Mɔlebɛbo ne yɛhanle kɛzi bɛbɛlɛbɛlale Croesus wɔ mekɛ mɔɔ ɔhɔle abisadeɛ wɔ Delphi na ɔlua zo Pɛhyea belemgbunli ne lile ɔ nwo zo konim la anwo edwɛkɛ. Noko Baebolo ne ka Pɛhyea belemgbunli ne anwo ngapezo edwɛkɛ mɔɔ yɛ nwanwane mɔɔ nuhua edwɛkɛ ngyikyi bɔbɔ rale nu pɛpɛɛpɛ a.

Kɛyɛ ɛvolɛ 200 kolaa na bɛawo Belemgbunli Saelɛse la, ngapezonli Ayezaya mɔɔ le Hibulunli la bɔle ye duma na ɔhanle kɛzi ɔbali suakpole Babelɔn azo konim la anwo edwɛkɛ.

Ayezaya 44:24, 27, 28: ‘Edwɛkɛ mɔɔ Gyihova ɛha la ɛne, . . . ’Medame a meka mekile buma kɛ ‘We resee, mebamaa wɔ azule ne mɔ asesa.’ Medame a meka mekile Saelɛse kɛ, ‘Ɔle me mboaneneavolɛ, yɛɛ ɔbayɛ debie biala mɔɔ mekpondɛ la;’ meka mekile Gyɛlusalɛm kɛ, ‘Bɛbakyekye ye bieko,’ na meka wɔ Ɛzonlenlɛ Sua ne anwo kɛ, ‘Bɛbawula wɔ adiabo ne aze.’’’

Giliki tetedwɛkɛ kɛlɛvolɛ Herodotus bɔle amaneɛ kɛ, Saelɛse sogyama hakyile azule Yufileti ne mɔɔ se fa Babelɔn sua ne azo la anye. Ɛhye maanle ye sogyama ne holale vale azule ne mɔɔ ɛsesa la anu hɔle sua ne azo. Mɔɔ Saelɛse lile sua ne azo konim wiele la, ɔmaanle Dwuuma mɔɔ ɛnee wɔ akɛlɛzonlenlɛ nu wɔ Babelɔn la hɔkyekyele Gyɛlusalɛm mɔɔ ɛyɛ suadu ɛvolɛ 70 la bieko.

Ayezaya 45:1: ‘Gyihova ɛkpa nu ɛye Saelɛse, yemaa ye tumi kpole kɛ ɔli maanle maanle nwo zo konim, na ɔlie arelemgbunli tumi ɔvi bɛ sa nu; ɔbukebuke nlenkɛ mɔɔ wɔ ɔ nyunlu la, amaa bɛando nlenkɛ mgbole ne mɔ anu.’

Pɛhyeama luale nlenkɛ mgbole nwiɔ mɔɔ bɛgyakyi bɛgua nwo la anu hɔle suakpole ne azo. Saa Babelɔnma nwunle adwenle mɔɔ Saelɛse ɛva la a, anrɛɛ bɛtotole bɛ nlenkɛ mgbole ne mɔ anu. Noko yeamaa ye zɔ, ɛnee suakpole ne ɛnlɛ banebɔlɛ biala.

Ngapezo titili ɛhye le ngapezo dɔɔnwo mɔɔ bɛra nu pɛpɛɛpɛ wɔ Baebolo ne anu la anu ko. a Ɔnle kɛ edwɛkɛ mɔɔ menli ka la, fane dɔɔnwo ne ala ɔvi bɛ adalɛ nyamenle ne mɔ ɛkɛ, noko ngapezo mɔɔ wɔ Baebolo ne anu la vi Ahenle mɔɔ ɛha kɛ: “Medame a mɔlebɛbo ne menganle awieleɛ edwɛkɛ ne na mɔmoane menganle mɔɔ basisi la anwo bie.”​—Ayezaya 46:10.

Nɔhalɛ Nyamenle ne mɔɔ ye duma a le Gyihova la ala a bahola aha edwɛkɛ ɛhye a. Duma zɔhane abo kile “Ɔmaa Ɔyɛ Ɛkɛ.” Ɔmaa yɛnwu ye kɛ ɔkola  ɔnwu ninyɛne mɔɔ bazi kenle bie la na ɔdi nwolɛ gyima ɔmaa ɔ nee ye ɛhulolɛdeɛ yia pɛpɛɛpɛ. Ɔmaa yɛnyia anwodozo kɛ ɔbahola yeayɛ debie biala mɔɔ yebɔ nwolɛ ɛwɔkɛ la.

Ɛkulo kɛ ɛnwu mɔɔ Baebolo ngapezo ɛha ye wɔ yɛ mekɛ ye anwo la ɔ? Kɛyɛ ɛvolɛ 2,000 mɔɔ ɛze la, Baebolo ne hanle kɛ “mekɛ mɔɔ anu yɛ se la” bara “wɔ mekɛ mɔɔ li awieleɛ la anu.” Mekɛ mɔɔ li awieleɛ wɔ nzɔne anu? Tɛ azɛlɛ ne anzɛɛ alesama, emomu, konle, nzisi, yɛɛ amaneɛnwunlɛ mɔɔ ɛgyegye alesama ɛvolɛ apenle dɔɔnwo la. Yɛzuzu ngapezo ɛhye mɔ anu ekyi mɔɔ fale “mekɛ mɔɔ li awieleɛ” ne anwo la anwo.

2 Timote 3:1-5: “Wɔ mekɛ mɔɔ li awieleɛ la anu, . . .  menli bayɛ angomedi, ezukoa nwo anyebolo, anwomemaazo, adubɛnwo, bɛbaha munzule edwɛkɛ, bɛbayɛ awovolɛ nwo anzosesebɛ, boniayɛma, bɛnrɛli nɔhalɛ, menli mɔɔ ɛnlɛ sonla nwo ɛlɔlɛ, menli mɔɔ bɛ nee bɛ ɛnyɛ ngyehyɛleɛ, dumasɛkyevoma, menli mɔɔ ɛngomo bɛ nwo zo, menli mɔɔ anwo yɛ ɛzulolɛ, menli mɔɔ ɛngulo kpalɛyɛlɛ, menli mɔɔ ye awie mɔ maa, menli mɔɔ le tufoande, menli mɔɔ tu bɛ nloa nu, menli mɔɔ kulo anyelielɛ tɛla Nyamenle, bɛyɛ bɛ nwo kɛ bɛlɛ nyamenlezonlenlɛ nu noko bɛnva ye tumi ne bɛnli gyima.”

Ɛnlie ɛnli kɛ ɛnɛ subane ɛhye ɛlɛnyia anyuhɔlɛ wɔ menli nwo zo ɔ? Wɔnwu ye kɛ menli mɔɔ ɛbɔ yɛ ɛyia la bu bɛ nwo, bɛkulo ezukoa na anwomemaazo ɛli bɛ adwenle ɔ? Wɔnwu ye kɛ menli dwenle bɛ ngome bɛ nwo yɛɛ ɔyɛ se kɛ bɛ nee awie mɔ bayɛ adwenle wɔ debie biala anu ɔ? Kpolerazulɛ biala ɛnle nwo kɛ awovolɛ anwo zo anzosesebɛ ɛlɛnyia anyuhɔlɛ yɛɛ menli kulo anyelielɛ tɛla Nyamenle. Na ɛtaneyɛlɛ ɛlɛnyia anyuhɔlɛ alehyenlɛ biala.

Mateyu 24:6, 7: “Bɛbade konle mɔɔ bikye bɛ nee konle mɔɔ wɔ moamoa la anwo amaneɛbɔlɛ . . . Maanle badwazo atia maanle yɛɛ belemgbunlililɛ badwazo atia belemgbunlililɛ.”

Mgbondabulɛ bie mɔ kile kɛ ɔvi 1914, menli mɔɔ ɛwu ɔlua konle nee manzonle ti la dodo babo mgbe 100. Ɛhye tɛla maanle dɔɔnwo anu menli. Suzu monle, nyane, nee amaneɛnwunlɛ mɔɔ mgbondabulɛ ɛhye ɛva ɛra la anwo. Asoo maanle maanle ne mɔ ɛnwu ɛhye na bɛgyakyi konle ɔ?

Mateyu 24:7: “Ɛhɔne . . . bara ɛleka dɔɔnwo.”

The World Food Programme (Ewiade Aleɛ Nwo Gyimalilɛ Ngyehyɛleɛ) ne ka kɛ: “Yɛlɛbɔ mɔdenle yɛamaa awie biala mɔɔ wɔ ewiade la anyia aleɛ ɛdeɛ, noko menli mgbe 815​—menli ngɔnla biala anu ko​—kɔ da nɔsolɛ nu dahuu mɔɔ bɛnli aleɛ a. Mɔɔ tɛla ɛhye la​—menli nsa biala anu ko​—ɛnnyia aleɛ kpalɛ ɛnli.” Bɛbu mgbonda kɛ ɔlua ɛhɔne ti, ɛvolɛ biala ngakula mgbe nsa wu.

Luku 21:11: “Azɛlɛkpusulɛ mgbole bara.”

Ɛvolɛ biala, azɛlɛkpusulɛ ngyikyi kɛyɛ 50,000 si. Kɛyɛ 100 mɔɔ si la kola sɛkye azua yɛɛ kpole kpalɛ ko si ɛvolɛ biala. Mgbondabulɛ ko kile kɛ, ɔvi ɛvolɛ 1975 badwu 2000, azɛlɛkpusulɛ ɛhu menli 471,000.

Mateyu 24:14: “Bɛbabɔ Belemgbunlililɛ ne anwo edwɛkpa ɛhye nolo wɔ azɛlɛ ye azo amuala bɛava bɛali maanle maanle ne amuala daselɛ, kolaa na awieleɛ ne ara.”

Gyihova Alasevolɛ mɔɔ bɛ dodo ɛlɛkɔ mgbe mɔtwɛ la ɛlɛbɔ Nyamenle Belemgbunlililɛ ne nolo na bɛlɛdi nwolɛ daselɛ wɔ maanle kɛyɛ 240 anu wɔ ewiade amuala. Bɛlɛka edwɛkpa ne wɔ azuamgbole, namunamu, awoka nee ɛleka mɔɔ yɛ ɛzulolɛ bɔbɔ la azo. Ngapezo ne ka kɛ, saa bɛyɛ gyima ɛhye bɛdwu ɛleka mɔɔ Nyamenle akunlu dwo nwo a: ‘Awieleɛ ne bara.’ Duzu a ɛhye bahile a? Ɔbahile kɛ alesama tumililɛ bahɔ awieleɛ amaa fofolɛ arazie ɔ gyakɛ anu​—Nyamenle Belemgbunlililɛ ne. Wɔ Nyamenle Belemgbunlililɛ ne tumililɛ bo, ɛwɔkɛ boni mɔ a bara nu a? Toa zo kenga na ɛbanwu ye.