Suzu gyinlabelɛ ɛhye noko anwo: Agyalɛma bie dole ɛsalɛ vɛlɛle ninli bie mɔɔ ɔlɛ ngakula nwiɔ la kɛ ɔrakpɔla bɛ kenle ko nɔsolɛ nu. Mekɛ mɔɔ ɔbɔle ɔ mra ne mɔ amaneɛ la, bɛ nye liele kpole. Ɛnee bɛ nye la zɔhane nɔsolɛ ne ade. Noko akee, ye alehyenlɛ nu, agyalɛma ne zele ninli ne kɛ debie bie ati ɔwɔ kɛ bɛpɛ ngyehyɛleɛ ne anu. Nzinlii, ɔnwunle deɛmɔti agyalɛma ne pɛle ngyehyɛleɛ ne anu la. Bɛvɛlɛle ninli ne la, agyalɛma ne agɔnwo mɔ bie noko vɛlɛle bɛ kɛ bɛrɛla bɛ sua nu zɔhane nɔsolɛ ne, na bɛkponlenle zo.

Kɛ Keleseɛnema la, ɔwɔ kɛ yɛdi yɛ edwɛkɛ zo. Ɔnle kɛ yɛyɛ menli mɔɔ saa ‘yɛka “ɛhɛe” a ɛnee yɛkile “kyɛkyɛ” a.’ (2 Kɔl. 1:18) Noko akee, kɛmɔ yɛnwu ye wɔ neazo nwiɔ ne anu la, gyinlabelɛ ne amuala ɛnle ko. Ɔdwu mekɛ ne bie a, yɛbade nganeɛ kɛ mɔɔ yɛbahola yɛayɛ la ala a le kɛ yɛbapɛ ngyehyɛleɛ bie mɔɔ yɛyɛ la anu. Ɛzoanvolɛ Pɔɔlo hɔle zɛhae tɛnlabelɛ ne bie anu.

Mekɛ mɔɔ ɛnee Pɔɔlo wɔ ye edwɛkpatɛlɛvolɛ gyima ne anu wɔ Ɛfɛsɛse wɔ 55 Y.M. anu la, ɔyɛle ye adwenle kɛ ɔpɛ Aegean Nyevile ne yeahɔ Kɔlente, na yeadoa zo yeahɔ Masidonea. Mɔɔ ɔsia yeara Gyɛlusalɛm la, ɔyɛle ngyehyɛleɛ kɛ ɔkakpɔla Kɔlente asafo ne bieko, amaa yɛalie bɛ ahyɛlɛdeɛ ne yeahɔmaa mediema mɔɔ bɛwɔ Gyɛlusalɛm la. (1 Kɔl. 16:3) Yɛnwu ɛhye wienyi wɔ 2 Kɔlentema 1:15, 16. Ɛkɛ ne kenga kɛ: “Adwenle ɛhye a wɔ me ti anu ɛsesebɛ mɔɔ manle menlumuale mengyehyɛle kɛ mebarakpɔla bɛ, amaa bɛanyia nyilalɛ mɔnwo la. Ɔluakɛ menyɛle kɛ saa mese meahɔ Masidonea a mebamakyi bɛ nwo ɛkɛ, yɛɛ eza saa mevi Masidonea mesia meara a meamakyi bɛ nwo ɛkɛ ne bieko, amaa bɛagua me adenle bɛamaa meahɔ Dwudiya.”

Ɔbayɛ kɛ ɛnee Pɔɔlo ɛha ye ngyehyɛleɛ ne anwo edwɛkɛ ɛhile Kɔlente mediema ne mɔ  wɔ kɛlata bie mɔɔ ɔhɛlɛle bɛ la anu. (1 Kɔl. 5:9) Mɔɔ ɔhɛlɛle kɛlata zɔhane la, yeangyɛ biala yɛɛ Kuloyi sua nu amra bɔle ye amaneɛ kɛ mgbakyemgbakye ɛra asafo ne anu a. (1 Kɔl. 1:10, 11) Pɔɔlo zile kpɔkɛ kɛ ɔbayɛ nzenzaleɛ wɔ ye ngyehyɛleɛ ne anu, na ɔhɛlɛle kɛlata ne mɔɔ ɛnɛ yɛfɛlɛ ye 1 Kɔlentema la. Wɔ kɛlata zɔhane anu, Pɔɔlo vile ɛlɔlɛ nu vale folɛdulɛ nee adehilelɛ manle. Eza ɔhanle kɛ yehakyi ye ngyehyɛleɛ ne, ɔbalumua yeahɔ Masidonea kolaa na yeara Kɔlente.—1 Kɔl. 16:5, 6. *

Ɔbayɛ kɛ mekɛ mɔɔ mediema mɔɔ bɛwɔ Kɔlente asa hanle ye kɛlata ne la, “ɛzoanvolɛma kpalɛ” ne mɔɔ bɛwɔ asafo ne anu la bie mɔ bɔle ye somolɛ kɛ ɔtu kuma a ɔndo elue nu. Pɔɔlo sa ɔ ne la, ɔbizale kɛ: “Yemɔti ngyehyɛlɛ ɛhye mɔɔ menyɛle la kile kɛ mele sonla mɔɔ meka a menyɛ ɔ? Anzɛɛ meyɛ me ngyehyɛlɛ kɛ adalɛ sonla bie mɔɔ meka kɛ ‘ɛhɛe’ a ɛnee mekile ‘kyɛkyɛ’ ɔ?”—2 Kɔl. 1:17; 11:5.

Wɔ gyinlabelɛ ɛhye mɔ anu, yɛbahola yɛabiza kɛ, Asoo Pɔɔlo le ‘sonla mɔɔ ɔka a ɔnyɛ amgba ɔ?’ Kyɛkyɛ! Edwɛkɛkpɔkɛ mɔɔ bɛhile ɔ bo ‘sonla mɔɔ ɔka a ɔnyɛ la,’ nee edwɛkɛ sonla mɔɔ ɔtu kuma a ɔndo elue nu la lua edinli ko azo, bɛngola bɛnva bɛ nwo bɛndo ɔ nwo zo, ɔnli ye ɛwɔkɛ zo. Ɔbayɛ kɛ kpuyia ne mɔɔ Pɔɔlo bizale kɛ “anzɛɛ meyɛ me ngyehyɛlɛ kɛ adalɛ sonla bie [la],” manle Keleseɛnema mɔɔ ɛnee wɔ Kɔlente la nwunle ye wienyi kɛ kpɔkɛ mɔɔ Pɔɔlo zile hakyile ye adwenle la ɛngile kɛ bɛngola bɛnva bɛ nwo bɛndo ɔ nwo zo.

Pɔɔlo anlie bɛ somolɛ ne ando nu, ɔhɛlɛle kɛ: “Kɛmɔ Nyamenle le nɔhalɛ, na yɛkola yɛfa yɛ rɛle yɛwula ye nu la, me ɛwɔkɛ ne mɔɔ membɔle bɛ la ɛnle ɛwɔkɛ mɔɔ meka ‘ɛhɛe’ a ɛnee mekile ‘kyɛkyɛ’ a.” (2 Kɔl. 1:18) Nɔhalɛ, ɛnee Pɔɔlo dwenle mediema mɔɔ bɛwɔ Kɔlente la anwo kpalɛ, yemɔti a ɔhakyile ye ngyehyɛleɛ ne a. Yɛkenga ye wɔ 2 Kɔlentema 1:23 kɛ, “memkpondɛ kɛ mebɔ bɛ rɛle” la ati a mengakyile me adwenle wɔ Kɔlente ɛralɛ ne anwo la. Nɔhalɛ nu, ɔvale nwolɛ adenle ɔmanle bɛ amaa bɛatoto ninyɛne boɛ kolaa na ɔdaye mumua ne yeara. Kɛmɔ ɛnee ɔ nye la ye ade la, mɔɔ Pɔɔlo wɔ Masidonea la, ɔdele ɔvile Taetɛse ɛkɛ ne kɛ ye kɛlata ne ɛmaa mediema ne mɔ ɛli nyane na bɛnlu bɛ nwo, ɛhye manle ɔ nye liele kpole.—2 Kɔl. 6:11; 7:5-7.

Somolɛ mɔɔ bɛbɔle Pɔɔlo kɛ ɔnli ye edwɛkɛ zo la kile kɛ saa ɔnli ye ɛwɔkɛ zo a, ɛnee bɛnrɛhola bɛnrɛva bɛ nwo bɛnrɛdo ye edwɛkɛhanlɛ gyima ne azo. Noko akee, Pɔɔlo hakyele Kɔlentema kɛ yeha Gyisɛse Kelaese anwo edwɛkɛ yehile bɛ. “Gyisɛse Kelaese mɔɔ le Nyamenle Ara ne, mɔɔ me nee Seleveenɛse nee Temɔte yɛbɔle ɔ nwo edwɛkɛ ne nolo yɛhilele bɛ la, ɛnle ‘Ɛhɛe’ nee ‘Kyɛkyɛ’ sonla. Ɔle Nyamenle nu ‘Ɛhɛe.’” (2 Kɔl. 1:19) Asoo ɛnee bɛngola bɛnva bɛ nwo bɛndo Gyisɛse Kelaese mɔɔ Pɔɔlo zukoale ye la anwo zo ɔ? Kyɛkyɛ! Gyisɛse hanle nɔhalɛ wɔ ye ɛbɛlabɔlɛ nee daselɛlilɛ nu dahuu. (Dwɔn 14:6; 18:37) Saa edwɛkɛ ne mɔɔ Gyisɛse bɔle ye nolo la le nɔhalɛ bɔkɔɔ mɔɔ bɛkola bɛfa bɛ nwo bɛto zo na edwɛkɛ ko ne ala a Pɔɔlo bɔle ye nolo a, ɛnee yɛbahola yɛava yɛ nwo yɛado ɛzoanvolɛ ne nolobɔlɛ ne azo.

Gyihova le “nɔhavo Nyamenle.” (Edw. 31:5) Yɛnwu ɛhye wɔ edwɛkɛ mɔɔ Pɔɔlo hɛlɛle doale zo la anu: “Yemɔ a ɔle Nyamenle ɛwɔkɛ ne mɔ anu ‘Ɛhɛe’ ne a.” Gyisɛse munli nu mɔɔ ɔgyinlanle wɔ azɛlɛ ye azo ɔhɔle awieleɛ la ammaa menli adwenle nu anyɛ bɛ kesee wɔ Gyihova ɛwɔkɛ ne mɔ anwo. Pɔɔlo doale zo kɛ: “Ɛhye ati a yɛdua Gyisɛse Kelaese anwo zo yɛka ‘Amen’ ne yɛwula Nyamenle anyunlunyia a.” (2 Kɔl. 1:20) Gyisɛse a le “Amen” ne a, anzɛɛ ɔmaa ɛwɔkɛ biala mɔɔ Gyihova Nyamenle bɔ la yɛ nɔhalɛ!

 Kɛmɔ Gyihova nee Gyisɛse ka nɔhalɛ dahuu la, zɔhane ala a Pɔɔlo noko yɛle a. (2 Kɔl. 1:19) Ɔnle awie mɔɔ ɔtu kuma a ɔndo elue nu, ɔnyɛ ngyehyɛleɛ kɛ “adalɛ sonla.” (2 Kɔl. 1:17) Emomu, ɔmanle ‘sunsum ne hilele ye adenle.’ (Gal. 5:16) Ɛnee ɔdwenle menli nwo. Ɛnee ye Ɛhɛe kile Ɛhɛe!

Ɛnɛ, menli mɔɔ ɛnva Baebolo ngyinlazo ɛnli gyima la ta bɔ ɛwɔkɛ bu zo wɔ mekɛ mɔɔ ngyegyelɛ ekyi anzɛɛ debie mɔɔ bɛ nye die nwo kɛra la. Wɔ gualilɛ nu, saa bɔbɔ bɛyɛ ngyehyɛleɛ bie anwo kɛlata a, tɛ mekɛ ne amuala a bɛ “ɛhɛe” kile “ɛhɛe” a. Menli dɔɔnwo ɛmbu agyalɛ kɛ ngyehyɛleɛ mɔɔ menli nwiɔ ɛyɛ mɔɔ bɛmpɛ nu ɛlɛ a. Emomu, ewolebɔlɛ mɔɔ ɛlɛkɔ ɔ nyunlu la kile kɛ menli dɔɔnwo bu agyalɛ kɛ ɔle mekɛ ekyi nu ngamɔnu mɔɔ bɛkola bɛpɛ nu a.—2 Tem. 3:1, 2.

Na ɛdawɔ noko ɛ? Asoo wɔ Ɛhɛe kile Ɛhɛe? Kɛmɔ yɛnwunle ye wɔ edwɛkɛ ɛhye mɔlebɛbo la, ɔdwu mekɛ ne bie a ɛnee ɔhyia kɛ ɛpɛ ngyehyɛleɛ bie anu mɔɔ yemɔ ɛngile kɛ ɛnli wɔ edwɛkɛ zo, emomu tɛnlabelɛ bie mɔɔ ɛngola ɛnyɛ nwolɛ ɛhwee la ati ɔ. Noko saa Keleseɛnenli bie bɔ ɛwɔkɛ anzɛɛ tu ɔ nwo maa wɔ debie bie anu a, ɔwɔ kɛ ɔyɛ ye afoa nu ɛdeɛ biala ɔfa ɔdi nwolɛ gyima. (Edw. 15:4; Mat. 5:37) Saa ɛyɛ zɔ a, bɛbanwu wɔ kɛ awie mɔɔ bɛkola bɛfa bɛ nwo bɛto ɔ nwo zo, ɔdi ye edwɛkɛ zo, na ɔka nɔhalɛ dahuu a. (Ɛfɛ. 4:15, 25; Gye. 5:12) Saa ɔba ye zɔ a, bɛbanyia ɛhulolɛ bɛadie Nyamenle Belemgbunlililɛ ne anwo daselɛ mɔɔ ɛdi ye dahuu la. Ɛhye ati, bɛmaa yɛbɔ mɔdenle yɛmaa yɛ Ɛhɛe ɛhile Ɛhɛe amgba!