Ngapezo 3. Ewule Ngakyile

“Ewule ngakyile bara ɛleka dɔɔnwo.”—LUKU 21:11.

● Ɛnee gyimayɛvoma mɔɔ tu ezukoa nvutuke wɔ Afrika maanle bie mɔɔ ɛnee konle ɛzi zo anu la ɛnyia ewule ngɛkɛba bie mɔɔ bɛfɛlɛ ye Marburg la bie. * Ɛnee Bonzali mɔɔ yɛ ayile la ɛlɛbɔ mɔdenle aboa menli mɔɔ ɛlɛwu la. Ɔbɔle mɔdenle kɛ arane mgbanyima mɔɔ wɔ azua mgbole zo la baraboa ye noko awie ampili ye. Ye siane nna anzi mɔɔ bɛrale la ɛnee Bonzali ɛwu. Ɔnyianle Marburg ewule ne bie wɔ gyimayɛvoma ne mɔɔ ɛnee ɔlɛboa bɛ la ɛkɛ.

DASELƐ BONI A WƆ ƐKƐ A? Ewule ngakyile mɔɔ le kɛ (ɛvovoa ewule), ahunlundulɛ, HIV/AIDS, avinliwule, yɛɛ ebunlu boka ewule mɔɔ gyegye alesama kpalɛ la anwo. Kenlensa ye bɛkile kɛ, ewule nnu ɛhye mɔ ɛhu menli mgbe 10.7. Yɛbahola yɛaha ye adenle fofolɛ zo kɛ ewule ɛhye mɔ ku asɛɛ sonla ko wɔ wate ɛzunlɛ kɛ nsa biala anu wɔ ɛvolɛ ko anu.

DUZU A MENLI TA KA A? Menli mɔɔ wɔ ewiade la anwo ɛlɛso ɛhye ati a menli dɔɔnwo anwo to bɛ a. Menli dɔɔnwo wɔ ɛkɛ yemɔti ewule ne to ɔ sa biala a ɔnyia bie.

ASOO ƆLE NƆHALƐ? Ɔle nɔhalɛ kɛ menli mɔɔ wɔ ewiade la dodo ɛhɔ ɔ nyunlu. Noko alesama ɛnyia anyuhɔlɛ wɔ ndenle mɔɔ bɛdua zo bɛnwu ewule, bɛsi ye adenle na bɛyɛ ayile la anu. Yemɔti anrɛɛ ɔwɔ kɛ ngyegyelɛ mɔɔ ewule ngakyile fa ba la azo te, ɔnle zɔ ɔ? Noko ɔmba ye zɔ.

KƐ WƆ ADWENLE SE WƆ Ɛ? Asoo ewule ngakyile ɛlɛmaa menli anwu amaneɛ kɛmɔ Baebolo ne hanle dole ɛkɛ la?

Azɛlɛkpusulɛ, ɛhɔne nee ewule ngakyile le ninyɛne mɔɔ ɔnvi sonla na ɔmaa menli mgbe dɔɔnwo nwu amaneɛ a. Noko amaneɛnwunlɛ ne bie vi alesama, bɔbɔ bɛdabɛ mɔɔ anrɛɛ ɔwɔ kɛ bɛbɔ yɛ nwo bane la. Yɛ mɔɔ Baebolo ne hanle dole ɛkɛ kɛ ɔbazi la nzonlɛ.

[Ɔ bo ɛkɛ ne edwɛkɛ]

[Edwɛkɛ mɔɔ bɛkpa wɔ mukelɛ 6]

“Ɔbayɛ nyane kɛ awenade anzɛɛ debie ɛtɛkyele wɔ na ɛte nganeɛ kɛ asɛɛ bɛlɛdi ɛ nwo nane la, zɔhane ala a saa ewule kɛkɛba bie ɛlɛdi ɛ nwo nane na ɛyɛ nwolɛ ɛhwee a ɔnyɛ boɛ a ɔyɛ nyane a.”—EWULENZANE NWO ABƆLƆLƆBA MICHAEL OSTERHOLM.

[Nvoninli Ɛvileka wɔ mukelɛ 6]

© William Daniels/Panos Pictures