ɛhye anwo,Saa meyɛ amumuyɛ,
4 Saa meyɛ ɛtane metia awie mɔɔ yɛ me boɛ,+Anzɛɛ saa mgbane gyɛne nu ala meve me kpɔvolɛ ninyɛne a,*
5 Ɛnee maa kpɔvolɛ ɛvoa me na ɔhye me;*Maa ɔtietia me nwo zo* wɔ azɛlɛ ne anwoNa ɔmaa me anyunlunyia ɛminli ndɛtɛlɛ ne anu. (Sila)
6 O Gyihova, fa ɛya dwazo;Dwazo tia me kpɔvolɛma ɛya kpole ne;+Dwazo boa me, na nea maa pɛlepɛlelilɛ ɛla ali.+
7 Maa maanle maanle ne mɔ ɛbɛnga wɔ ɛyia;Na ɛvi anwuma ɛ nee bɛ bali.
8 Gyihova babua menli ndɛne.+
O Gyihova, bua me ndɛne kɛ mɔɔ me tenleneyɛlɛ si de laYɛɛ kɛ mɔɔ me nɔhalɛlilɛ* si de la.+
9 Mesɛlɛ wɔ, maa amumuyɛma ninyɛndane ne ɛrɛla awieleɛ.
Noko maa tenlenema ɛgyinla kpundii,+Ɔluakɛ wɔmɔ a ɛle tenlene Nyamenle+ ne mɔɔ neɛnlea ahonle nu+ nee awie biala nganeɛdelɛ nu* a.+
10 Nyamenle le me enyinlike,+ bɛdabɛ mɔɔ bɛ ahonle nu te la Ngoanedievolɛ.+
11 Nyamenle le tenlene Ndɛnebuavolɛ,+Na Nyamenle bua ndɛne alehyenlɛ biala.
12 Saa awie annu ɔ nwo a,+ Ɔsi ye konle dadeɛ ne;+Ɔkpo ye ɛda ne na ɔsua.+
13 Ɔsiezie ye ewule akodeɛ ne mɔ;Ɔsua ye ɛda mbaka ati senle ne mɔ.+
14 Nea awie mɔɔ ɛnrenzɛ amumuyɛ;Yenrenzɛ ngyegyelɛ na yewo adalɛ.+
15 Ɔtu kuma na ɔmaa ɔkɔ kpalɛ,Noko ɔtɔ kuma ne mɔɔ ɔdaye mumua ne ɔdule la anu.+
16 Ngyegyelɛ mɔɔ ɔfa ɔba la bazia aragua ɔ ti zo;+Ye basabasayɛlɛ ne baragua ɔ ti avinli.
17 Mebaye Gyihova ayɛlɛ wɔ ye pɛlepɛlelilɛ ne ati;+Mebado ayɛlɛyelɛ edwɛne meamaa Gyihova,+ Anwuma Anwumanli ne duma ne.+
Ɔbodwɛkɛ
^ Anzɛɛ “Nyanelilɛ.”
^ Anzɛɛ “me ɛkɛla nu.”
^ Anzɛɛ ɔkola ɔkile, “Saa meanyɛ mɔɔ dwazo tia me mgbane gyɛne nu ala la ɛhwee a.”
^ Anzɛɛ “me ɛkɛla.”
^ Hibulu aneɛ nu, “me ngoane zo.”
^ Anzɛɛ “munlililɛ.” Nea Edwɛkɛbohilelɛ.
^ Anzɛɛ “sɔ ahonle nee kilenzia ne nea.”
