María Isabel le nolobɔlɛnli kakula mɔɔ ɔbɔ mɔdenle. Ɔwɔ San Bernardo, suakpole bie mɔɔ wɔ Chile maanle nu wɔ South America la azo. Ɔ nee ye abusua ne anu amra le Mapuchema. Abusua ne anu amra kɔsɔɔti anye die kɛ bɛlɛboa asafo fofolɛ mɔɔ bɛlɛte ye wɔ Mapuche aneɛ ne mɔɔ eza bɛfɛlɛ ye Mapudungun nu la.

Mɔɔ María Isabel dele kɛ bɛbayɛ Kelaese ewule ne anwo Ngakyelɛlilɛ wɔ Mapudungun aneɛ nu, na bɛyɛ nwolɛ ɛsalɛdolɛ ngɛlata 2,000 la, ɔvale mɔɔ ɔbayɛ la nwo adwenle. Duzu a ɔbayɛ yeaboa a? Ɔhakyele Alasevolɛ ngakula bie mɔɔ bɛvale anyelielɛ bɛlile bɛ sukuluma nee kilehilevolɛma daselɛ la anwubielɛ ne. Ɔvale ɔdole ye awovolɛ anyunlu, na bɛ kɔsɔɔti bɛzuzule nwo na bɛwulale María Isabel anwosesebɛ kɛ ɔkpondɛ adenle mɔɔ ɔbalua zo yeava ɛsalɛdolɛ ngɛlata ne yeali gyima wɔ ye sukulu ɛkɛ la. Duzu ngyehyɛleɛ a ɔyɛle a?

María Isabel lumuale bizale adenle wɔ sukulu mgbanyima ne mɔ ɛkɛ kɛ ɔfa ɛsalɛdolɛ kɛlata ne ko yeabɔ sukulu anlenkɛ kpole ne anwo. Bɛliele ye ademizalɛ ne bɛdole nu na bɛhanvole ye wɔ nwolɛ. Kenle ko nwonlomɔ mɔɔ ɛnee bɛyia nu la, sukulu kpanyinli ne vale ɛsalɛdolɛ ne anwo nolobɔlɛ dole gua!

Akee María Isabel zɛlɛle kɛ ɔkulo kɛ ɔkɔ sukulu azua ne kɔsɔɔti anu. Mɔɔ kilehilevolɛma ne liele dole nu la, ɔbizale menli dodo mɔɔ bɛka Mapuche aneɛ wɔ sukulu azua ne biala anu la. Ɔka kɛ, “Ɛnee mesuzu kɛ sukuluma mɔɔ ka Mapuche aneɛ mɔɔ bɛwɔ sukulu ɛkɛ la amuala kɛyɛ 10 anzɛɛ 15 ala, noko amuanrɛɛ bɛ nwo zonle kpalɛ, menvale ɛsalɛdolɛ ngɛlɛta 150 memanle!”

Raalɛ ko mɔɔ ɔnwunle ɛsalɛdolɛ kɛlata ne wɔ sukulu anlenkɛ kpole ne anwo la bizale awie mɔɔ ɔbahola ɔ nee ye aha gyimalilɛ ne anwo edwɛkɛ la. Nea kɛzi ɔbazi ɔ nwo kɛ bɛzele ye kɛ ɔhɔ kakula raalɛ mɔɔ yeli ɛvolɛ bulu ɛkɛ la ɛ! María Isabel vale anyelielɛ hanle kɛ, “Ɛnee ɔ nye la kpanyinli bie ade.” María Isabel vale ngilenu ekyii manle raalɛ ne na ɔliele ye address mɔɔ ɔ nee ye awovolɛ balua zo ahɔ ye ɛkɛ na bɛaha Nyamenle Belemgbunlililɛ ne anwo edwɛkɛ bahile ye a. Nea anyelielɛ mɔɔ nolobɔlɛma 20 ne mɔɔ bɛwɔ Mapudungun azɛlɛsinli ne anu nyianle ye wɔ mekɛ mɔɔ bɛnwunle raalɛ ɛhye nee menli 26 mɔɔ bɛle Mapuchema la kɛ bɛra Ngakyelɛlilɛ ne bie a. Kɛkala zɔhane ekpunli ne ɛyɛ asafo mɔɔ anyelielɛ wɔ nu kpalɛ!

Ɔnva nwo ɛvolɛ mɔɔ wɔli la, asoo ɛbahola wɔado ɛsalɛ wɔavɛlɛ wɔ sukuluma anzɛɛ gyimayɛvoma wɔara Ngakyelɛlilɛ, bagua nu ɛdendɛlɛ, anzɛɛ maangyeba nyianu bo ɔ? Duzu ati a ɛnyɛ neɛnleanu wɔ yɛ mbuluku ne mɔ anu amaa wɔanwu adenle mɔɔ saa ɛdua zo a ɔbazo ma la ɛ? Eza sɛlɛ Gyihova sunsum nwuanzanwuanza ne moalɛ amaa wɔanyia akɛnrasesebɛ mɔɔ ɛbava wɔadendɛ la. (Luku 11:13) Saa ɛyɛ ɛhye a ma mɔɔ wɔ ngyehyɛleɛ kpalɛ ne bazo la bazi ɛ nwo, na ɔbamaa ɛ nye alie na wɔanyia anwosesebɛ.