BIE MƆ KA KƐ KYƐKYƐ. Dɔketa bie hanle kɛ, ɛlɛfa Baebolo ne wɔali gyima a ɔle kɛ asɛɛ ɛlɛfa abɔdeɛ nwo nrɛlɛbɛ buluku mɔɔ bɛhɛlɛle ye 1920 la wɔahile ngakula debie ɛnɛ. Kpolerazulɛma bɔbɔ ka kɛ ɔle kɛ ɛlɛfa tete kɔmpita bie anwo manual wɔayɛ adwuleso kɔmpita nwo gyima la. Wɔ adenle bie azo, bie mɔ nwu Baebolo ne kɛ yekpa nwo yɛɛ ɛfa ɛbɔ ɛbɛla biala a ɔnyɛ boɛ.

Duzu ati a awie bava tete buluku ɛhye mɔɔ ɛyɛ dɛba la ali gyima ɛnɛ a? Ɛnɛ wɛbsaete dɔɔnwo fa folɛdulɛ nee adehilelɛ fofolɛ dɔɔnwo maa menli. Menli mɔɔ sukoa adwenle ne anwo debie, menli mɔɔ ɛbe wɔ ɛbɛlabɔlɛ yɛɛ mbuluku ɛhɛlɛlɛ nu la ta fa folɛdulɛ maa wɔ TV zo gyimalilɛ nu. Yɛɛ bɛtɔne mbuluku mɔɔ bɛkile kɛ menli kola gyinla zo bɔ bɛ ɛbɛla la dɔɔnwo, ɛhye ɛmaa kɔmpɛlɛ mɔɔ yɛ mbuluku ɛhye mɔ la ɛnyia bɛ nwo.

Ɔnva nwo kɛ yɛ sa ka edwɛkɛ biala mɔɔ yɛhyia nwo wɔ mekɛ ezinra nu la, duzu ati a ɔwɔ kɛ yɛfa Baebolo ne mɔɔ bɛhɛlɛle bɛwiele la yenyia ɛvolɛ kɛyɛ 2,000 la yɛdi gyima a? Ɔti, saa bie mɔ ka kɛ ɔle kɛ asɛɛ ɛlɛfa tete abɔdeɛ nwo nrɛlɛbɛ buluku anzɛɛ kɔmpita manual dɛba bie wɔayɛ gyima a, bɛle adalɛ ɔ? Nɔhalɛ nu, adwenle ɛhye ɛnle nɔhalɛ. Abɔdeɛ nwo nrɛlɛbɛ nee adwuleso ninyɛne kakyi ndɛndɛ, noko asoo alesama ngyianlɛdeɛ ɛhakyi? Ɛnɛ menli tɛkulo kɛ bɛnwu ɛbɛlabɔlɛ ne anye zo, bɛ nye die na bɛnyia banebɔlɛ anzɛɛ agɔnwolɛma kpalɛ.

Ɔnva nwo kɛzi Baebolo ne ɛhyɛ la, ɔka ngyianlɛ ɛhye mɔ nee dɔɔnwo anwo edwɛkɛ. Ɔka kɛ ɔvi yɛ Bɔvolɛ ne ɛkɛ. Ɔmaa yɛ adehilelɛ wɔ yɛ ɛbɛlabɔlɛ afoa ngakyile nu yɛɛ ɔmaa yɛdi yɛ ngyegyelɛ nwo gyima. (2 Timote 3:16, 17) Mɔɔ tɛla biala la, ɔka kɛ ɔbamaa yɛ folɛdulɛ mɔɔ ɛmkpa nwo yɛɛ ɔnyɛ dɛba ɛlɛ la! Baebolo mumua ne ka kɛ: “Nyamenle edwɛkɛ ne de ngoane nu.”​—Hibuluma 4:12.

Asoo ɔle zɔ kɛ Baebolo ne kola yɛ ɛhye mɔ amuala? Asoo yekpa nwo, anzɛɛ nwolɛ tɛkyia mɔɔ bahola aboa yɛ wɔ ɛbɛlabɔlɛ nu adɛla buluku gyɛne biala ɔ? Ɛzinzalɛ Arane titili ɛhye mɔɔ limoa la bodane a le kɛ, ɔboa wɔ yeamaa wɔanyia kpuya ɛhye mɔ anwo mualɛ.