Twe Bikye Nyamenle

Ɔkyekye Mɔɔ Arɛle Ɛbɔ La Arɛle

KELESEƐNENLI raalɛ bie mɔɔ nyianle adwenle nu ngyegyelɛ hyɛle la hanle kɛ: “Gyihova ɛnrɛhulo me edwɛkɛ ɛlɛ.” Ɔnyianle adwenle kɛ Gyihova ɛmbikye ye. Asoo ɔle nɔhalɛ kɛ Gyihova ɛmbikye ye azonvolɛ mɔɔ lɛ adwenle nu ngyegyelɛ la? Yɛnwu mualɛ mɔɔ maa arɛlekyekyelɛ la wɔ edwɛndolɛnli Devidi edwɛkɛ ne mɔɔ vi sunsum ne mɔɔ bɛhɛlɛ ye wɔ Edwɛndolɛ 34:18 la anu.

Ɛnee Devidi ze kɛzi adwenledwenle dɔɔnwo kola gyegye Gyihova nɔhalɛ sonvolɛ la. Mekɛ mɔɔ ɛnee Devidi le kakula la, Belemgbunli Sɔɔlo mɔɔ ɛnee ɛlɛtwe ɔ nwo nungule la vuale kɛ ɔku ye, yemɔti ɔnriandile. Devidi kpondɛle ɛvealeka wɔ ɛleka mɔɔ ɔzuzule kɛ Sɔɔlo ɛnrɛhɔ ɛkɛ la wɔ Gate, Filisitiama mɔɔ bɛle ye agbɔvolɛ la maanle nu. Noko, mekɛ mɔɔ bɛnwunle ye la, saa yeanyɛ ɔ nwo kɛ yezɛ a anrɛɛ bɛhunle ye. Devidi hanvole Nyamenle kɛ ɔliele ye la, na ɛhye a manle ɔhɛlɛle edwɛkɛ mɔɔ wɔ Edwɛndolɛ 34 ne a.

Asoo ɛnee Devidi dwenle kɛ Nyamenle ɛmbikye bɛdabɛ mɔɔ bɛ adwenle nu ngyegyelɛ ti bɛlɛdi nyane anzɛɛ bɛte nganeɛ kɛ Ɔmbu bɛ la ɔ? Devidi hɛlɛle kɛ: “[Gyihova] bikye mɔɔ nyane ɛha ye la, na ɔdie mɔɔ ye anyelazo ɛwie la.” (Ngyɛnu 18) Maa yɛnlea kɛzi edwɛkɛ ɛhye maa arɛlekyekyelɛ nee anyelazo la.

Gyihova “bikye” yɛ. Buluku bie ka kɛ edwɛkɛ ɛhye le “adenle mɔɔ bɛdua zo bɛda ye ali kɛ Awulae tie yɛ edwɛkɛ na ɔnea yɛ, na yeziezie ɔ nwo mekɛ biala kɛ ɔbaboa ye menli na yealie bɛ.” Saa yɛnwu kɛ Gyihova sinza ye menli a, ɔmaa yɛ rɛle kyekye. Ɔnwu tɛnlabelɛ mɔɔ yɛkɔ nu wɔ “anwongyelelɛ” mekɛ ɛhye anu la, yɛɛ ɔze nganeɛ mɔɔ yɛte ye wɔ yɛ nu la.—2 Temɔte 3:1; Gyima ne 17:27.

“Mɔɔ nyane ɛha ye.” Wɔ maandeɛ bie mɔ anu, “mɔɔ nyane ɛha ye” la a le awie mɔɔ bɛye ɔ rɛle bɛdo ɔ sa nu la. Noko, abɔlɔba bie ka kɛ, edwɛndolɛnli ne edwɛkɛ ne fane “nyane nee alɔbɔlɛ biala mɔɔ menli di la” anwo. Ɛhɛe, ɔdwu mekɛ ne bie a Nyamenle nɔhalɛ azonvolɛ bɔbɔ anwo kyele bɛ kpalɛ na ɛhye maa bɛdi nyane.

“Mɔɔ ye anyelazo ɛwie.” Menli mɔɔ bɛ sa nu ɛdo la ɛmbu bɛ nwo bie, na ɛhye maa bɛte nganeɛ wɔ mekɛ bie anu kɛ bɛnlɛ anyelazo. Buluku bie mɔɔ menli mɔɔ kile Baebolo bo ɛhɛlɛ la ka kɛ bɛbahola bɛahile edwɛkɛ ɛhye abo kɛ “bɛdabɛ mɔɔ bɛ nye ɛnla debie kpalɛ biala azo la.”

Kɛzi Gyihova bu “mɔɔ nyane ɛha ye” nee “mɔɔ ye anyelazo ɛwie” la ɛ? Asoo ɔtwe ɔ nwo ɔfi bɛ nwo? Asoo ɔte nganeɛ kɛ bɛnfɛta kɛ ɔda ɛlɔlɛ ali ɔkile bɛ na ɔdwenle bɛ nwo ɔ? Kyɛkyɛ! Kɛmɔ selɛ anzɛɛ ninli mɔɔ lɛ ɛlɔlɛ sɔ ɔ ra mɔɔ ɛlɛdi nyane na ɔkyekye ɔ rɛle la, zɔhane ala a Gyihova bikye ye azonvolɛ mɔɔ bɛsu bɛfɛlɛ ye la a. Yeziezie ɔ nwo kɛ ɔbakyekye mɔɔ ɔlɛdi nyane la arɛle na yeaboa mɔɔ ye anyelazo ɛwie la. Ɔbahola yeamaa bɛ nrɛlɛbɛ nee anwosesebɛ mɔɔ bɛhyia nwo amaa bɛagyinla sɔnea biala mɔɔ ɔbado bɛ la anloa.—2 Kɔlentema 4:7; Gyemise 1:5.

Duzu ati a ɛmkpondɛ adenle mɔɔ ɛbahola wɔalua zo wɔahwe wɔabikye Gyihova la ɛ? Nyamenle ɛhye mɔɔ se anwunvɔne la bɔ ɛwɔkɛ kɛ: “Me nee mɔɔ nu ɔ nwo na ɔle bɛlɛvo la tɛnla, kɛ memaa mɔɔ ɛnlu ɔ nwo la anyia anyelazo.”—Ayezaya 57:15.