Asoo Amumuyɛyɛlɛ Bara Awieleɛ?
Saa basabasayɛlɛ si a, bie a ɛbabiza ɛ nwo kɛ: ‘Asoo Nyamenle dwenle yɛ nwo? Duzu ati a ninyɛne ɛhye mɔ sisi a? Asoo amumuyɛyɛlɛ a bara awieleɛ? Kɛ ɔkɛyɛ na meali me ɛzulolɛ zo ɛ?’ Baebolo ne fa kpuya ɛhye mɔ anwo mualɛ mɔɔ tɔ ɛnzolɛ nu la maa.
Kɛzi Nyamenle bu amumuyɛyɛlɛ ɛ?
Nyamenle kyi basabasayɛlɛ nee amumuyɛyɛlɛ. (Edwɛne 11:5; Mrɛlɛbulɛ 6:16, 17) Yɛɛ Gyisɛse mɔɔ le Nyamenle agyakɛnugyinlavolɛ la noko deanle ye ɛdoavolɛma ne wɔ mekɛ bie mɔɔ bɛbodale awie la. (Mateyu 26:50-52) Bie mɔ ka kɛ bɛko wɔ Nyamenle duma nu ɛdeɛ, noko ɔnlie nyɛleɛ zɔhane mɔ ɔndo nu. Nɔhalɛ nu, ɔndie bɛ asɔneyɛlɛ bɔbɔ.—Ayezaya 1:15.
Nyamenle dwenle menli kɔsɔɔti anwo, bɔbɔ bɛdabɛ mɔɔ amumuyɛyɛlɛ ti bɛlɛnwu amaneɛ la. (Edwɛne 31:7; 1 Pita 5:7) Baebolo ne eza ka kɛ Nyamenle bamaa basabasayɛlɛ kɔsɔɔti ara awieleɛ.—Ayezaya 60:18.
Mɔɔ fa amumuyɛyɛlɛ ba la
Baebolo ne maa yɛnwu deɛmɔti amumuyɛyɛlɛ kɔ zo la: “Sonla di sonla nwo zo tumi maa ɔnwu amaneɛ.” (Nolobɔvo 8:9) Ɔvi tete ne bɛdabɛ mɔɔ bɛlɛ tumi la dua amumuyɛ adenle zo sisi menli. Bie mɔ dua amumuyɛyɛlɛ zo ko tia menli mɔɔ ɛlɛsisi bɛ la.—Nolobɔvo 7:7.
Amumuyɛyɛlɛ bavi ɛkɛ
Nyamenle ɛbɔ ɛwɔkɛ kɛ ɔbaye ɛzulolɛ nee basabasayɛlɛ yeavi ɛkɛ na yeamaa anzodwolɛ ara azɛlɛ ye azo. (Ayezaya 32:18; Maeka 4:3, 4) Mɔɔ ɔbayɛ la ɛne:
Ɔbaye mɔɔ fa amumuyɛyɛlɛ ba la yeavi ɛkɛ. Nyamenle baye alesama tumililɛ yeavi ɛkɛ na yeava ye arane ne mɔɔ banlea ewiade kɔsɔɔti azo la yeazie ɛkɛ. Gyisɛse Kelaese mɔɔ bali zolɛ Belemgbunli la bali pɛlepɛle yɛɛ ɔbaye nzisi nee basabasayɛlɛ yeavi ɛkɛ. (Edwɛne 72:2, 14) Zɔhane mekɛ ne, awie biala ɛnrɛyɛ amumuyɛ. Menli ‘anye balie kpalɛ wɔ anzodwolɛ dɔɔnwo anu.’—Edwɛne 37:10, 11.
Ɔbaye debie biala mɔɔ ɛvi amumuyɛyɛlɛ nu ɛra la yeavi ɛkɛ. Nyamenle baye ngyegyelɛ mɔɔ amumuyɛyɛlɛ ti menli gyi ɔ nloa la. (Ayezaya 65:17; Yekile 21:3, 4) Eza yebɔ ɛwɔkɛ kɛ ɔbadwazo mowuamra na bɛadɛnla azɛlɛ mɔɔ anzodwolɛ wɔ zo la azo.—Dwɔn 5:28, 29.
Baebolo ne maa yɛnwu deɛmɔti ɔwɔ kɛ yɛdie yɛdi kɛ ɔnrɛhyɛ Nyamenle bayɛ zɔ la. Noko bie a ɛbabiza kɛ, ‘Duzu ati a Nyamenle ɛtɛyele amumuyɛyɛlɛ ɛtɛfile ɛkɛ a?’ Amaa wɔanwu muala ne la nea vidio ne mɔ se, Duzu Ati A Nyamenle Maa Amaneɛnwunlɛ Nwo Adenle A?
a “Amumuyɛyɛlɛ” kile basabasayɛlɛ anzɛɛ maanlema mɔɔ bɛnwunlonwunla bɛ amaa ɛzulolɛ aha bɛ na ɔlua zo bayɛ nzenzaleɛ wɔ maanyɛlɛ, ɛzonlenlɛ nu anzɛɛ ɛbɛlabɔlɛ nu la. Noko, menli lɛ adwenle ngakyile wɔ nyɛleɛ bie mɔɔ kile amumuyɛyɛlɛ la anwo.
Bie A Eza Ɛ Nye Balie
EDWƐKƐTILE NGAKYILE
Kɛzi Ɛbade Wɔ Adwenleadwenle Zo La
Nzuzulɛ kpalɛ nee Baebolo tɛkese boni mɔ a baboa wɔ amaa wɔade adwenleadwenle zo a?
EDWƐKƐTILE NGAKYILE
Ninyɛne Bayɛ Kpalɛ Kenle Bie
Duzu ati a ɛwɔkɛ mɔɔ wɔ Baebolo ne anu la le ngakyile fi kenle bie nwo edwɛkɛ mɔɔ menli ka la anwo ɛ?
BAEBOLO KPUYA MƆƆ BƐBUA
Nyamenle Belemgbunlililɛ Ne A Le Duzu?
Suzu deɛmɔti Nyamenle arane ne le kpalɛ tɛla arane biala la anwo.
ƐZINZALƐ ARANE
Nyamenle Belemgbunlililɛ Ne Bayɛ Duzu?
Gyisɛse ze kɛ Nyamenle Belemgbunlililɛ ne ala a le arane mɔɔ bahola ali ngyegyelɛ mɔɔ wɔ azɛlɛ ye azo la anwo gyima a. Duzu a zɔhane Belemgbunlililɛ ne ɛyɛ mɔɔ yemaa anwodozo mɔɔ yɛlɛ la ɛyɛ kpole a?
