Mɛlɛbɛnwoaze kile awie mɔɔ ɔmmemaa ɔ nwo zo anzɛɛ ɔndu ɔ nwo la. Awie mɔɔ bɛlɛ nwo aze la ɛmbu awie mɔ kɛ ɔ nwo hyia tɛla bɛ. Dasanli mɔɔ ɛnli munli mɔɔ lɛ mɛlɛbɛnwoaze la ze kɛ ɔnrɛhola ɔnrɛyɛ debie biala.

Mosisi anva tumililɛ ammemaa ɔ nwo zo. Fane dɔɔnwo ne ala, awie nyia tumi ekyi a, saa ɔbɛlɛ ɔ nwo aze anzɛɛ ɔmbɛlɛ ɔ nwo aze a ɔda ali ndɛndɛ. Ɛvoya bulu nee ngɔnla ne anu buluku kɛlɛvolɛ Robert G. Ingersoll hanle kɛ: “Menli dɔɔnwo kola gyinla ngyegyelɛ nloa. Noko saa ɛkulo kɛ ɛnwu kɛzi sonla de la kpalɛ a maa ye tumi.” Wɔ ɛhye anwo, Mosisi yɛle mɛlɛbɛnwoaze nwo neazo kɛnlɛma. Adenle boni azo?

Mosisi nyianle tumi kpole ɔluakɛ Gyihova hanle kɛ ɔli Yizilayɛma anyunlu. Noko, zɔhane tumi ne ammaa Mosisi ammemaa ɔ nwo zo. Kɛ neazo la, suzu kɛzi ɔbuale agyapadeɛ nwo kpuyia mɔɔ anu yɛ se wɔ mɛlɛbɛnwoaze adenle zo la anwo nea. (Ɛdianlɛ 27:1-11) Ɛnee ɔle edwɛkɛ kpole, ɔluakɛ kpɔkɛzilɛ ne bayɛ mɛla adenle zo adehilelɛ amaa awolɛndoazo mɔɔ bara la.

Kɛzi Mosisi bali nwolɛ gyima ɛ? Asoo ɔbadwenle kɛ kɛmɔ ɔdaye a ɔli Yizilayɛma anyunlu la ati, ɔkola ɔsi edwɛkɛ ne anwo kpɔkɛ ɔ? Asoo ɔbava ɔ nwo yeado ye anwosesebɛ, anwubielɛ, anzɛɛ Gyihova adwenle nwo ndelebɛbo mɔɔ ɔlɛ la azo?

Bie a anwomemaazo sonla bayɛ zɔ. Noko Mosisi anyɛ zɔ. Baebolo ne ka kile yɛ kɛ: “Mosisi vale bɛ edwɛkɛ ne dole [Gyihova] anyunlu.” (Ɛdianlɛ 27:5) Dwenle nwolɛ nea! Ɔnva nwo kɛ Mosisi lile Yizilayɛma anyunlu kɛyɛ ɛvolɛ 40 anzi bɔbɔ la, yeanva ɔ nwo yeando ɔ nwo zo, ɔvale ɔ nwo ɔdole Gyihova anwo zo. Mosisi mɛlɛbɛnwoaze ne lale ali kpalɛ wɔ ɛke.

Mosisi annyia adwenle kɛ ɔwɔ kɛ ɔ ngomekye a ɔdi tumi a. Ɔ nye liele wɔ mekɛ mɔɔ Gyihova manle Yizilayɛma bie mɔ yɛle ngapezoma la. (Ɛdianlɛ 11:24-29) Mekɛ mɔɔ Mosisi ase zuzule kɛ ɔmaa awie mɔ ɛyɛ gyima ne bie la, ɔbɛlɛle ɔ nwo aze na ɔvale ye nzuzulɛ ne ɔlile gyima. (Adendulɛ 18:13-24) Mosisi yɛle kpanyinli mɔɔ ɛnee ɔtɛdɛ anwosesebɛ la, ɔhanle kɛ Gyihova ɛkpa awie mɔɔ bali ɔ gyakɛ anu la. Mekɛ mɔɔ Gyihova kpale Dwɔhyua la, Mosisi vile ahonle nu boale kpavolɛ ne na ɔzile menli ne adua kɛ bɛli Dwɔhyua anzi bɛhɔ Ɛwɔkɛ Azɛlɛ ne azo. (Ɛdianlɛ 27:15-18; Mɛla ne 31:3-6; 34:7) Nɔhalɛ nu, Mosisi bule ye kɛ yenyia nwolɛ adenle kɛ ɔbali Yizilayɛma anyunlu wɔ ɛzonlenlɛ nu. Noko, yeammaa ye tumililɛ ne anyɛ ye fɛ andɛla awie mɔ boɛyɛlɛ.

Yɛngulo kɛ tumililɛ anzɛɛ mɔdenlebɔlɛ bie maa yɛmemaa yɛ nwo zo. Kakye kɛ: Gyihova bava yɛ ali gyima a, ɔwɔ kɛ yɛnyia mɛlɛbɛnwoaze kpole yɛtɛla yɛ mɔdenlebɔlɛ. (1 Samoɛle 15:17) Saa yɛbɛlɛ yɛ nwo aze kpalɛ a, yɛbabɔ mɔdenle yɛava Baebolo ne anu folɛdulɛ ɛhye yɛabɔ yɛ ɛbɛla: “Yeye wɔ ahonle nu fa ɛ rɛle wula [Gyihova] anu, mmafa wɔ adwenle ɛsɔ ɛ ngome wɔ nrɛlɛbɛ.”—Mrɛlɛbulɛ 3:5, 6.

Mosisi neazo ne noko maa yɛnwu kɛ ɔnle kɛ yɛmaa dibilɛ anzɛɛ tumi nwo kyia yɛ somaa.

Saa yɛsukoa Mosisi mɛlɛbɛnwoaze nwo neazo ne a ɔbaboa yɛ ɔ? Kpolerazulɛ biala ɛnle nwo! Saa yɛbɛlɛ yɛ nwo aze kpalɛ a, menli mɔɔ yɛ nee bɛ de la anye die na bɛkulo yɛ edwɛkɛ. Mɔɔ hyia kpalɛ la, yɛmaa Gyihova Nyamenle mɔɔ da subane kɛnlɛma ɛhye ali la anye die yɛ nwo. (Edwɛndolɛ 18:35) “Nyamenle kyi mɔɔ memaa ɔ nwo zo la, na ɔyila mɔɔ bɛlɛ ɔ nwo aze la.” (1 Pita 5:5) Nea debie mɔɔ ɔti ɔwɔ kɛ yɛsukoa Mosisi mɛlɛbɛnwoaze ne la!