1. Duzu ati a Ngakyelɛlilɛ kenle ne a anwo hyia kpalɛ wɔ ɛvolɛ ne anu a? (Luku 22:​19, 20)

 WƆ GYIHOVA menli afoa nu, Kelaese ewule Ngakyelɛlilɛ ne a le kenle titili kpalɛ wɔ ɛvolɛ ne anu a. Yemɔ a le ɛvoyia kokye mɔɔ Gyisɛse mumua ne hanle kɛ ye ɛdoavolɛma ɛli a. (Kenga Luku 22:​19, 20.) Ninyɛne mɔɔ maa yɛ nye da Ngakyelɛlilɛ ne ade la zonle. Maa yɛzuzu bie mɔ anwo.

2. Ninyɛne mɔɔ ɔti yɛ nye da Ngakyelɛlilɛ ne ade la bie mɔ a le boni?

² Ngakyelɛlilɛ ne boa yɛ maa yɛdwenledwenle kɛzi ɛkpɔnedeɛ ne sonle bolɛ la anwo. Ɔmaa yɛkakye ndenle mɔɔ yɛbahola yɛalua zo yɛahile kɛ yɛ nye sɔ Gyisɛse afɔlebɔlɛ ne la. (2 Kɔl. 5:​14, 15) Eza ɔmaa yɛnyia nwolɛ adenle ‘yɛmaa yɛ nwo anwosesebɛ.’ (Wlo. 1:12) Ɛvolɛ biala, mediema mɔɔ bɛgyakyi debiezukoalɛ nee daselɛlilɛ ɛhɔlɛ la ba Ngakyelɛlilɛ ne bie. Kɛmɔ bɛdie bɛ kɛnlɛma wɔ Ngakyelɛlilɛ mekɛ ne anu la ati, ɔka bie mɔ ahonle ɔmaa bɛsia bɛbasonle Gyihova. Yɛɛ mɔɔ anyelielɛma dɔɔnwo nwu ye nee mɔɔ bɛte la ka bɛ maa bɛnyia ɛhulolɛ kɛ bɛbabɔ ɔ bo bɛazukoa Baebolo ne. Ninyɛne ɛhye mɔ ati a Ngakyelɛlilɛ ne sonle bolɛ maa yɛ la!

3. Kɛzi Ngakyelɛlilɛ ne ka mediema mɔɔ wɔ ewiade amuala la bɔ nu ɛ? (Eza nea nvoninli ne.)

³ Eza dwenle kɛzi Ngakyelɛlilɛ ne ka mediema mɔɔ wɔ ewiade amuala la bɔ nu la anwo. Saa sɛnzɛne ne ɛlɛkɔ ahɔdɔ a, Gyihova Alasevolɛ mɔɔ wɔ ewiade amuala la yia nu kɛ bɛdi Ngakyelɛlilɛ ne. Yɛ muala yɛtie ɛdendɛlɛ mɔɔ si kɛzi ɛkpɔnedeɛ ne anwo hyia azo la. Yɛto ayɛlɛyelɛ edwɛne nwiɔ, bɛfa paano ne nee nwanye ne bɛfa yɛ nyunlu yɛɛ yɛfi yɛ ahonle nu yɛka “amen” wɔ asɔne nna ne mɔɔ bɛyɛ la biala awieleɛ. Mɔɔ dɔnehwele 24 kapɛ nu la, ɛnee asafo mɔɔ wɔ ewiade amuala la ɛyɛ Ngakyelɛlilɛ ne.  Ɛbahola wɔapɛ kɛzi Gyihova nee Gyisɛse anye die wɔ mekɛ mɔɔ bɛbanwu kɛ yɛlɛbɔ nu yɛaye bɛ ayɛlɛ wɔ adenle ɛhye azo la anwo nvoninli ɔ?

4. Duzu a yɛbazuzu nwo wɔ edwɛkɛ ɛhye anu a?

⁴ Wɔ edwɛkɛ ɛhye anu, yɛbazuzu kpuya ɛhye mɔ anwo: Kɛ ɔkɛyɛ na yɛaziezie yɛ ahonle yɛamaa Ngakyelɛlilɛ ne ɛ? Kɛ ɔkɛyɛ na yɛaboa awie mɔ yɛamaa bɛanyia zolɛ nvasoɛ ɛ? Yɛɛ kɛ ɔkɛyɛ na yɛaboa bɛdabɛ mɔɔ bɛgyakyi debiezukoalɛ nee daselɛlilɛ ɛhɔlɛ la ɛ? Kpuya ɛhye mɔ anwo mualɛ ne baboa yɛ yeamaa yɛaziezie yɛ nwo yɛamaa ayia nwuanzanwuanza ɛhye.

KƐ ƆKƐYƐ NA YƐAZIEZIE YƐ AHONLE YƐAMAA NGAKYELƐLILƐ NE Ɛ?

5. (a) Duzu ati a ɔwɔ kɛ yɛdwenledwenle kɛzi ɛkpɔnedeɛ ne sonle bolɛ la anwo a? (Edwɛne 49:​7, 8) (b) Duzu a ɛzukoale ɛvile Duzu Ati A Gyisɛse Wule A? vidio ne anu a?

⁵ Adenle ko mɔɔ anwo hyia kpalɛ mɔɔ yɛbahola yɛalua zo yɛaziezie yɛ ahonle yɛamaa Ngakyelɛlilɛ ne la a le kɛ yɛbadwenledwenle kɛzi Gyisɛse Kelaese ɛkpɔnenlɛ afɔle ne sonle bolɛ la anwo. Yɛdayɛ mumua ne yɛnrɛhola yɛnrɛlie yɛ nwo yɛnrɛvi ɛtane nee ewule nu ɛlɛ. (Kenga Edwɛne 49:​7, 8; eza nea Duzu Ati A Gyisɛse Wule A? vidio ne.) a Ɔti Gyihova yɛle ngyehyɛleɛ ɔmaanle ɔ Ra ne mɔɔ ɔkulo ye la rawule maanle yɛ. Bɛ mu nwiɔ bɛbɔle afɔle kpole kpalɛ. (Wlo. 6:23) Saa yɛdwenledwenle afɔle mɔɔ Gyihova nee Gyisɛse bɔle maanle yɛ la anwo kpalɛ a, ɔbamaa yɛahile ɛkpɔnedeɛ ne anwo anyezɔlɛ kpole. Yɛbazuzu ninyɛne mɔɔ ɛnee ɔnla aze kɛ Gyihova nee Gyisɛse bava abɔ afɔle amaa yɛ sa aha ɛkpɔnedeɛ ne la anu ekyi anwo. Noko mɔɔ limoa, duzu a le ɛkpɔnedeɛ ne?

6. Duzu a le ɛkpɔnedeɛ ne, na duzu ati a ɛnee ɔwɔ kɛ Gyisɛse tua ɛkpɔnedeɛ ɛhye a?

⁶ Ɛkpɔnedeɛ le debie anzɛɛ ezukoa mɔɔ bɛtua bɛsia bɛdie debie bieko la. Mɔɔ bɛbɔle Adam, nrenyia mɔɔ limoa la, ɛnee ɔdi munli. Mɔɔ ɔyɛle ɛtane la, nwolɛ adenle mɔɔ ɛnee ɔlɛ kɛ ɔ nee ɔ mra kɔsɔɔti banyia dahuu ngoane la bɔle bɛ. Amaa yɛ sa aha mɔɔ vile Adam asa la bieko la, Gyisɛse vale ɔdaye mumua ne ye ngoane mɔɔ di munli la bɔle afɔle. Wɔ mekɛ dodo mɔɔ Gyisɛse lile wɔ azɛlɛ ye azo la amuala anu, “yeanyɛ ɛtane biala yɛɛ bɛannwu mɛlɛbɛla wɔ ɔ nloa anu.” (1 Pita 2:22) Mɔɔ Gyisɛse wule la ɛnee ɔdi munli, ɔti ɛnee ɔbahola yeava ye ngoane ne yeadua mɔɔ vile Adam asa la pɛpɛɛpɛ.—1 Kɔl. 15:45; 1 Tim. 2:6.

7. Mɔɔ Gyisɛse wɔ azɛlɛ ye azo la, sɔnea mɔɔ ɔyiale la bie mɔ a le boni?

⁷ Mɔɔ Gyisɛse wɔ azɛlɛ ye azo la, ɔyiale sɔnea dɔɔnwo, noko ɔhɔle zo ɔyɛle tieyɛ bɔkɔɔ ɔmaanle ye anwuma Selɛ ne. Wɔ Gyisɛse ngakula nu, ɛnee ɔwɔ kɛ ɔbɛlɛ ɔ nwo aze ɔfea ye awovolɛ mɔɔ bɛnli munli la tumi bo, ɔnva nwo kɛ yemɔ bɛwole ye la ɛnee ɔdi munli la. (Luku 2:51) Mɔɔ ɔle kakula kpavolɛ la, ɛnee ɔhyia kɛ ɔko ɔtia debie biala mɔɔ ɔbamaa yeayɛ anzosesebɛ anzɛɛ ɔnrɛmaa ɔnrɛli nɔhalɛ la. Yɛɛ mɔɔ ɔyɛle kpanyinli la, ɛnee ɔwɔ kɛ ɔgyinla sɔnea mɔɔ Seetan vale rale ɔ nwo zo, mɔɔ bie a le nɔhalɛ mɔɔ ɔdi yeamaa Nyamenle mɔɔ Seetan zɔle nleanle la anloa. (Mat. 4:​1-11) Seetan zile ye ɛbolɛ kɛ ɔbamaa Gyisɛse ayɛ ɛtane amaa yeangola ɛkpɔnedeɛ ne tua.

8. Sɔnea boni bieko a Gyisɛse gyinlanle ɔ nloa a?

⁸ Mɔɔ Gyisɛse ɛlɛyɛ ye azɛlɛ ye azo ɛzonlenlɛ gyima ne la, ɔgyinlanle sɔnea bieko anloa. Bɛkpɔle ye yɛɛ bɛnwunlonwunlanle ye kɛ bɛbahu ye. (Luku 4:​28, 29; 13:31) Ɛnee ɔwɔ kɛ ɔgyinla ye ɛdoavolɛma ne sinlidɔlɛ nloa. (Maake 9:​33, 34) Mɔɔ ɛnee bɛlɛdi ye edwɛkɛ la, bɛyɛle ye amumuyɛ na bɛgolole ɔ nwo. Akee bɛhunle ye wɔ adenle mɔɔ yɛ nyane kpalɛ na ɔyɛ anyiemgba la azo. (Hib. 12:​1-3) Ɛnee ɔwɔ kɛ ɔ ngomekye ɔgyinla ye sɔnea mɔɔ li awieleɛ la  anloa mɔɔ Gyihova ɛmbɔ ɔ nwo bane a. b—Mat. 27:46.

9. Kɛzi Gyisɛse afɔlebɔlɛ ne maa yɛte nganeɛ ɛ? (1 Pita 1:8)

⁹ Ɔda ali wienyi kɛ Gyisɛse nwunle amaneɛ kpalɛ na yeahola yeava ɛkpɔnedeɛ ne yeamaa. Saa yɛdwenledwenle kɛzi Gyisɛse vile ye ɛhulolɛ nu ɔvale ninyɛne dɔɔnwo ɔbɔle afɔle ɔmaanle yɛ la anwo a, asoo ɔmmaa yɛnyia ɔ nwo ɛlɔlɛ kpole ɔ?—Kenga 1 Pita 1:8.

10. Kɛzi ɛkpɔnedeɛ ne hanle Gyihova ɛ?

¹⁰ Na Gyihova noko ɛ? Duzu a ɔvile ye ɛhulolɛ nu ɔvale ɔbɔle afɔle amaa Gyisɛse ahola adua ɛkpɔnedeɛ ne a? Gyihova nee Gyisɛse lɛ agɔnwolɛvalɛ mɔɔ anu yɛ se mɔɔ wɔ selɛ nee ɔ ra avinli la bie. (Mrɛ. 8:30) Ɔti nea kɛzi Gyihova dele nganeɛ wɔ mekɛ mɔɔ ɔlɛnea Gyisɛse mɔɔ ɔlɛgyinla sɔnea ngakyile nloa wɔ azɛlɛ ye azo la. Nɔhalɛ nu, ɔyɛle Gyihova nyane kpole wɔ mekɛ mɔɔ ɔnwunle kɛ bɛlɛyɛ ɔ Ra ne amumuyɛ, bɛkpole ye na ɔlɛnwu amaneɛ la.

11. Fa neazo kilehile kɛzi ɔbayɛ kɛ Gyihova dele nganeɛ wɔ mekɛ mɔɔ bɛhunle ɔ Ra ne la anu.

¹¹ Awovolɛ biala mɔɔ ɔ ra ɛwu ɛlɛ la ze kɛzi ɛhye maa bɛdi nyane kpole la. Yɛlɛ ewudwazo ne anu diedi kpole kpalɛ, noko yemɔ ɛnye nyane mɔɔ yɛ kulovolɛ bie wu a yɛte la ɛnvi ɛkɛ. Neazo ɛhye boa yɛ maa yɛte kɛzi ɔbayɛ kɛ Gyihova dele nganeɛ wɔ mekɛ mɔɔ ɛnee ɔlɛnea ɔ Ra ne mɔɔ ɔkulo ye la kɛ ɔlɛnwu amaneɛ na yeawu wɔ zɔhane kenle ne, ɛvolɛ 33 Y.M. la abo. c—Mat. 3:17.

12. Kolaa na Ngakyelɛlilɛ ne adwu la, duzu a yɛbahola yɛayɛ a?

¹² Ɔvi ɛnɛ too mɔɔ kɔdwu Ngakyelɛlilɛ kenle ne la, duzu ati a ɛnva ɛ ti anwo debiezukoalɛ anzɛɛ bɛ Abusua Ɛzonlenlɛ ne ɛnzukoa ɛkpɔnedeɛ ne anwo ninyɛne dɔɔnwo ɛ? Fa Gyihova Alasevolɛ Neɛnleanu Buluku ne anzɛɛ ninyɛne gyɛne mɔɔ yɛfa yɛsukoa Baebolo ne la sukoa ɛkpɔnedeɛ ne anwo debie kɔ moa. d Eza nea kɛ ɛbali Ngakyelɛlilɛ Baebolo ɛgengalɛ ngyehyɛleɛ ne mɔɔ wɔ Yɛ Kilisiene Ɛbɛlabɔlɛ Nee Yɛ Ɛzonlenlɛ—Nyianu Buluku ne anu la anzi. Yɛɛ wɔ Ngakyelɛlilɛ kenle ne, mmamaa ɛ rɛle fi kɛ ɛbanlea Ngakyelɛlilɛ Alehyenlɛ Ne Anu Tɛkese Ne. Saa yɛdayɛ mumua ne yɛsiezie yɛ ahonle yɛmaa Ngakyelɛlilɛ ne a, ɔbamaa yɛahola yɛaboa awie mɔ yɛamaa bɛdabɛ noko bɛanyia zolɛ nvasoɛ.—Ɛzela 7:10.

 BOA AWIE MƆ MAA BƐNYIA ZOLƐ NVASOƐ

13. Adenle mɔɔ limoa mɔɔ yɛbahola yɛalua zo yɛaboa awie mɔ yɛamaa bɛanyia Ngakyelɛlilɛ ne azo nvasoɛ la a le boni?

¹³ Kɛ ɔkɛyɛ na yɛaboa awie mɔ yɛamaa bɛanyia Ngakyelɛlilɛ ne azo nvasoɛ ɛ? Debie mɔɔ limoa la a le kɛ yɛbado ɛsalɛ yɛavɛlɛ bɛ. Saa ɛye menli mɔɔ yɛyia bɛ wɔ daselɛlilɛ nu dahuu la ɛsie ahane a, eza yɛbahola yɛahɛlɛ menli mɔɔ yɛze bɛ la aluma amaa yɛado ɛsalɛ yɛavɛlɛ bɛ. Menli ɛhye mɔ bahola ayɛ yɛ mbusuafoɔ, yɛ gɔnwo mɔ mɔɔ yɛ nee bɛ yɛ gyima anzɛɛ kɔ sukulu yɛɛ awie mɔ gyɛne. Saa yɛnlɛ ɛsalɛdolɛ kɛlata ne mɔɔ bɛpelente la bie bɔbɔ a, yɛbahola yɛava mɔɔ wɔ ɛlɛtɔlɔneke zo la bie yɛanwa bɛ. Wɔannea a menli dodo mɔɔ bara la bazi yɛ nwo!—Nol. 11:6.

14. Ka kɛzi yɛdayɛ mumua ne yɛto ɛsalɛ yɛfɛlɛ awie a ɔboa ye la anwo edwɛkɛ.

¹⁴ Saa ɛdawɔ mumua ne ɛto ɛsalɛ ɛfɛlɛ awie mɔ a, bie a ɔbaha bɛ yeamaa bɛara. Kenle ko bie, adiema raalɛ bie ahu mɔɔ ɔnle dasevolɛ la hanle hilele ye kɛ ɔ nee ye bahɔ Ngakyelɛlilɛ ne, na ɔzinle ɔ nwo kpole. Duzu ati ɔ? Ɔluakɛ ɔhanle ɔhilele ɔ hu fane dɔɔnwo kɛ ɔmaa bɛhɔ Ngakyelɛlilɛ ne, noko biala ɛnle ɛkɛ mɔɔ ɔhɔle a. Duzu ati a akee ɛnɛ mɔɔ ɔse ɔbahɔ a? Ɔhanle kɛ, “Menyianle ɛsalɛdolɛ kɛlata ne mɔɔ bɛpelente la bie,” na ɔhilehilele nu kɛ, asafo nu kpanyinli bie mɔɔ ɔze ye la a dole ɛsalɛ vɛlɛle ye a. Ɔ hu ne hɔle Ngakyelɛlilɛ ne, na ɛhye anzi ɛvolɛ dɔɔnwo ɛnee ɔtɛkɔ.

15. Saa yɛlɛto ɛsalɛ yɛavɛlɛ awie mɔ yɛamaa bɛara Ngakyelɛlilɛ ne bie a, duzu a ɔwɔ kɛ yɛkakye a?

¹⁵ Kakye kɛ bie a menli mɔɔ yɛbado ɛsalɛ yɛavɛlɛ bɛ la lɛ kpuya ngakyile—titili saa bɛtɛbale yɛ ayia ne mɔ bie ɛlɛ a. Yɛbahola yɛava yɛ adwenle yɛabu kpuya mɔɔ bie a bɛbabiza la na yɛaziezie yɛ nwo yɛabua bɛ. (Kɔl. 4:6) Kɛ neazo la, wɔannea a bie mɔ babiza kɛ: ‘Duzu a bɛbayɛ ye wɔ ayia ne abo a?’ ‘Dɔnehwele nyɛ a ɔbali a?’ ‘Tɛladeɛ boni a ɔwɔ kɛ mewula a?’ ‘Bɛbalie me ezukoa kolaa na meahola meawolo ɛkɛ ɔ?’ ‘Bɛbado collection wɔ ɛkɛ ɔ?’ Saa yɛlɛto ɛsalɛ yɛavɛlɛ awie yɛamaa yeara Ngakyelɛlilɛ ne bie a, yɛbahola yɛabiza ye sikalɛ kɛ, “Ɛlɛ kpuya bie ɔ?” na saa ɔlɛ bie a yɛabua yɛamaa ye. Eza yɛbahola yɛava Bɛhakye Gyisɛse Ewule Ne nee Duzu  A Bɛyɛ Ye Wɔ Belemgbunlililɛ Asalo Ɛkɛ A? vidio ne mɔ yɛaboa ahenle yɛamaa yeade kɛzi yɛyɛ yɛ debiezukoalɛ ne mɔ la abo. Edwɛkɛ ngɛnlɛma mɔɔ yɛbahola yɛ nee ahenle ne azuzu nwo la noko wɔ Nyia Anyelielɛ Dahuu! buluku ne ɛzukoalɛdeɛ 28.

16. Kpuya gyɛne boni a bɛdabɛ mɔɔ bɛbara Ngakyelɛlilɛ ne la bahola abiza a?

¹⁶ Saa anyelielɛma mɔɔ bɛle fofolɛ la ba Ngakyelɛlilɛ ne bie a, wɔannea a bɛbakpɔne bɔbɔ la ɛnee bɛtɛdɛ kpuya bie mɔ. Bie a bɛnrɛde deɛmɔti menli ekyi bie ala a lile paano ne na bɛnlonle nwanye ne bie anzɛɛ awie biala anli bie fee la abo. Bie noko a bɛkulo kɛ bɛnwu fane dodo mɔɔ yɛdi Ngakyelɛlilɛ ne ɛvolɛ biala la. Eza bie a bɛkulo kɛ bɛnwu kɛ saa zɛhae ala a Gyihova Alasevolɛ yɛ bɛ ayia ngakyile ne mɔ amuala a. Bɛbahilehile edwɛkɛ ɛhye mɔ anu dɔɔnwo anu wɔ Ngakyelɛlilɛ ɛdendɛlɛ ne anu ɛdeɛ, noko bie a ɔbahyia kɛ yɛkilehile nuhua yɛkɔ moa amaa bɛade ɔ bo kpalɛ. Edwɛkɛ mɔɔ ɔ ti ne se, “Duzu Ati A Kɛzi Gyihova Alasevolɛ Di Awulae Nɔsolɛ Aleɛ Ne La Le Ngakyile Fi Ɛzonlenlɛ Mɔɔ Ɛha La Ɛdeɛ Ne Anwo A?” mɔɔ wɔ jw.org la bahola aboa yɛ yeamaa yɛabua bɛ kpuya ne bie mɔ. Yɛkulo kɛ yɛyɛ biala mɔɔ yɛbahola la—kolaa na Ngakyelɛlilɛ ne adwu, wɔ mekɛ mɔɔ Ngakyelɛlilɛ ne ɛlɛkɔ zo yɛɛ mekɛ mɔɔ yɛkpɔne la—yɛboa “bɛdabɛ mɔɔ bɛ subane kile kɛ bɛfɛta dahuu ngoane la” yɛmaa bɛnyia ɛvoyialilɛ ɛhye azo nvasoɛ.—Gyi. 13:48.

BƐBOA BƐDABƐ MƆƆ BƐGYAKYI DEBIEZUKOALƐ NEE DASELƐLILƐ ƐHƆLƐ LA

17. Kɛ ɔkɛyɛ na mgbanyima aboa bɛdabɛ mɔɔ bɛgyakyi debiezukoalɛ nee daselɛlilɛ ɛhɔlɛ la ɛ? (Yizikeɛle 34:​12, 16)

¹⁷ Wɔ Ngakyelɛlilɛ mekɛ ne anu, kɛzi asafo nu mgbanyima bahola aboa bɛdabɛ mɔɔ bɛgyakyi debiezukoalɛ nee daselɛlilɛ ɛhɔlɛ la ɛ? Bɛmaa bɛnwu ye kɛ bɛdwenle bɛ nwo. (Kenga Yizikeɛle 34:​12, 16.) Kolaa na Ngakyelɛlilɛ ne adwu la, bɛnlea kɛ bɛ sa baha bɛ nuhua dodo biala mɔɔ bɛbahola la. Bɛmaa bɛnwu ye kɛ bɛdwenle bɛ nwo na bɛkulo kɛ bɛboa bɛ. Bɛdo ɛsalɛ bɛvɛlɛ bɛ kɛ bɛrɛla Ngakyelɛlilɛ ne bie. Saa bɛba a, bɛlie bɛ kɛnlɛma. Saa bɛwie Ngakyelɛlilɛ ne bɔbɔ a, bɛhɔ zo bɛkpɔla bɛ, na  bɛva sunsum nu moalɛ biala mɔɔ bɛhyia nwo amaa bɛazia bɛara Gyihova ɛkɛ la bɛmaa bɛ.—1 Pita 2:25.

18. Kɛzi yɛ muala yɛbahola yɛaboa menli mɔɔ bɛgyakyi debiezukoalɛ nee daselɛlilɛ ɛhɔlɛ la ɛ? (Wulomuma 12:10)

¹⁸ Asafo ne anu amra amuala bahola aboa menli mɔɔ bɛgyakyi debiezukoalɛ nee daselɛlilɛ ɛhɔlɛ mɔɔ bɛbara Ngakyelɛlilɛ ne bie la. Adenle boni azo? Ɔwɔ kɛ bɛmaa bɛnwu kɛ bɛkulo bɛ edwɛkɛ, bɛda atiakunlukɛnlɛma ali bɛkile bɛ na bɛbu bɛ. (Kenga Wulomuma 12:10.) Bɛhakye kɛ bie a ɛnee ɔnla aze ɔmmaa mediema ɛhye mɔ kɛ bɛbazia bɛara Gyihova ɛkɛ. Bie a ɛnee bɛsulo kɛ mediema baha edwɛkɛ ɛtane ahile bɛ anzɛɛ aha bɛ nwo edwɛkɛ ɛtane. e Ɔti mmabiza bɛ kpuya anzɛɛ ɛka edwɛkɛ mɔɔ bamaa bɛali nyane la. (1 Tɛs. 5:11) Mediema mrenyia nee mraalɛ ɛhye mɔ le yɛ gɔnwo mɔ diedima. Yɛ nye die kɛ bɛ nee yɛ ɛlɛbɔ nu azonle bieko la!—Edw. 119:176; Gyi. 20:35.

19. Saa yɛkakye Gyisɛse ewule ne a, nvasoɛ boni mɔ yɛnyia a?

¹⁹ Yɛ nye die kɛ Gyisɛse hanle kɛ yɛli Ngakyelɛlilɛ ne ɛvolɛ biala la, na yɛze deɛmɔti ɛhye anwo hyia kpalɛ la. Saa yɛkɔ Ngakyelɛlilɛ ne a, yɛdayɛ mumua ne nee awie mɔ nyia zolɛ nvasoɛ. (Aye. 48:​17, 18) Ɛlɔlɛ mɔɔ yɛlɛ yɛmaa Gyihova nee Gyisɛse la yɛ kpole. Yɛmaa ɔda ali kɛ, yɛ nye sɔ mɔɔ bɛyɛ bɛmaa yɛ la. Yɛmia agɔnwolɛvalɛ mɔɔ yɛ nee yɛ mediema diedima lɛ la anu. Na bie a yɛbaboa awie mɔ yɛamaa bɛazukoa kɛzi bɛdabɛ noko bɛbahola bɛanyia nyilalɛ mɔɔ ɛkpɔnedeɛ ne bamaa yɛanyia la bie la. Ɔti bɛmaa yɛyɛ biala mɔɔ yɛbahola la yɛziezie yɛ nwo yɛmaa ɛvolɛ ɛhye Ngakyelɛlilɛ ne—kenle mɔɔ hyia kpalɛ wɔ ɛvolɛ ne anu la!