Gyihova vale nrɛlaleɛ mɔɔ maanle Yizilayɛma nyianle anyelazo kɛ saa bɛsia bɛkɔ Ɛwɔkɛ Azɛlɛ ne azo a bɛbaha bɛ bɛabɔ nu la maanle Yizikeɛle. Eza zɔhane edwɛkɛ ne hanle Nyamenle menli mɔɔ bɛbaha bɛ bɛabɔ nu la anwo edwɛkɛ dole ɛkɛ, na ɛhye rale nu wɔ awieleɛ mekɛ ne anu.

Gyihova hanle hilele ye ngapezonli Yizikeɛle kɛ ɔhɛlɛ mbaka nwiɔ azo. Ɛnee ɔwɔ kɛ ɔkɛlɛ ko azo, ‘Dwuda ɛdeɛ ɔ, nee Yizilayɛma amuala mɔɔ nee ye le ko,’ na ɔkɛlɛ ko noko azo, ‘Dwosefi ɛdeɛ ɔ (ɛhye le Yifelaem baka) nee Yizilayɛma amuala mɔɔ nee ye le ko.’ Ɛnee ɔwɔ kɛ Yizikeɛle fa mbaka nwiɔ ne bɔ nwo yɛ “bɛ baka ko” wɔ ɔ sa nu.​—Yiz. 37:15-17.

Duzu a “Yifelaem” gyi ɛkɛ maa a? Ɛnee Gyɛlɔbowam, sɔlɔ mbusua bulu belemgbunlililɛ ne azo belemgbunli mɔɔ limoa  la vi Yifelaem abusua ne mɔɔ ɛnee ɛlie duma kpalɛ la anu. (Mɛla 33:13, 17; 1 Arl. 11:26) Abusua ɛhye vi Dwosefi ara Yifelaem anu. (Mɔl. 46:20) Gyekɔbo yilale ɔ ra Dwosefi wɔ adenle titili zo. Yemɔti ɛnee ɔfɛta bɔkɔɔ kɛ bɛbavɛlɛ baka ne mɔɔ gyi ɛkɛ maa sɔlɔ mbusua bulu belemgbunlililɛ ne “Yifelaem baka.” Mekɛ mɔɔ Yizikeɛle kɛlɛ ngapezo ne mɔɔ fale mbaka nwiɔ ne anwo la, ɛnee Aseleama ɛva Yizilayɛ sɔlɔ belemgbunlililɛ ne ɛhɔ nlɔnu dɛbadɛba wɔ 740 K.Y.M. (2 Arl. 17:6) Noko zɔhane Yizilayɛma ne anu dɔɔnwo bɔle asande wɔ Babelɔn Belemgbunlimaanle ne anu ɔluakɛ ɛnee Babelɔnma ɛnyia Aseleama anwo zo tumi.

Wɔ ɛvolɛ 607 K.Y.M., bɛvale nyiakɛ mbusua nwiɔ belemgbunlililɛ ne nee bie a sɔlɔ belemgbunlililɛ ne anu menli mɔɔ bɛhale la bɛhɔle nlɔnu wɔ Babelɔn. Dwuda abusua ne anu amra a lile mbusua nwiɔ ɛhye anwo zo tumi a, eza bɛdabɛ a ɛnee ɛsɔfo ne mɔ nee bɛ de a, ɔluakɛ ɛnee ɛsɔfo ne mɔ sonle wɔ Gyɛlusalɛm ɛzonlenlɛ sua ne anu. (2 Ek. 11:13, 14; 34:30) Yemɔti ɛnee ɔfɛta kɛ bɛvale ‘Dwuda baka ɛdeɛ’ ne bɛziele ɛkɛ bɛmaanle mbusua nwiɔ belemgbunlililɛ ne la.

Mekɛ boni a bɛvale sɛkɛlɛneɛ adenle zo mbaka ɛhye mɔ bɛbɔle nwolɛ a? Bɛvale bɛbɔle nwolɛ wɔ mekɛ mɔɔ Yizilayɛma ziale hɔle Gyɛlusalɛm wɔ ɛvolɛ 537 K.Y.M. kɛ bɛkazi ɛzonlenlɛ sua ne bieko la. Mbusua nwiɔ belemgbunlililɛ ne nee mbusua bulu belemgbunlililɛ ne anu agyakɛnugyinlavolɛma bɔle nu vile nlɔnu hɔle. Akee Yizilayɛma anu amkpakyekpakye bieko. (Yiz. 37:21, 22) Na akee Yizilayɛma vale koyɛlɛ zonlenle Gyihova. Eza ɛnee Ayezaya nee Gyɛlɛmaya ɛlimoa ɛha koyɛlɛ ɛhye anwo edwɛkɛ ɛdo ɛkɛ.​—Aye. 11:12, 13; Gyɛ. 31:1, 6, 31.

Duzu titili a ngapezo ɛhye maa yɛnwu ye wɔ nɔhalɛ ɛzonlenlɛ nwo a? Yemɔ a le kɛ: Gyihova bamaa ye azonvolɛ ‘ayɛ ko.’ (Yiz. 37:18, 19) Asoo ɛwɔkɛ ɛhye mɔɔ fale koyɛlɛ nwo la ɛra nu wɔ yɛ mekɛ ye azo? Ɛhɛe. Mɔlebɛbo ne, ngapezo ne bɔle ɔ bo kɛ ɔba nu wɔ 1919 wɔ mekɛ mɔɔ bɛhyehyɛle Nyamenle menli ne fofolɛ na bɛziale bɛbɔle nu la. Mɔdenle mɔɔ Seetan bɔle kɛ ɔkpakyekpakye bɛ nu bɔkɔɔ la anyɛ boɛ.

Wɔ zɔhane mekɛ ne, menli mɔɔ bɛziale bɛbɔle nu la anu dɔɔnwo nyianle anyelazo kɛ bɛ nee Gyisɛse badɛnla anwuma na bɛayɛ arelemgbunli nee ɛsɔfoma. (Yek. 20:6) Wɔ sɛkɛlɛneɛ adenle zo, ɛnee bɛle kɛ Dwuda baka ne la. Noko, mekɛ ne ɛlɛkɔ la, menli mɔɔ bɛlɛ azɛlɛ ye azo anyelazo la dɔɔnwo bɔle ɔ bo kɛ bɛfa bɛ nwo bɛabɔ sunsum nu Dwuuma ne. (Zɛk. 8:23) Ɛnee bɛle kɛ Dwosefi baka ne la, na bɛnlɛ anyelazo kɛ bɛ nee Kelaese bali tumi wɔ anwuma.

Ekpunli nwiɔ ne bɔ nuhua sonle ɛnɛ wɔ Belemgbunli ko, Gyisɛse Kelaese mɔɔ bɛha ɔ nwo edwɛkɛ wɔ sɛkɛlɛneɛ adenle zo kɛ “me sonvolɛ Devidi” la abo. (Yiz. 37:24, 25) Gyisɛse yɛle asɔne kɛ ye ɛdoavolɛ ne mɔ amuala ɛyɛ ‘ko kɛmɔ ɔ Ze de ye nu na ɔdaye ɔde ye nu la.’ * (Dwɔn 17:20, 21) Eza Gyisɛse hanle dole ɛkɛ kɛ ye mboane eku ekyi ne mɔɔ bɛle ye ɛdoavolɛma mɔɔ bɛkpokpa bɛ la nee ‘mboane gyɛne’ ne bayɛ “mboane ekpunli ko.” ‘Mboaneneavolɛ ko’ a banlea bɛ muala bɛ nwo zo a. (Dwɔn 10:16) Ɔnva nwo anyelazo mɔɔ Gyihova menli lɛ ye kenle bie la, nea kɛzi Gyisɛse edwɛkɛ ne maa yɛnwu sunsum nu koyɛlɛ mɔɔ wɔ bɛ avinli ɛnɛ la ɛ!