Saa anrɛɛ ewia ɛnvi a, anrɛɛ yɛnrɛhola aze tɛnla. Sɛnzɛne ne boa maa mbaka fefɛ nya, bɛnyia felawɔse, mbakama nee ma ngakyile. Tɛ yemɔ angome, eza ɔmaa mbaka dua bɛ ndinli ne azo twe nzule fi azɛlɛ bo kɔ ye nya ne anu na akee ɔyɛ kpukpuke wɔ anwoma ne anu.

Ezule le ahyɛlɛdeɛ mɔɔ vi Nyamenle ɛkɛ mɔɔ ɔmaa azɛlɛ ne kye aleɛ na yɛnyia bie yɛdi a. Nyamenle maa yɛ ezule nee ɛlobɔ ngɛnlɛma, ɔmaa yɛnyia aleɛ na yɛdi fɛlɛko wɔ yɛ ahonle nu.

Selɛma dɔɔnwo dwenledwenle bɛ abusua ne aleɛlilɛ nee bɛ adɛladeɛ ɛwulale nwo. Yɛ mɔɔ Ngɛlɛlera ne ka la nzonlɛ: “Bɛnlea anwomanyunlu nloma; bɛnlua ma yɛɛ bɛnde anzɛɛ bɛmboɔboa aleɛ nloa bɛnzie, noko bɛ Ze mɔɔ wɔ anwuma la maa bɛ aleɛ. Asoo bɛ nwo ɛngyia ɛndɛla bɛ?”​—Mateyu 6:25, 26.

“Bɛnlea kɛzi ɛbɔ nu aloa nyi la na bɛzukoa debie . . . ; noko meka meahile bɛ kɛ, wɔ [Belemgbunli] Sɔlɔmɔn anyunlunyia ne kɔsɔɔti anu bɔbɔ, yeanziezie ɔ nwo kɛ aloa ɛhye mɔ anu ko la. Yemɔti, saa zɛhae a Nyamenle siezie ɛbɔ nu ndile . . .  a, asoo ɔnrɛheda bɛdabɛ noko ndanlɛ?”​—Mateyu 6:28-30.

Kɛmɔ Nyamenle kola maa yɛ aleɛ nee adɛladeɛ la ati, yɛze kɛ ɔbahola yɛamaa yɛ sa aha ninyɛne gyɛne mɔɔ yɛhyia nwo wɔ ɛbɛlabɔlɛ nu la. Saa yɛyɛ Nyamenle ɛhulolɛdeɛ a, ɔbayila yɛ sa anloa gyima zo anzɛɛ ɔbaboa yɛ yeamaa yɛanyia gyima amaa yɛahola yɛali yɛ ngyianlɛ nwo gyima.​—Mateyu 6:32, 33.

Nɔhalɛ nu, saa yɛnea sɛnzɛne ne, ezule mɔɔ tɔ, nloma nee felawɔse a, ɔmaa yɛnyia debie yɛgyinla zo yɛkulo Nyamenle. Edwɛkɛ mɔɔ doa zo la bamaa yɛanwu kɛzi yɛ Bɔvolɛ ne nee alesama lile adwelie la.