MƆƆ Gyisɛse kilehile ye ɛdoavolɛma kɛzi bɛbabɔ edwɛkpa ne nolo la, ɔbɔle bɛ kɔkɔ kɛ tɛ mekɛ ne amuala a menli bɛadie bɛ a. (Luku 10:3, 5, 6) Wɔ daselɛlilɛ nu, bie a yɛyia menli mɔɔ bɛnlie yɛ kɛnlɛma anzɛɛ bɛyɛ yɛ basabasa la. Nɔhalɛ nu, nyɛleɛ zɛhae kola maa ɔyɛ se kɛ yɛbahɔ zo yɛaze bɛdabɛ mɔɔ yɛka edwɛkɛ ne yɛkile bɛ la anwunvɔne.

Sonla mɔɔ se anwunvɔne la nwu awie mɔ ngyianlɛ nee bɛ ngyegyelɛ na ɔnyia ɛhulolɛ kɛ ɔbaboa bɛ. Noko, saa yɛanze bɛdabɛ mɔɔ yɛyia bɛ daselɛlilɛ nu la anwunvɔne a, bie a yɛ mɔdenlebɔlɛ nee kɛzi ɔwɔ kɛ yɛka edwɛkɛ ne kpalɛ la baha aze. Yɛbahola yɛava yɛ mɔdenlebɔlɛ ne yɛatoto senle nwo. Amaa senle azɔ kpalɛ la, ɔwɔ kɛ bɛfa ɛyɛne dɔɔnwo bɛwula nu. Zɔhane ala a ɔwɔ kɛ yɛse anwunvɔne, amaa yɛahola yɛabɔ mɔdenle kpalɛ a!​—1 Tɛs. 5:19.

Kɛ ɔkɛyɛ na yɛaze anwunvɔne kpalɛ wɔ mekɛ bɔbɔ mɔɔ ɔyɛ se la ɛ? Bɛmaa yɛzuzu Gyihova, Gyisɛse nee ɛzoanvolɛ Pɔɔlo neazo ne mɔɔ yɛbahola yɛazukoa la anwo.

Menli ɛha Gyihova anwo adalɛ edwɛkɛ dɔɔnwo wɔ ɛvolɛ dɔɔnwo anu. Noko, ɔkɔ zo “ɔyɛ nyele ɔmaa anzeayɛlɛma nee ɛtanevolɛma bɔbɔ.” (Luku 6:35) Ɔfi atiakunlukɛnlɛma nu ɔnyia awie biala anwo abotane. Gyihova kulo kɛ “menli kɔsɔɔti” nyia ngoane. (1 Tim. 2:3, 4) Nyamenle kyi amumuyɛyɛlɛ noko ɔbu alesama kɛ bɛsonle bolɛ na ɔngulo kɛ bɛsɛkye awie biala.​—2 Pita 3:9.

Gyihova ze kɛzi Seetan ɛzi alesama mɔɔ ɛnlɛ diedi anye la. (2 Kɔl. 4:3, 4) Bɛva diedi nee subane ɛtane bɛhilehile bɛ nuhua dɔɔnwo ɔvi bɛ ngakula nu, na ɔmaa ɔyɛ se kɛ bɛbalie nɔhalɛ ne bɛado nu. Gyihova kulo kɛ ɔboa menli zɛhae mɔ. Boni a yɛkile a?

Fa kɛzi Gyihova bule tete Nenɛvɛma la kɛ neazo. Ɔnva nwo bɛ basabasayɛlɛ ne anzi, Gyihova zele Dwona kɛ: “Duzu ati yɛɛ mame, suakpole mɔɔ le kɛ Nenɛvɛ, mɔɔ ɛlie duma na menli mɔɔ bo apenle ngoko ɛya ko abulanwiɔ mɔɔ bɛnze bɛ bɛne a bɛnze bɛ fema,  . . . la, menrɛze bɛ anwunvɔne a?” (Dwona 4:11) Gyihova bule Nenɛvɛma kɛ bɛ sunsum nu gyinlabelɛ ne ɛnle kpalɛ na ɔvile anwunvɔnezelɛ nu ɔzoanle Dwona kɛ ɔbɔ bɛ kɔkɔ.

Yɛbu menli kɛ bɛsonle bolɛ kɛ mɔɔ Gyihova yɛ ye la. Yɛbahola yɛazukoa ye na yɛabɔ mɔdenle kɛ yɛbaboa awie biala mɔɔ badie la, saa bɔbɔ ɔzɔho kɛ bɛnrɛdie a.

Saa menli andie yɛ edwɛkɛ ne a ɔwɔ kɛ yɛbɔ mɔdenle kɛ yɛbanwu deɛmɔti bɛyɛ zɔ la. Bie a bɛlɛ adwenle mɔɔ ɛndenrɛ la wɔ Baebolo ne anzɛɛ Kilisienema anwo ɔluakɛ menli  mɔɔ se bɛle Kilisienema la ɛnyɛ neazo kpalɛ. Bie a awie mɔ ɛha yɛ diedi ne anwo edwɛkɛ adalɛ ɛhile bɛ. Eza bie mɔ noko sulo kɛ bɛ mbusuafoɔ anzɛɛ bɛ kpalɛzoamra bɛagolo bɛ nwo kɛ bɛ nee yɛ ɛlɛtendɛ la.

Ngyegyelɛ mɔɔ ɛdo menli mɔɔ yɛyia bɛ wɔ daselɛlilɛ nu la bie mɔ la ati, ɔmmaa bɛndie edwɛkɛ ne. Kim mɔɔ le edwɛkpatɛlɛvolɛ la ka kɛ: “Menli dɔɔnwo mɔɔ wɔ yɛ azɛlɛsinli ne anu ɛleka bie la agyapadeɛ kɔsɔɔti ɛminli, ɔlua konle ti. Bɛnlɛ kenle bie anyelazo kpalɛ biala. Bɛ sa nu ɛdo yɛɛ bɛnlie awie biala bɛnli. Yɛta yɛyia menli mɔɔ dwazo tia yɛ edwɛkɛ ne la wɔ azɛlɛsinli ɛhye anu. Mekɛ bie mɔɔ ɛnee mewɔ daselɛlilɛ nu la, basabasayɛlɛma rale me nwo zo.”

Wɔ nyɛleɛ ɛhye mɔ amuala anzi, kɛzi Kim bɔ mɔdenle kɛ ɔbaze anwunvɔne ɛ? Ɔka kɛ: “Saa bɛyɛ me basabasa a, mebɔ mɔdenle kɛ mebahakye edwɛkɛ mɔɔ wɔ Mrɛlɛbulɛ 19:11 mɔɔ ɔka kɛ: ‘Adwenle kpalɛ ɛmmaa sonla ɛnva ɛya mgbane mgbane’ la. Saa ɔkakye ngyegyelɛ mɔɔ ye azɛlɛsinli ne anu amra hɔle nu la a, ɔmaa ɔse bɛ anwunvɔne. Na tɛ awie biala mɔɔ ɔyia ye la a ɛndie ye a. Ɔyɛ sia kɔkpɔla ngɛnlɛma wɔ azɛlɛsinli zɔhane anu.”

Yɛbahola yɛabiza yɛ nwo kɛ, ‘Saa mewɔ menli mɔɔ meka edwɛkɛ ne mekile bɛ la tɛnlabelɛ ne anu a, kɛzi anrɛɛ mebayɛ me nyɛleɛ wɔ Belemgbunlililɛ edwɛkɛ ne anwo a?’ Kɛ neazo la, saa bɛha Gyihova Alasevolɛ anwo adalɛ edwɛkɛ dɔɔnwo bɛhile yɛ ɛ? Wɔ tɛnlabelɛ ɛhye anu, bie a yɛnrɛdie edwɛkɛ ne na ɔbahyia kɛ bɛse yɛ anwunvɔne. Saa yɛkakye Gyisɛse mɛla mɔɔ se bɛyɛ mɔɔ bɛkulo kɛ menli yɛ maa bɛ la bie bɛmaa bɛ a, ɔbamaa yɛaze bɛ anwunvɔne saa bɔbɔ ɔyɛ se a.​—Mat. 7:12.

Ɛzoanvolɛ Pɔɔlo zele dwazotiama mɔɔ yɛ basabasa bɔbɔ la anwunvɔne. Duzu ati ɔ? Ɔ rɛle anvi kɛzi ɛnee ɔde la. Ɔhanle kɛ: “Dɛba ne ɛnee meka munzule edwɛkɛ, meyɛ menli kpɔdekpɔde yɛɛ membu debie ɛdeɛ. Noko bɛzele me anwunvɔne ɔluakɛ ɛnee menze mɔɔ melɛyɛ la yɛɛ ɛnee menlɛ diedi.” (1 Tim. 1:13) Ɔnwunle kɛ Gyihova nee Gyisɛse ɛze ye anwunvɔne kpole kpalɛ. Bie a, ɔnwunle kɛ menli mɔɔ ɔka edwɛkɛ ne ɔkile bɛ la yɛ bɛ nyɛleɛ kɛ mɔɔ ɛnee ɔde la.

Ɔyɛ a Pɔɔlo yia menli mɔɔ adalɛ diedi ɛsosɔ ndinli wɔ bɛ ahonle nu la. Kɛzi ɔyɛle ye nyɛleɛ ɛ? Gyima ne 17:16 ka kɛ, mɔɔ ɛnee Pɔɔlo wɔ Atɛnse la, “ɔnwunle kɛ ananze dɔɔnwo wɔ  sua ne azo na ɔlile nyane.” Noko, Pɔɔlo gyinlanle mɔɔ ɔmaanle ɔlile nyane la azo ɔlile daselɛ bɔkɔɔ. (Gyi. 17:22, 23) Ɔmaanle ye edwɛkɛ ne vanenle tɛnlabelɛ mɔɔ menli ne wɔ nu la anwo, amaa ‘yealua adenle biala azo yealie bie mɔ ngoane.’​—1 Kɔl. 9:20-23.

Yɛbahola yɛazukoa Pɔɔlo ɔlua menli subane nee bɛ nyɛleɛ ɛtane anzɛɛ bɛ diedi funli mɔɔ yɛbabu yɛ nye yɛagua zo na yɛabɔ mɔdenle kɛ yɛka “nrɛlaleɛ kɛnlɛma kpalɛ” ne yɛahile bɛ la azo. (Aye. 52:7) Adiema raalɛ bie mɔɔ bɛfɛlɛ ye Dorothy la ka kɛ: “Wɔ yɛ azɛlɛsinli ne anu, bɛhilehile menli dɔɔnwo kɛ Nyamenle ati yɛ se yɛɛ ɔbua menli ndɛne. Mekanvo menli ɛhye mɔ kɛ bɛlɛ diedi kpole wɔ Nyamenle anu la, na akee meahwe bɛ adwenle meahɔ mɔɔ Baebolo ne ka ye wɔ Gyihova subane ngɛnlɛma ne mɔ nee ɛwɔkɛ mɔɔ yebɔ mɔɔ fale kenle bie anwo la azo.”

Ɔwɔ kɛ yɛbɔ mɔdenle kɛ yɛbamaa yɛ mediema anwosesebɛ wɔ mekɛ mɔɔ yɛlua daselɛlilɛ nu la. Jessica ka kɛ: “Saa edwɛkɛ ɛtane bie to yɛ nuhua ko a mebɔ mɔdenle kɛ meye me adwenle meavi zo. Ɔti, mekakyi adawubɔlɛ ne na yɛka debie kpalɛ mɔɔ ɔfi yɛ edwɛkɛhanlɛ gyima ne anu ba la azo, ɔnva nwo kɛ bie mɔ ɛndie la.”

Gyihova ze ngyegyelɛ mɔɔ yɛyia ye wɔ daselɛlilɛ nu la. Saa yɛsukoa ye anwunvɔnezelɛ ne a, nea kɛzi ɔ nye die a! (Luku 6:36) Nɔhalɛ nu, Gyihova ɛnrɛze anwunvɔne dahuu. Yɛbahola yɛanyia anwodozo kɛ ɔze mekɛ fɔɔnwo mɔɔ ɔbava yeazɛkye ewiade ɛhye la. Kɔkpula mekɛ zɔhane, yɛ edwɛkɛhanlɛ gyima ne hyia ndɛndɛ. (2 Tim. 4:2) Bɛmaa yɛhɔ zo yɛbɔ mɔdenle na yɛla anwunvɔnezelɛ ali yɛboa “menli kɔsɔɔti.”